გაამოს
(gaamos)
(gaamos)
ბედის მაცნეა შენი წინათგრძნობა, შენთან გზავნილი საბედოდ მოაქვს, გაამოს ნიავმა ახლა რომ ქროდა, ძველად განვლილი ახალი დროა, გაამოს შენმა დაბადებისდღემ, დასაჩუქრების აღფრთოვანებამ, მე შენ შესახებ ახლა შევიტყვე, შენ ყურს ჩემი ხმა ეხმოვანება, გაამოს საუზმემ, სადილმა, ვახშამმა და შესვენებამ სამუშაო დროს, გაამოს ძილისწინ ღამის სურნელმა, იმან გაამოს ვინც შენ გაგათბობს, ვინც შენ მოგხიბლავს, ვინც შენ აღგაგზნებს, სიჩუმეს გიმხელს საშიში ვნების და ხელისგულზე ბედის ნახაზებს, შეგიცხელებს და შენც გაშიშვლდები, შიში გაქრება ან შეიცვლება, შენ სიმხურვალე შიგნიდან დაგწვავს, გაამოს აზრთა ყველა იმ ცნებამ ვნება რომ დაფუფუქავს მათივე ნამწვავს, რომ გადაფერფლავს და გაშლი სხეულს და გაშლი ხელებს, თმებსა და პირს, ოდნავ შეაღებ, კანიც ისე ხურს, გაამოს ცრემლმა, შენში როცა წვიმს, გაამოს თავთან დარჩენის წამმა, განმარტოებამ და სისულელემ, სიბრძნეს რომ აქცევს უკუღმა წაღმა, გეამოს ნატვრა, თუ ისურვებდე, გეამოს შენივე კოცნა სხვისადმი, შენივე ყოფნა, წარმოჩინება და თუ კი მუნჯი ლაპარაკს ისწავლის, გეამოს სიტყვა, მთქმელს ხმა სჭირდება, ხმა რომ შენამდე მოვიდეს, დარჩეს და ყურადღება ყურით მიიღო, შენ იყურები, გესმის და ხედავ, მთელი სიამით გსურს გაიღიმო, გაამოს, გაამოს, სევდაც გეამოს და სიხარულიც გქონდეს სიამედ და შენთან ვიყო ნეტავ მე ამ დროს, ბედის მაცნეც თუ დაიგვიანებს.
დეფი 2010
