იოსებ დავითაშვილი - ახალ მელექსეს

კარგს აქებ, ცუდსა აძაგებ,
მაკიცხარი ხარ მოდისა;
არ დამირიდო, მუშა ვარ,
ნება მიბოძე ცნობისა!
მიცან და ერთად შევებათ
ახალ ცხოვრების უღელში;
«მე» მოვსპოთ, «ჩვენა» ვიხმაროთ,
მით მოძმეს მივცეთ ნუგეში.
ვეცადოთ მარჯვედ ვიხმაროთ
ქაღალდი, მელან-კალამი,
მჩაგვრელებს მხარი ვუქციოთ,
ჩაგრულებს მივსცეთ სალამი.
სწავლისა, განათლებისა,
ავმართოთ დროშა-ალამი;
მამულის მართვას შევუდგეთ,
განვაგდოთ გულის ვარამი.

1881 წ., 10 იანვარი.
თბილისი