რატი ამაღლობელი - მებაღის ჯვარცმა

მებაღის ჯვარცმა

სონეტი რაინდს

გრაალის კოშკთან დაცემულო თეთრო რაინდო!
თეთრო რაინდო, ზეციერო მირონცხებულო,
ცრუ ლუციფერთან ნაბრძოლო და დამარცხებულო,
დღეს შენმა სულმა საუკუნო ბინა დაიდო.

თეთრო რაინდო, ეკლიან გზის ნათლით მმოსავო,
დაუღალავად სულ მარჯვენა მომარჯვებულო,
მაგ დამარცხებით თვით სიკვდილზე გამარჯვებულო,
მუდამ მებრძოლო, ოზირისო „სხივშუბოსანო!“

შენი მახვილი დამმარხველი არის მხილება,
ლოცვა ფარია, შუაღამის მზეზე მგალობი
და თუ ოდესმე ბრმას თვალები აეხილება,
ო, ისევ შენი გულმხურვალე ლოცვის წყალობით.

დღეს იქნებ ღირს მყო, დამანახო გზების ბოლონი,
ჩემთვის დღეიდან შენ იცოდე, ხარ აპოლონი!


გალაკტიონს

გოლგოთისა მგლოვიარე
არე არა გლუვი არი,
ხვეულ-ხვეულ ბილიკებით
ყოვლი არე მოვიარე.

"ელოი ლამა საბაქთანი",
ჯვარი მთაზე ამაქ თანა,
სადაც ერთი სამათგანი
აღდგა გულის ალაგთანა.

კამალოკამ თავის ქალა
შალა ათას ათას რკალად,
ალაგ-ალაგ, ქალაქ-ქალაქ
ცა გაიხსნა: - გალა! გალა!