სწორედ ის
(swored is)
(swored is)
ზეგინდელ ამბებს სიზმარი დღეს მწერს, ნისლის სამოსი მინდვრებს აცვიათ, ახალ სამყაროს და ახალ ლექსებს და ახალ ცივილიზაციას, ვხედავ, ვიაზრებ და წარმოვადგენ და შენთან მომაქვს, გჩუქნი შენია და გლობალური მზის დათბობამდე, მე დაგათბობდი, ლურჯი მტვერი აქვს, შორეთის სითბოს, ახლოდანაც ჩანს, დააკვირდები დაგენახება, წყლის ერთმა წვეთმა უხმო დანარჩენს, მდინარეების ახალ არხებად, მე გზას მოვიკვლევ შენ გონებამდე, შენთან რომ ვიყო მთელი ცხოვრება, მთელ ჩემ სიყვარულს შენ მაგონებდე, შუქი ღიმილზეც გეცისკროვნება, ჩვენ ხომ სამყაროს აღსასრულს ველით, ის კი არ დგება, ან უკვე მოხდა, მე ნატვრა დამრჩა დღეს სასურველი, თუ აღმომხდება სანუკვარ ოხვრად, მას გადავაქცევ ამომღერებად, წარმოიდგინე შენ ხარ ვითომ მე, სხვა ათასწლეულს სხვა დრო ენება, თუ შენც ინებებ თავს დაგიტოვებ, ერთი ფესვით დგას ზოგჯერ ორი ხე, კოსმოსისხელა სხივი აქვს დაისს, სწორედ ისა ხარ ვინც მე მგონიხარ და თუ არა ხარ, მიყვარხარ მაინც.
