სადღაც განვდევნეთ პატიოსნება

სადღაც განვდევნეთ პატიოსნება,

არაფრად ფასობს დანაპირები....

ერთადერთ "საქმედ" დაგვრჩა ოცნება,

გაქრა საზღვრები და ნაპირები...


აღარ ვამართლებთ იმედს და ნდობას,

ცუდსაც ვერაფერს ვხედავთ ამაში...

რატომ ვეცდებით ვინმეს დანდობას?

გვართობს გულწრფელი გრძნობით თამაში...


რეალობას და ოცნებებს შორის

დასაბამიდან მარად ომია...

რთულია აღქმა მცდარის და სწორის,

გულების მსხვრევის მარათონია...


ახლა წარსულში გამავალ სარკმელს

დაკარგულ დროთა გამო ხატავენ,

მომწონს, რომ ბევრი თქვენგანის სათქმელს,

ჩემი ლექსები გამოხატავენ...


გირჩევთ გრძნობების გაზიარებას,

დღეს რომ გვიჭირავს - მრუმე რანგია...

ვეცადოთ ცოდვის აღიარებას,

თორემ - ცხოვრება "ბუმერანგია"...


სხვას რომ გავხადეთ, იმ ქურქის ჩაცმას

სჯობს, რომ მიზნები გვქონდეს დიადი...

თუ არ მოვიშლით სიკეთის ჯვარცმას,

ბოლოს ყველაფერს შთანთქავს წყვდიადი...


ჯემალ ფერაძე 15.09.2019



გიორგი მეფის პასუხი შორენას

გიორგი მეფის პასუხი შორენას

,,მე შენზე ფიქრები მისანსაც ვუამბე,

სადა ხარ, სადა ხარ, სადა ხარ შორენა...

წუხელის ღამესთან იბრძოდა ხოხობი,

შენი ნებიერა არაგვთან გოდებდა.

მოჰყევი ჩემამდე მეწამულ სიზმრებს და

ვერ ვარკვევ ქალი ხარ, თუ უფრო-ავაზა,

გელოდი, ცვილისფერ აჩრდილად ქცეული,

ლოდინში ხოხობიც ღამესთან დაზავდა.

შემინდე, ფხოველის ამაყო ასულო,

ზვიადი არ მკითხავს, ომში რას ამზადებს,

სამშობლოს დასჭირდა, უნდა გამეწირა

მრავალი სიცოცხლე, მოხუცი მამამზეც...

არ მკითხო, მარჯვენა ვის უფრო ეტკინა,

ვინ უფრო დაკარგა თვალში მზის ნათელი,

მორიელს შევხვდი და იაკობს ვეომე,

წმინდანად ვიწამე მე შენი სახელი...

...და რადგან გაფრენა არჩიე დარჩენას,

ქარაფებს უამბე, უამბე მორევსაც,

მხოლოდ მე მიყვარდი, როგორც ღვთაებრივი,

ტაძარიც შეგწირე და ტახტიც, შორენა!"

...

შერჩა სვეტიცხოველს მითი მარადისი,

მცხეთასთან არაგვი ხმაურით მოჰყეფდა,

ჰქვია უკვდავებას ზოგჯერ სახელები:

უტა-კონსტანტინე, გიორგი, შორენა...

/ნათია ღვინიაშვილი/



გუშინ საღამოს თურმე მეჯლისზე ამბავი მოხდა უმაგალითო :

გუშინ საღამოს თურმე მეჯლისზე

ამბავი მოხდა უმაგალითო :

ქალი მისულა უყელსაბამო,

უბრილიანტო, უმარგალიტო,

უმანქანო და უმდიდრულქურქო,

უსაყურო და უსამაჯურო,

უქმრო, უშვილო და უღიმილო,

უჯამაგირო, უსამსახურო. . .

მისულა ქალი მაღალ დარბაზში

და არხეინი შეძრულა ხალხი :

ცისფერ-ვარდისფერ მათს გარემოში

კაბა ქალისა შეჭრილა თალხი.

მერე ისეთი რამე მომხდარა,

კინაღამ ყველა გადარეულა :

ქალს დიდი ცრემლი ჩამოჰვარდნია

და ცრემლი კაცად გადაქცეულა.

ქალს დაუწყია ცრემლკაცთან ცეკვა

და კაცის მკერდზე დაუდევს თავი. . .

ქალს ეცვა კაბა, როგორც ვთქვით, თალხი

და კაცსაც სცმია სამოსი შავი.

გაშეშებული მდგარა სუყველა. . .

გაშტერებოდა სუყველას თვალი,

ლამაზი იყო სანახაობა :

როგორ ცეკვავდა ცრემლკაცთან ქალი.

ისე ლამაზი, ისე ლამაზი. . .

წამოუვიდა ყველას ცრემლები. . .

გაქრა დარბაზი და ირგვლივ გაჩნდა

აყვავებული თეთრად ტყემლები. . .

