ენვერ სალაყაია – სხვის ნაოფლარით წყურვილს თუ იკლავ ...

სხვის ნაოფლარით წყურვილს თუ იკლავ,
არ შეგარჩენენ სხივთა სავანეს,
სკიპტრა უბრალო არის მეტალი,
დრო-ჟამი მაინც დაგასამარებს.
საგულდაგულოდ საგნებს თუ ირჩევ,
თოხი ჯობია ოქროს მარაოს,
პირამიდები მონას აცოცხლებს
და ფეხქვეშ თელავს ხეპრე ფარაონს.
ათენი,რომი შუქად აენთო,
განა ნერონი კალიგულათი?
დრო უფსკრულებზე ბეწვის ხიდია,
ის არის ყოვლის ხელისუფალი.
ცოცხლობს ჯორდანოს უდრეკი მზერა,
მღილებმა ცეცხლში ვეღარ ჩაფერფლეს.
ქრისტე ჯვარს აცვეს დამთხვეულებმა
და ბრუნოც ცეცხლში აღმოაცენეს.