თენება

თენება

ვარდისფერი კაბა გაიშალა ცაზე,
აკიაფდა ფერთა ჯადოსნური გამა,
მგონი სიზმრად ვნახე მსგავსი სილამაზე,
ვით გააქრო დროის ულმობელმა ქარმა.
შიშველ ხეებს მიღმა აირია ღამე,
ფანტელები თეთრი ჩამოცვივდა ციდან,
ასე იყო მაშინ _ ადრე, ადრე, ადრე,
როცა თეთრი ზეცა წვიმასავით ცრიდა.
დრომ იცვალა მრუმემ ვარდისფერი ფერი,
თუ წარსული ზღაპრულ იკი-ბიკოს ლამბავს,
ზეცა მოჩანს, როგორც კაბა ალისფერი
და მიყვება ქარი სიყვარულის ამბავს.
მგონი სიზმრად ვნახე მსგავსი სილამაზე,
ვარდისფერი კაბა გაიშალა ცაზე.

ავტორი: ნინო როსტომაშვილი