და ყვავილების იმ თეთრ ღრუბელში

ცეკვით აფრინდა ის წყვილი თალხი. . .

ძირს დარჩა უცებ დაბრძენებული

უწინ ცრემლების არმცოდნე ხალხი



ქუჩას მისდევდა ლამაზი გოგო

ქუჩას მისდევდა ლამაზი გოგო

და ცალი ხელით ვარდი მოჰქონდა,

ისეთი იყო, აგიხსნა როგორ,

მოგონილია მასთან ჯოკონდა.

გაქვავებული ჭაბუკნი იდგნენ,

ხმას ვერ იღებდა დიდხანს ვერავინ,

მიშტერებოდნენ იმ ლამაზ გოგოს

და ქანდაკებებს ჰგავდნენ ყველანი.

ბოლოს და ბოლოს ერთმა მათგანმა

იმ გაქვავებულ ჭაბუკთა შორის,

ძლივს ამოღერღა სხვების მაგივრად:

"მტრისას ასეთი ლამაზი ცოლი!"


/ლადო ასათიანი/



დამბალ ხაჭოს

დამბალ ხაჭოს


რას გავხარ? უცხომ თუ ნახა

იქნება გული გაუსკდეს,

იფიქრებ შანსი არ არის

ამაზე ხელი წაუცდეს,

უეცრად ეჭვი გაგივლის

გვერდს თუ არაყი დაუდგეს,

ტაფაში ჩაბრუნებულსა

ერბო თუ ბლომად ჩაუდეს.

წამოდუღდება ერბოში

მსუყე ოხშივარს აიდენს,

დაგარქმევს საჭმლის უნახავს

ისეთ სასწაულს ჩაიდენს.

ჯერ მზეზე შრება და მერე

ბინას ქოთანში დაიდებს,

ფერსაც შეიცვლის სუნსაცა

გარედან ობსაც მაიდებს.

ნიორთან ჟიპიტაურთან

უფრო გემოზე წაიღებს,

ბრძოლა რო იყოს საჭმლისა

ოქროს მედლებსაც აიღებს.

ფშავლების სიამაყე ხარ

რეცეპტს ვერავინ გაიგებს,

ვინც ძალად შეგვეცილება

მე ვიცი რასაც მაიგებს.


/მურმან ცოცხალაშვილი/



ქართველი კაცი როცა მოკვდება ვაზი ამოდის ზედა

შაჰ-აბასმა კახეთში გააჩეხინა და ამოაძირკვინა ვენახები.ბრძანება გასცა:ვის ვენახშიც თუნდაც ერთ ძირ ვაზს აღმოაჩენთ,ვენახის პატრონს თავი მოჰკვეთეთო!
ერთ-ერთი გლეხის ვენახში მართლა ნახეს ერთი ძირი შემთხვევით ჩარჩენილი ვაზი.
პატრონი სახალხოდ დასაჯეს,თავი მოჰკვეთეს და სახელდახელოდ გათხრილ მიწაში ჩააგდეს.იმ საფლავზე მეორე წელს ვაზის რქამ ამოიყარა.თურმე დასჯილ კახელ გლეხს ხალათის საღილეებში ვაზის ლერწი ჰქონდა გაყრილ-გამოყრილი და ის ამოზრდილიყო.

**********************
სიკვდილს სიცოცხლე რომ არ მოჰყვება
ვინა სთქვა ესე ნეტა
ქართველი კაცი როცა მოკვდება
ვაზი ამოდის ზედა
ვაზი ამოდის და თან რა ვაზი
ცრემლად იღვრება ცრემლად
და დაიტირებს მის გამშენებელს
რომელიც იქცა მსხვერპლად
ვაზმა იხარა და მისი ღვინით შესანდობარი დალიეს ჩვენთან
შესანდობარი კაცის რომელმაც
თავი გაწირა მსხვერპლად
თავი გაწირა ვაზის ჯვრის მადლით
და ქრისტეს სადიდებლად
თავი გაწირა
თავი გაწირა
თავი გაწირა მსხვერპლად.

/მიშო ქიშოშვილი/



მუდამ მინთია ერთი სანთელი

"მუდამ მინთია ერთი სანთელი"-

მამით -მეგრელი,დედით-გურული,
სივრცე მაქ ნაბდად წამოხურული.

ჩანს იმედივით ჩემი გელათი,
იმერელი ვარ დედისდედათი

და უმტკიცესი კუნჭულ-კუთხეთი,
მათი ხელდასხმით, ლოცვა-კურთხევით:-

მუდამ მინთია ერთი სანთელი,
ერთი სახელი მქვია--ქართველი!!

ამიტომ მე ვარ ნაღდი სვანი და
ჩემი სალოცავ-საესავითა

მე ვარ თუში და ფშაველ-ხევსური
და რას დამაკლდებს ვინმე,ბნელსული...

