ცეცხლის ღვთაება

წარმართის სისხლი ბორგავს ჩემს ძარღვებში
შენს სამსხვერპლოზე დანთებული
ცეცხლის ალივით ცხელი და ავი.
გუგუნებს ცეცხლი
და მროკავ ალებს
ღამისფერი მწარე კვამლი
მუდამ თან ახლავს.
კვამლი ზეცისკენ კითხვის ნიშნად მოერკალება,
მოაქვს სუნთქვა და მხურვალება
სამსხვერპლო ალთან.

წარმართის სისხლი არბევს ჩემს სხეულს,
ცეცხლის ალი ჩემს სულშიც იწვის
და ღამისფერი მწარე კვამლი
იმასაც ახლავს.
დაეხეტება მწარე კვამლი ლურჯ უდაბნოში,
დააქვს სუნთქვა და მხურვალება
ჩემი სულის უხილავ ალთა.

წარმართის სისხლი
გრძნეული ცეცხლით
ძარღვთა ჩემთა გადამბუგავი,
მარად გეძებდა,
ცეცხლის ღვთაებავ,
დაგეძებს ახლაც...