ნოდარ დუმბაძე - ზღვასთან სიმღერა მინდა

nodar dumbadze zgvastan simgera minda dumbadze nodar leqsebi leqsebis krebuli poezia
ქარო, არწიე ყანა,
ყანავ, ამწიფე პური,
წყაროვ, იმღერე ნანა,
იავ, დაუგდე ყური.
მზეო, შეხედე ღრუბელს,
ცა რად ტიროდა წინად,
ჩიტო, აშენე ბუდე,
ალვავ, მიეცი ბინა.
ირემო, ჩამო ბარად,
ტყეო, დაყარე წაბლი,
ვაზო, იქეცი ქარვად,
ფუტკარო, მომეც თაფლი.
კერავ, იდინე ბოლი,
სარო, გამართე ღობე,
ეზოვ, ამწვანე მოლი,
მიწავ, სიცოცხლე მომეც.
ზღვაო, რაღაცას მღერი
საოცარსა და წმინდას,
ცავ, აიხადე ჭერი,
ზღვასთან სიმღერა მინდა.