ვარ აჭარელი, რაჭველი,მესხი...
მე იმდენი ვარ,ხან თავბრუც მესხმის!

მაგრამ...მინთია ერთი სანთელი, ერთი სახელი მქვია ქართველი!

მე ვარ მოხევე,ვარ ლეჩხუმელი,
მუდამ თბილი მაქვს ჩემი ღუმელი

ზამთარში,როცა სტუმარს ველი და
ზაფხულში ვხვდები ტალავერითა!

რა მაქვს სააჯო ან დასამალი--
მე ვარ ქართლელი--გულით ალალი,

არ ვარ მშიშარა,უკანდამხევი,
რადგან ეს მე ვარ --მტკიცე კახელი!

მე ვარ ლაზი და...ისევ ის მესხი,
მე იმდენი ვარ,ხან თავბრუც მესხმის...

და,ჩემი ქვეყნის ყველა კუთხეთი,მათი ხელდასხმით,ლოცვა-კურთხევით:-

მუდამ მინთია ერთი სანთელი,
ერთი სახელი მქვია--ქართველი!!💗💗💗

ზაურ მოლაშხია 


ქალი?? სუსტიაო... ეს არ დაიჯეროთ

ქალი?? სუსტიაო... ეს არ დაიჯეროთ
ქალი?? ბევრჯერ კაცზე მეტსაც უძლებს მგონი
კაცის სიძლიერე იცით რაში არის??
როცა გვერდითაყავს...საიმედო ცოლი....
ქალს ნუ დაუყვირებ...მას ვერ შეაშინებ...
ყვირილის და ჩხუბის ქალს არ ეშინია...
ქალი რომ არ მიდის ისევ შენთან არის...
სისუსტე გგონია??არა ეს ნიჭია.......]
ნიჭი სიყვარულის... რწმენა უფლისადმი
ერთად აღებული არის ნამდვილ ქალში
თუ კი შეგიყვარა წრფელი,მთელი გულით
გჯეროდეს რომ მაშინ ის არ გაგცვლის სხვაში...
ქალს ჭირდება სითბო..ხშირი მოფერება...
ზოგჯერ მის ხუშტურებს ნაზად გაუღიმე,...
ხშირად უთხარი რომ ძალზედ ლამაზია...
და სიტყვები გრძნობით ხშირად გაურითმე...
მხოლოდ დაანახე სითბო ერთგულება
შენივე დათესილს სიკეთით მოიმკი...
ქალი?? საოცარი არის ქმნილება და...
ნურასდროს ნუ ეტყვი..გადი და მომცილდი...
ქალი..დედა არის... უფლით დალოცვილი...
და ახალ სიცოცხლეს შობს და თავს შეწირავს...
ქალი დღეს ოჯახის არის საძირკველი.,...
და ბევრი ქალი დღეს... მის სიცოცხლეს წირავს....
ქალი სუსტიაო... ეს არ დაიჯეროთ...
თუ კი დაუყვირებ პასუხს თუ არ გაგცემს....
არ დაიჯერო რომ ამის შეეშინდა....
მან რომ მოინდომოს... მუხლებზეც კი დაგცემს...
ზოგჯერ ბავშვური და ზოგჯერ ზრდასრულია...
ზოგჯერ მეოცნებე... ზოგჯერ მეამიტი...
მაგრამ მათ გარეშე ჩვენ ვერასდროს გავძლებთ
უხილავი ძალა გვიპყრობს ვით მაგნიტი....
დღეს ქალის ქალობა...მწარედ შეიცვალა...
მხოლოდ ცოტას შერჩა შნო ძველი ადათის
საზღვრებს ტოვებს დედა... ცრემლში ღამეს ათევს...
აქ კი მათი ქმრები ყირაზე გადადის.....
და ამის შემდეგ კვლავ ქალს რომ დაუყვირებ
იცოდე რომ ამით შენში კლავ კაცობას
ერთხელ თუ გაცივდა.. შენთვის ქალის გული....
ვეღარასდროს შეძლებ შემდეგ მის გათბობას.....
ქალებს მოვეფეროთ ბაგე დავუკოცნოთ....
მათი სიყვარულით გული გავიჯეროთ
ნუ უყვირებ ამის მას არ ეშინია.....
ქალი სუსტიაო!!!... ეს არ დაიჯეროთ
ა.სურმავა


ივლიტა იკა გოლეთიანი- ქარი ქუჩაში

დღე უნებურად უჩქარებს ნაბიჯს,
ხორხიდან დახსნილ ბგერებს აგროვებს,
და ეშმათფერა ფიქრების ჩათვლით
სუყველა ვნებას ასამყაროებს !


ნანა სელეპანოვა - შენ არვის დაეკარგები

განშორდე ყველას, ასე უბრალოდ,
თითქოს და შენთვის არაფერია,
მათ დაბრუნებას, აღარ უცადო,
წავიდეს, ვინც კი წასასვლელია.