თაგვები ომში
ომის მეორე ზაფხულს ქალაქი თაგვებით აივსო. ღამღამობით ვირთხები საკანალიზაციო არხებიდან ნაგავსაყრელებზე ინაცვლებდნენ და მთელ ამ იმპერიას იპყრობდნენ. ზოგჯერ ისინი თავს ესხმოდნენ მიამიტ კატებსა და დაკარგულ ბავშვებს და ამიტომ როგორც კი ჩამობნელდებოდა, ყველა კარს ვრაზავდით. თითქოს რაღაც საიდუმლო შეთანხმებით, ჩვენს სახლებში ჩასახლდნენ პატარა, სულელი თაგვები, რომელთაც ხან ფქვილის ტომრებში ვპოულობდით, ხან ჩვენს სადღესასწაულო ტანსაცმელში, და რაც მეტს ვანადგურებდით, მეტად მრავლდებოდნენ. პირველ თაგვს, რომელიც ფორტეპიანოს უკან ხაფანგში გაება, „ხელოვანი“დავარქვით. მას მოყვა უსახელო თაგვების მთელი არმია, რომლებსაც მხოლოდ ვითვლიდით.
ვიფიქრე: მერე რა, რომ ამ ქალაქისთვის დაცემული მხოლოდ პირველი ვირთხის სახელი მახსოვს, და მას მოჰყვა შავი სტატისტიკა დაღუპული სარაევოელების შესახებ. რა ერქვა მას? ვცდილობ გავიხსენო და სხვენიდან ნეკროლოგების ყუთი ჩამომაქვს. მაგრამ იქ მხოლოდ ქაღალდის ნაფლეთებია და შეშინებული თვალები ვირთხების მოდგმისა,რომელთაც საუკუნეებია ვებრძვით და ვერ გავანადგურეთ, თუმცა მათ არც კი იციან თავიანთი პირველი გმირის სახელი. და არც დიდი ხნის წინ დატოვებული სამშობლოს სახელი.
×
