ანტიკური სამყაროს უდიდესი მოაზროვნის სოკრატეს აზრით, ძველი ცივილიზებული მსოფლიო ,,ფასისიდან (მდ. რიონი) ვიდრე ჰერაკლეს სვეტებამდე (გიბრალტარის სრუტე) ვრცელდებოდა. ეს იყო ის თავდაპირველი რეგიონი, რომელიც დროთა განმავლობაში ნელ-ნელა ფართოვდებოდა და რომლის გარშემო თანდათან ყალიბდებოდა ჯერ ანტიკური (ბერძნულ-რომაული), შემდეგ ევროპული, ხოლო სულ უკანასკნელ საუკუნეებში ახლანდელი დიდი ევრო-ატლანტიკური ცივილიზებული სამყარო.
მსოფლიო კლასიკური მითოლოგიის უთვალსაჩინოეს ძეგლ ,,არგონავტიკის თანახმად, ამავე ფასისზე გაშენებილი იყო უძველესი კოლხეთის დედაქალაქი აია-კუტაია-კუტაიისი. აქ იდგა პირველი ქართველი მეფე აიეტის გრანდიოზული სამეფო სასახლე, რომლის ოქროს დარბაზებიდან ,,ჰელიოსი (მზე) აღმოსვლას იწყებდა. აქვე , მის მახლობლად, ინახებოდა ,,ოქრომრავალი აია-კოლხეთის სამეფოსა და მისი დედაქალაქის ძლიერების, სიმდიდრისა და უძველესი სიბრძნის სიმბოლო ოქროს საწმისი... ასეთი ზღაპრული შარავანდედით შემოსილი დიდებით შემოდიოდა უხუცესი ქართული ქალაქი ქუთაისი (,,ქუთათისი) ისტორიაში.
ქალაქი ქუთაისი გაშენებულია ქვეყნის ყველაზე წყალუხვი და სანაოსნო მდინარე რიონზე. მდინარე ქალაქს ორ დასავლეთ და აღმოსავლეთ ნაწილად ჰყოფს. ქუთაისის ცენტრი ზღვის დონიდან 150 მეტრ სიმაღლეზეა. ქალაქიდან კარგად ჩანს კლდოვან ჯავშნად აღმართული ხვამლი (2 002 მ) და დიდი და მცირე კავკასიონის ულამაზესი მწვერვალები. ქუთაისიდან საქართველოს დედაქალაქ თბილისამდე 220 კილომეტრია.
მოსახლეობის აბსოლუტურ უმრავლესობას (97, 5 %) ქართველები შეადგენდნენ. აქვე ცხოვრობენ, აგრეთვე, ქართველი ებრაელები, რუსები, სომხები, უკრაინელები, ბერძნები.
×
