ნანა მეფარიშვილი - შემომეშველე

შემომეშველე

შემომეშველე, ნასროლ ქვებზე ფეხი ამიცდა,
არ გახსოვს, გუშინ წაქცეულს რომ მოგეცი ხელი.
უკანასკნელი იმედები ვიდრე გამიცვდა,
ვინ იცის, ხვალე ისევ ვიყო სიკეთის მქმნელი.

შემომაფარე შენი სული ესოდენ სათნო,
გახსოვს მოყვასო, გჭირდებოდი გუშინ რარიგად..
არ მინდა ჩემი საბოლოო ოცნებაც დავთმო,
შემიდგი მხარი, უფალია ყოვლის გამრიგე.

მომეცი სითბო, გამეყინა ვიდრე თვალები,
რომ მერე ბრმად არ ავუარო გვერდი წაქცეულს,
დღეს თუ შეძლებ და სულისსაბნად დამეფარები,
ვიცი, სირცხვილი დამიბრუნებს ნამუსს გაქცეულს.

მომეცი პური, გამიტეხე მადლი საშენო,
ჩემი სისუსტე მოიკიდე მხრებზე და ნახავ..
ხვალ სადარდელად არ გექნება ღმერთს რა აჩვენო,
როდესაც მასთან განწმენდილი სინდისით ახვალ.

ნანა მეფარიშვილი