ქალმა კენგურუ იშვილა



ოკლაჰომაში (აშშ) მცხოვრები 39 წლის კრისტი ქარი ცხოველთა თავშესაფარში მოხალისედ მუშაობდა და უვლიდა ტრავმირებულ კენგურუს, სახელად ირვინს. ამერიკელ ქალბატონს ისე შეუყვარდა კენგურუ, რომ გადაწყვიტა, ეშვილა. ოკლაჰომის ხელისუფლების წარმომადგენლებმა მას კენგურუს შვილად აყვანისთვის 50.000-დოლარიანი სამედიცინო დაზღვევის პოლისი მოსთხოვეს. კრისტი ქარს არ შეეძლო ამ თანხის გადახდა, რასაც ძალიან განიცდიდა. თუმცა ანონიმმა დონორმა დაზღვევის თანხა გადაიხადა და კრისტი ქარმაც მოახერხა, კენგურუ შვილად აეყვანა.

ავსტრალიელები შეშფოთდნენ, რომ კენგურუ ამერიკაში საშინაო პირობებში გაიზრდებოდა, ამიტომ კრისტი ქარს საპროტესტო წერილები გაუგზავნეს. ცოტა ხნის წინ კი ამერიკელი ქალბატონი ავსტრალიაში ჩამოვიდა, სიდნეის ცხოველთა დაცვის ორგანიზაციაში პრესკონფერენცია გამართა და ავსტრალიელებს აუხსნა, როგორ უყვარს "დედა-შვილს" ერთმანეთი. გთავაზობთ ექსკლუზიურ ინტერვიუს კენგურუს დედასთან - კრისტი ქართან.

- კრისტი, რამ გადაგაწყვეტინათ კენგურუს შვილად აყვანა?
- მძიმე დეპრესია მქონდა და ჩემმა ფსიქოლოგმა მირჩია, გულის გადასაყოლებლად ცხოველისთვის მომევლო. ამიტომაც დავიწყე ცხოველთა თავშესაფარში მოხალისედ მუშაობა. სწორედ იქ შევხვდი კენგურუ ირვინს, რომელიც ტრავმირებული იყო და მოძრაობა უჭირდა. მთელი ყურადღება მასზე გადავიტანე: საკუთარი ხელით ვაჭმევდი, ვასეირნებდი და ირვინსაც დღითიდღე უუმჯობესდებოდა ჯანმრთელობა. ამ ხნის განმავლობაში ისე შემიყვარდა, მის გარეშე ვეღარ ვძლებდი. დეპრესიასაც დავაღწიე თავი, ცხოვრების ხალისი დამიბრუნდა და გადავწყვიტე ირვინი მეშვილა.

- როგორც ვიცი, ამის გამო პრობლემები შეგექმნათ.
- დიდი ბრძოლა დამჭირდა. დამკვირვებლებმა შეამოწმეს ჩემი სახლი, ეზო, აინტერესებდათ, რა პირობებში უნდა ეცხოვრა კენგურუს. ოკლაჰომას ხელისუფლების წარმომადგენლებმა მომთხოვეს, 50.000-დოლარიანი სამედიცინო დაზღვევის პოლისი შემეძინა ირვინისთვის. ვერ ვახერხებდი ამ თანხის შეგროვებას და ძალიან განვიცდიდი, ვნერვიულობდი, ვტიროდი და ღმერთმა არ გამწირა. მაცნობეს, რომ ანონიმმა დონორმა დაფარა დაზღვევის თანხა. სიცოცხლის ბოლომდე მისი მადლიერი ვიქნები. უცნობი ადამიანის დახმარებით ირვინი ოფიციალურად ვიშვილე.

- როგორ ცხოვრობთ კენგურუსთან ერთად.
- ძალიან ტკბილად. მე მას ველაპარაკები, ვუკითხავ ზღაპრებს, ვეთამაშები. მთელ დროს ირვინს ვუთმობ. ქალაქგარეთაც მივდივართ ხოლმე მანქანით. ირვინი უკანა სავარძელზე, ბავშვისთვის განკუთვნილ კალათაში ზის, კომფორტულად. ერთხელ სუპერმარკეტში ირვინი კალათით წავიყვანე, მას მაისური ეცვა და თავზე კეპი ეხურა. პატარა გოგონამ რომ დაინახა, სათამაშო კენგურუ ეგონა და მისი შეძენა მოუნდა. გოგონას ავუხსენი, ეს კენგურუ ჩემი შვილია და როგორც შენ არ გაგყიდის შენი დედიკო, ისე ვერ გავყიდი ჩემს შვილს-მეთქი.

- კენგურუს ტანსაცმელს თვითონ უკერავთ?
- ძირითადად მე ვუკერავ. ირვინს ლამაზი პერანგები, შარვლები და პიჯაკები აქვს. ყველა შარვალს უკანა მხარეს კუდისთვის ადგილს ვუჭრი. აქვს სპორტული სამოსიც და კლასიკურიც. ყოველდღიურად შორტი და მაისური აცვია, წვეულებაზე კი ელეგანტურ პიჯაკსა და შარვალშია ხოლმე გამოწყობილი. ამას წინათ წითელი ჰალსტუხი შევუძინე და ძალიან მოუხდა.

- რით კვებავთ?
- ბოსტნეულით. ყოველდღიურად ვუმზადებ გემრიელ სალათებს, ძალიან უყვარს პოპკორნი. საღამოობით ტელევიზორთან მოვკალათდებით ხოლმე და ერთად მივირთმევთ პოპკორნს (იცინის).

- კენგურუ კი იშვილეთ, მაგრამ ბავშვის აყვანზე არასდროს გიფიქრიათ?
- ყოველთვის ბევრი საქმე მქონდა და პირადი ცხოვრებისთვის ვერ ვიცლიდი. სიმართლე გითხრათ, ბავშვის აყვანაზე არასდროს მიფიქრია. ახლაც სრულიად შემთხვევით გავხდი დედა. ვერასდროს წარმოვიდგენდი, ცხოველს თუ ვიშვილებდი. გადავარჩინე პარალიზებული კენგურუ, შემიყვარდა და ამიტომაც ვიშვილე.

- ავსტრალიაში ამ ამბავს უარყოფითად შეხვდნენ. როგორ მოახერხებთ ავსტრალიელების დარწმუნებას, რომ სწორად მოიქეცით?
- ავსტრალიელებს ვუამბე ჩემი ისტორია, ავუხსენი, რომ მე და ირვინი უერთმანეთოდ ვერ ვიცოცხლებთ და ვფიქრობ დავარწმუნე კიდეც, რომ სწორად მოვიქეცი. პატარა კენგურუმ უნდა იცხოვროს იქ, სადაც ბედნიერი იქნება. ამიტომაც დამითმეს ავსტრალიელებმა ამერიკელ ქალს კენგურუ.












Loading...

ტექსტის სანახავად გაიარეთ რეგისტრაცია.