მოვდივარ შენთან ლაღი ბავშვივით

მოვდივარ შენთან ლაღი ბავშვივით,
მიხილავ, ვიცი გაგიხარდება.
ღვთაება ჩემში ლურჯი ბაღივით,
ქარისგან შენთვის განიავდება.

მხოლოდ შენ გესმის ჩემი ტკივილი,
ამიტომ შენთან მომეჩქარება.
ო, გულს უნდება შენთან ტირილი,
როცა გრძნობები მომეძალება.

მხოლოდ შენ მხედავ სრულად ამ ქვეყნად,
შენ ნახე ჩემი ელვარე გული.
იცი რას ნიშნავს ნაღველი ჩემთან,
რას ნიშნავს იყო შეყვარებული.

ვდგავარ მინდორში ასე მოთმენით
და მახვევია ველის შროშანი.
ძვირფასო, ხარობს იცოდე შენით,
ჩემში მარადჟამს მყოფი მგოსანი.

მიხეილ ქაშიაშვილი