სულ სხვა ფერად დამეზმანებით…



sul sxva ferad damezmanebit
შემოდგომაზე ასეთ ლექსებს არ წერენ,
ვიცი,..
მაგრამ მაღელვებს ეს ამბავი ახლა ნაკლებად.
თქვენ ფოთოლცვენა გიტაცებდათ შარშანწინ,
მისის
მე,..
ფაეტონით გიტაცებდით
არანაკლებად

(შემოდგომაზე ასეთ რითმას უფრთხიან მუდამ)
თქვენ გარუჯული გქონდათ მკერდი,..
მე კი მაჯები
ვიცი, მიიტანთ ჩემს დაღუპვას ოდესმე,
გულთან
და ჩამწკრივდება თქვენს სარკმელთან ეკიპაჟები
ფრიცი კატების,..
მანჟეტები მიჭერენ ოდეს
და გალუმპული წარსულებით ლოგინს მაბამენ;
არაფერია,
ქალბატონო,
მუხრუჭი,
გულის
არაფერია, ქალბატონო,.. მარწუხი. ღამე

შემოდგომაზე ქორწილების დგება მაისი
და, თუმცა ბევრი დავაშავე, მაინც ვუყვარვარ
სამშობლოს ჩემსას,..
ნატიფსა და სადარბაისლოს.
ჰო, მართლაც ბევრი დავაშავე,..
მაგრამ ვუყვარვარ,
როგორც ბალახი, სარეველა,
ბალახი სარე-
ველა-დ გაიჭრა
დღეს ოცნება ჩემი ეულად.
თქვენ გეძახიან ახლა მისის-ს. უყვარხართ ქალებს
ხოლო ქალაქში ჩემი გული გადარეულა
მწარე ატმებად,..
და წარსული რომ მემატება
სალუკმაპუროდ დატენილი ფიქრის ვაზნებით,..
მოვა ამაღამ,
უცილობლად მოვა ნათება
და, ქალბატონო, სულ სხვა ფერად
დამეზმანებით…



Loading...

ტექსტის სანახავად გაიარეთ რეგისტრაცია.