დილის ნამივით წმინდა ხარ

დილის ნამივით წმინდა ხარ,
ქალავ, ავდარშიც მზიანო,
ემაგ გულის ხმით გამათბე,
მოსვლა არ დააგვიანო.

მიყვარხარ, გეტყვი გულისთქმას,
შავთვალავ, ალერსიანო,
შენის სურვილით დავთვრები,
ლამაზის სახელიანო.

მთა–ჭიუხებში განთიადს
დარეკენ ცისკრის ზარები,
როცა მე აღარ ვიქნები,
ფიქრებშიც შაგებრალები.

მიყვარხარ, გეტყვი, უგულოვ,
მყინვარს მოჰგავხარ წესადა,
ნუ მომკლავ, გეგულებოდე,
შენის ქალამნის ფესვადა....

შორს მწყემსის ხმატკბილ სალამურს
ჩვენგან მიჰქონდა დარდები
მიყვარხარ, მენატრებოდი
ეკლიანს ვკრიფე ვარდები

სიყვარულს უმღერს ბულბული
მიყვარხარ სახემზიანო
მიყვარხარ, ჩემად მეგულვი
მოსვლა არ დააგვიანო

დეკანოზი თავმაზ ჩოხელი