გალაკტიონ ტაბიძე – ევროპის უფერული დღე

დღე ეუბნება ფერადი გემის

სილუეტს ზღვაზე:

განა მე მსურდა ცხოვრების ჩემის

მოწყობა ასე?

ოკეანეთა ხარ მძლავრი გემი,

ხარ ბედნიერი,

მძაფრი ქარიშხლის ტალღების ცემით

ხარ შენ ძლიერი.

თუ უნდობლობამ გაბზარა კაჟი -

შენი დიდება,

არა ჭაობში, არამედ ზღვაში

ჩაეკიდება.

მოწმე მრავალი ხრწნისა და ლპობის,

მაცდური ფიცის -

მე - უფერული დღე ვარ ევროპის,

შენ კი... ვინ იცის?!

1935.