წუხელ ისევ ჩამოთოვა კაკტუსებით



წუხელ ისევ ჩამოთოვა კაკტუსებით
ტანზე ეკლად ჩამომასხდნენ წამები
გამეპარა ცხოვრებაში ლაფსუსები
და დამსდევენ ხორცისფერი ლანდები
შორს მიჰქონდა სიზმარს შენი შეკრთომები
ცხელ სხეულზე იწვის ვნების სანთლები
მთვარის ქიმზე ახლა ნუღარ მელოდები
მთების უნდა ავიარო კალთები...
ნისლებს არღვევს თეთრი გემის სილუეტი
და გემბანზე ჯამბაზები დარბიან
აღარ მომწონს ამ ცხოვრების სიუჟეტი
და ხელახლა გადაწერა მწადია
სულს იმოსავს სათნოებით ლურჯი ღამე
ღილებს აწყვეტს მთვარეს ყვითელ პერანგზე
ვარსკვლავები შვილებივით გადავთვალე
სიყვარული გადავწერე ყველაზე...
თითქოს უცებ დავბერდი და ნაოჭებით
დამეღარა სული ჩემი კარიბჭე
მთვარეს ვუცქერ და ვაცილებ გაოცებით
ზღვის გადაღმა ისე, როგორც მკვდარი მზე
ღმერთო ჩემო!რა ძნელია ქართან ბრძოლა
პირველსაწყისს უბრუნდება სამყარო
არ დამთავრდა ეს ზამთარი არც ეს თოვა
დავიღალე დრო სანამდე დავთვალო
ღონემიხდილს მწვავს სურვილი ის უძღები
და ქვიშაზე შენს ნაკვალევს ვაგროვებ
მტვერ დაყრილი ფურცელივით გავხუნდები
აღარ ვიცი ახლა იქნებ ვაბოდებ...
თეთრი მზე კი გადაშლილა თეთრ ვარდივით
(საკუთარ ჩრდილს შევაფარე სხეული)
ამ ყველაფერს გეფიცები მეც, განვიცდი
როგორც ლექსი ქვებზე გადანთხეული..
წუხელ ისევ ჩამოთოვა კაკტუსებით
ტანზე ეკლად ჩამომასხდნენ წამები
გამეპარა ცხოვრებაში ლაფსუსები
და დამსდევენ ხორცისფერი ლანდები.

ბადიშ ხურსილი



Loading...

ტექსტის სანახავად გაიარეთ რეგისტრაცია.