კითხვის ნიშანი წვიმაში

ჯერ ერთი წვეთი დაეშვა ფრთხილად,
მერე უეცრად მოცვივდა ყველა
და შესახვედრად ანთებულ დილას
მგონი თვითონვე დასჭირდა შველა.

იფარებოდა კვალი სილაში,
მიწამ ამდენი წყალი ვერ შესვა
და მოლოდინით სავსე წვიმაში
შენს მოსვლას კითხვის ნიშანი ესვა...

კვლავ ჩამორბოდნენ წვეთები წყვილად,
წვიმის სიგიჟეს სივრცე ისმენდა
და კოჭებამდე გალუმპულ დილას
ჩვენი შეხვედრა ახალისებდა...

ვანო კორძაძე