მახვილს მაღლა უნდა სწევდე

სხვა დრო დგება, როგორც ხედავ,
ხელი შეგვაჩვიეს ქართველს,
მტერი გუშინ სამცხეს გღლეტდა
ახლა ზღვისპირეთსაც გართმევს.
მკერდზე ყორანივით გეჯდა,
ძმურად გიცხადებდა სასჯელს,
გუშინ საინგილოს გგლეჯდა,
ახლა ბოლნის-დმანისს წაგგლეჯს.
წაგგლეჯს აჭარას და ჰერეთს,
გულს მოგიკლავს,
გულით თუ ფრენ,
მესხებს მოგტაცებს და მერე
უკან დაგიბრუნებს თურქებს,
ნიჩბით შეგჭრა ჩანგზე სიმი,
იჭვით გიქრობს რწმენის სანთელს,
საინგილოს ვინღა ჩივის
მგონი სამაჩაბლოს გართმევს….
ცეცხლი არ გწვავს,
ისე გნაცრავს, მგონი ვერც გრძნობ
ნაკრტენ ნაჭდევს,
როგორც გუგულს შენს ბუდეში
კვლავ სურს დედინაცვლად ჩაჯდეს.
შენი იმედი აქვს შენს მტერს,
პირზე გკოცნის როცა ქართველს,
მახვილს მაღლა უნდა სწევდე,
გონზე მოსვლა ახლა გმართებს.