არ გყვარებივარ არასდროს ელდით

არ გყვარებივარ არასდროს ელდით,
და ის მცირედიც წვიმამ მარგუნა,
ისე მოხდა, რომ ერთმანეთს შევხვდით,
და წამოვიდა წვიმა შხაპუნა.
ცამ მიკარნახა ღრუბლის მქსოველმა,
სიტყვებს ყვავილთა რიგად გაიფენს,
ფიქრად მოვიდა წვიმა რომელმაც
ჩვენ შეგვაფარა ქოლგას ვარდისფერს.
ჰო იმ ქოლგის ქვეშ, ჰო იმ წვიმაში,
გაერთიანდნენ თითქოს გულები,
მერე შევიტყვეთ ზღაპრის ფინალში,
რომ არაფერი იყო სრულებით!
და ეს ფიქრებიც ელვად მკრთომელნი,
როგორც სანთლები ისე იწვიან,
ან რას გაძლებდა გრძნობა რომელიც
შხაპუნა წვიმამ გამოიწვია.

ქეთევან ნათელაძე