გალაკტიონ ტაბიძე - ჩემი სიმღერა

ზოგს ოქრომკედით მონაქსოვარი,

სურათი რამე, კარგზე მგლოვარი,

ზოგს ვარდი - წიგნში ჩანატოვარი, -

ყველას რაიმე აქვს სახსოვარი.


ბარათი, სისხლის ცრემლნატბოვარი,

ბეჭედი, ძვირფას ალთა მთოვარი,

საყურე, ტკბილის ჩრდილის მთხოვარი, -

ყველას რაიმე აქვს სახსოვარი.


თმა, როგორც განძი ძნელსაშოვარი,

წიგნი რამ, ომით მონაპოვარი,

საფერფლე, მამის დანატოვარი, -

ყველას რაიმე აქვს სახსოვარი.


სამშობლოვ, მარად მსასოოვარი,

ჰა, ჩემი ჩანგი სწორუპოვარი,

ჰა, ჩემი გულიც, რადგან მგზოვარი

ყველას რაიმე აქვს სახსოვარი.



1934