ახალი წლის დადგომასთან ერთად, აქტიური ხდება საკითხი იმის შესახებ თუ როგორი შეიძლება იყოს მომავალი წელიწადი ზოდიაქოს ამა თუ იმ ნიშნით დაბადებული ადამიანებისთვის. თუმცა, ასტროლოგები ერთხმად თანხმდებიან იმაზე, რომ მიუხედავად პლანეტარული განლაგებისა ის, თუ როგორი წელიწადი გელოდებათ წინ, დიდწილადაა დამოკიდებული თქვენსავე შემართებასა და დამოკიდებულებაზე სამყაროს მიმართ. შესაბამისად, პრობლემებიც შეგვიძლია პიროვნული ზრდისთვის გამოვიყენოთ მაშინ როცა სხვები, სხვადასხვა ტიპის წინაღობებს როგორც ტრაგედიას ისე აღიქვამენ.

ევროპელი ასტროლოგები მიიჩნევენ, რომ დამდეგი თხის (ცხვრის) წელი თავად ამ ცხოველის ბუნებიდან გამომდინარე, ბიზნესის კუთხით ისეთ ადამიანებს უწევს "ლობირებას", ვისაც აქტიური საზოგადოებრივი ცხოვრება უყვარს, არ ეზარება სხვადასხვა ტიპის ღონისძიებების ორგანიზება და ახერხებს სოციუმის აბსოლუტურად განსხვავებულ ფენებთანაც კი იქონიოს ერთნაირად ლოიალური და დიპლომატიური ურთიერთობა.

აღმოსავლური ჰოროსკოპის მიხედვით 2015 წელი ლურჯი ხის თხის წელიწადი იქნება. ზოგი წლის ამ სიმბოლოს ცხვარს უწოდებს, მაგრამ ამით არსებითი არაფერი იცვლება. თხა აღმოსავლურ ჰოროსკოპში, ერთი მხრივ, მშვიდობასთან, ჰარმონიასა და სიმშვიდესთან სიმბოლიზდება, მეორე მხრივ კი, სიჯიუტესა და კომპრომისებზე წასვლაზე უარის თქმის სურვილთან.