ნანა სელეპანოვა - ფიქრში მძინარე



ხარ გადმოსული სურათიდან
სალვადორ დალის...
იდუმალ ვნებას აყოლილი,
ფიქრში მძინარე,
აბობოქრდება სისხლი შენში
ბობოქარ ქალის
და გულმოსული გადმოაფრქვევ
ცეცხლის მდინარეს.

შეკაზმულ რაშზე ამხედრდები
ღიმილით მორცხვით,
ერთ ცოდვილს მაინც უცოდველი
ცოდვისგან იხსნი,
შეიშმუშნები შენც ოდესმე
ცეცხლოვან კოცნით,
გახსნილ ღილკილოს ურცხვი მზერით,
უფრო გაიხსნი.

და მერე, გინდა კალმის მოსმით
ცას შეეჭიდო,
როს ღაღადისი შემზარავი
მთებს აზანზარებს,
არ არის არვინ, ფიქრებიდან
გამოგაფხიზლოს,
გამოფხიზლება უჭირთ ხოლმე,
ზოგჯერ ლამაზებს.



Loading...


თეგები: ფიქრში მძინარე

ტექსტის სანახავად გაიარეთ რეგისტრაცია.