ლია ფანჩულიძე - მერე გაზაფხულიც მოვა



უცებ გაგექცევა წლები.
უცებ დაბერდება კერა.
მერე მიგატოვებს ფიქრიც.
ვეღარ დაიბრუნებ ვერა.

გული ვეღარ უძლებს ლოდინს.
თვალსაც აერია მზერა.
ფეხიც ვეღარ დადის ისე,
ვეღარ გამიტყუეს გზებმა.

მერე მოფრინდება ქარიც.
პირზე მოგაშორებს ღიმილს.
მერე გაზაფხულიც მოვა.
...იხეტიალებს და ივლის.

და თუ ვერ ვიპოვე ფიქრი
და თუ სიზმარივით გაქრა.
აღარ მომიძიოთ მაშინ.
ჩემთან მარტოობა დარჩა.

და თუ დაბრუნდება ფიქრი.
მერე ის დარჩება კენტად.
ფიქრი არ იღლება ფიქრით?
ფიქრი არ ბერდება ნეტავ?

უნდა გავებუტო ისევ.
ფიქრმა დამაჩვია ლოდინს.
უნდა რომ დამიწვეს გვერდით,
უნდა შემომოძვრეს ლოგინს.

ისევ აბოლდება კერა.
სუნი შეგაწუხებს კვამლის.
ისევ დაიზრდება ბალღი
და ცუდ მოგონებებს წაშლის.

...ძლიერ მენატრება,ძლიერ,
ხელებს რომ მითბობდა დედა.
უნდა მოვერიო ტკივილს
და ქარს გავატანო სევდა.

ლია ფანჩულიძე



Loading...


თეგები: მერე გაზაფხულიც მოვა ლექსი ფიქრზე კერიაზე გასულ წლებზე

ტექსტის სანახავად გაიარეთ რეგისტრაცია.