ნუ გამომიშვებ შენი წყევლიდან

"ნუ გამომიშვებ შენი წყევლიდან,
ნუ გამომიშვებ შენი ცრემლიდან,
ნუ,ნუ გამაგდებ შენი დარდიდან,
ამ სიზმრიდან და ამ სინათლიდან.

არსად არა აქვს ამ ცას ნაპირი,
ცაში ვარ,ცაში, გამოკეტილი,
ვით გამჭვირვალე მინის ციხეში,
მინის ჭერი და მინის კედელი.
ნუ დასწევ ფარდებს,კარს ნუ მიხურავ,
ვჩანდე ბეჩავი და სასაცილო.
ბრბოს რას დაეძებ,
დაე,მიყურონ,
მიყურონ,მტანჯონ და დამამცირონ.

გახლართული ვარ ღრუბლის ბლონდებით
ფრთებდამსხრეული ჩიტი საბრალო.
მიყურონ!
შენ ნუ შეგეცოდები,
ჩემს ციხეს ხელი არ ააფარო.
მიყურონ!"

ვახტანგ ხარჩილავა