მორის ფოცხიშვილი - საკმარისია, დაიწყოს თოვა




საკმარისია, დაიწყოს თოვა,
ო, ყველაფერი ისე იწყება,
როგორც პირველი შეგრძნებით თრობა,
როგორც პირველი გამოფხიზლება.

იწყება, როგორც გზნება გზნებათა,
როგორც პირველი აზრის ძიება,
როგორც პირველი შეცოდება და
როგორც პირველი მონანიება.

ისევ ამოჰქუხს ცეცხლი გულიდან,
ისევ იწყება თრთოლა სულისა,
როგორც პირველი სიყვარული და
პირველი ხილვა სასწაულისა!

ისევ იწყება არსის აღმომჩენ
ფიქრის ფარფატი... სად არის ბოლო...
საკმარისია, ისევ გამოჩნდე,
საკმარისია, გამოჩნდე მხოლოდ!




Loading...

ტექსტის სანახავად გაიარეთ რეგისტრაცია.