ცისფერი სათლები

ვნებით ვეზიდები ჭიდან ცისფერ სათლებს,
ცეცხლის ალები მაქვს თმებზე მოდებული.
ალბათ, მერამდენე შენი კოცნა მმართებს,
მაინც ბუტია ვარ ეგრეთწოდებული.
კადნიერებაა, გერქვას „ჩემი კაცი“,
არა, არ გეგონოს, მართლა გებუტები...
მე კი მართლა მინდა, მერქვას შენზე შენი
ქალი, შველი, ბარტყი, შენ რომ გებუდები.
არა!!! მაინც მინდა? მარტო ჩემი იყავ!
მხოლოდ ჩემი თმების ელვა გათრთოლებდეს!
მე თუ ერთადერთად, კარგო მიმაჩნიხარ,
შენც ხომ ჩემი ტანი უნდა გაჟრჟოლებდეს?
ნაწნავს ჩამოგიშვებ ჩემ ბროლის კოშკიდან,
ამოდი, ამხსენი ლალის ბორკილები!
თუ კლიტე დამადე, შენ თავად გამაღე,
ავიშვათ, ბოჰემის დავდგათ ქორწილები.

ვნებით ვეზიდები ჭიდან ცისფერ სათლებს,
სანთლად გეკიდები, შენი კოცნა მმართებს..