ფლემინგი იან - Ian Fleming



კაზინო "როიალი"

CASINO ROYALE
1953


წიგნი – ნოკაუტების ავტორის შესახებ

ბრიტანულმა გამომცემლობა Ian Fleming Publications Ltd-მა, რომელიც იან ფლემინგის ნაწარმოებების საავტორო უფლების მფლობელია, წლეულს, ივლისის თვეში განაცხადა, რომ ჯეიმს ბონდზე რომანების ავტორის ასი წლის იუბილე აღინიშნება ახალი რომანით სახელგანთქმულ აგენტ 007-ზე. ახალი რომანის ფაბულა და ავტორი მკაცრად გასაიდუმლოებულია. მხოლოდ ისაა ცნობილი, რომ წიგნი დამთავრდება 2008 წლის 28 მაისისთვის (ამ დღეს დაიბადა იან ფლემინგი), მისი ავტორი კი სახელგანთქმული და ძალიან პატივცემული მწერალია. ხოლო რაც შეეხება რომანის შინაარსს, ავტორს ამ მხრივ სრული თავისუფლება აქვს მიცემული.
იან ლანკასტერ ფლემინგი (1908. 05. 28 – 1964. 08. 12) დაიბადა ლონდოდნში, მდიდრულ და არისტოკრატიულ ოჯახში. იგი მეორე შვილი გახლდათ ვალენტაინ და ივ ფლემინგებისა. მათი პირველი შვილი პიტერი ერთი წლით ადრე გაჩნდა, ხოლო იანს მალე მოჰყვნენ რიჩარდი და მაიკლი. 1910 წელს ვალენტაინ ფლემინგი პარლამენტში იქნა არჩეული სამხრეთ ოქსფორდშირიდან და ოჯახიც ჰემპსტედში გადავიდა.
დარნფორდის სკოლასი სწავლისას დაიწყო იანმა ჯონ ბაშანის, საქს რომერის, ედგარ პოსა და რობერტ ლუის სტივენსონის სათავგადასავლო წიგნების კითხვა.
ვალენტაინ ფლემინგი 1914 წლის აგვისტოში გაიწვიეს პირველ მსოფლიო ომში, სადაც მაიორის წოდება მიანიჭეს. იგი 1917 წლის 20 მაისს მოკლეს სომთან შეტაკებისას. დროის გასვლის შემდეგ უინსტონ ჩერჩილმა ვრცელი მოგონება მიუძღვნა თავის მეგობარს და მაიორ ფლემინგს სიკვდილის შემდეგ ორდენი მიანიჭეს წარჩინებული სამსახურისთვის. იან ფლემინგი მთელი ცხოვრება ინახავდა ამ ნეკროლოგსა და ორდენს.
თავისი ძმების მსგავსად იანიც იტონის კოლეჯში იარებოდა, თუმცა დიდად შრომისმოყვარე მოსწავლე არა ყოფილა, მაგრამ თანატოლებს მსუბუქ ათლეტიზმში სჯაბნიდა – ზედიზედ ორი წელიწადი იყო ამ თამაშების ჩემპიონი.
იტონის შემდეგ იან ფლემინგი ერთხანს ავსტრიის ტიროლში იყო, სწავლას განაგრძობდა მიუნხენში და ჟენევაში. ცოტა ხანს იარებოდა სამეფო სამხედრო აკადემიაში, ხოლო მოგვიანებით გაწბილებული დარჩა საგარეო საქმეთა სამინისტროს უმკაცრესი გამოცდების შედეგით. სამაგიეროდ, როიტერის სააგენტოში დაიწყო მუშაობა. ეს მისთვის ძალიან სასიამოვნო და წარმატებული პერიდი გახლდათ. მერე კი ლონდოდნში დაბრუნდა და საბირჟო მაკლერის კარიერას იქმნიდა მანამდე, ვიდრე მეორე მსოფლიო ომმა მთლიანად არ შეუცვალა ცხოვრება.
ომის დაწყებისას იან ფლემინგი გაამწესეს ლეიტენანტად დიდი ბრიტანეთის სამხედრო-საზღვაო ძალების სადაზვერვო განყოფილებაში. იგი მოხვდა სახელგანთქმულ 39-ე კაბინეტში როგორც სამხედრო-საზღვაო დაზვერვის განყოფილების დირექტორის, ადმირალ ჯონ გოდფრის პირადი თანაშემწე.
ომის განმავლობაში დაუღალავად მუშაობდა, ეცნობოდა სამხედრო-საზღვაო დაზვერვის ყველა სექციის მუშაობას, დიდი როლს თამაშობდა საგანგებო მონაცემების კოორდინაციაში მოკავშირეთა სამხედრო მიზნებისათვის.
ფლემინგის ენერგიული ინდივიდუალობა და საგანგებო ორგანიზატორული ჩვევები მეტად დასაფასებელი თვისებები იყო. იგი დაჰყვებოდა უამრავ კომიტეტებს, სადაც თავისი წვლილი შეიტანა ომის მსვლელობაში, როგორც ინტილეჯნს სერვისის საგანგებო დავალებათა შემსრულებელმა. ფლემინგის შესანიშნავი ლიტერატურული სტილი გამოჩნდა მის ყოველდღიური ცნობებში მიმდინარე სიტუაციაზე და ჩინებულად დაწერილ პროექტებში.
სამხედრო სამსახურით იყო განპირობებული მისი ოფიციალური მოგზაურობები საზღვარგარეთ. 1941-42 წლებში ის და ადმირალი გოდფრი კონფიდენციალური მისიით მიავლინეს ამერიკის შეერთებულ შტატებში, რათა იქაური ორგანიზაციებისთვის სადაზვერვო მონაცემები გაეცნოთ საერთო კოორდინაციისთვის. მათმა მუშაობამ უილიამ სტივენსონთან, ლეგენდარულ `უშიშართან~ და `ველურ~ ბილ დონოვანთან დიდი წვლილი შეიტანა ცენტრალური სადაზვერვო სამმართველოს ფორმირებაში.
თავისი სამსახურის მეშვეობით მოხვდა ფლემინგი საფრანგეთში, ესპანეთსა და ჩრდილოეთ აფრიკაში, სადაც მოინახულა ბრიტანული საელჩოები ოპერაცია `ოქროს თვალის~ მათთვის გაცნობის მიზნით, რომელიც მოწოდებული იყო გიბრალტარის დასაცავად, სადაც გერმანელები ესპანეთიდან აპირებდნენ შეჭრას. მან ასევე, როგორც ადმირალის თანაშემწემ, იმოგზაურა ცეილონზე, იამაიკაში, ავსტრალიაში და ასევე კონფერენციებზე, - კაიროსა და თეირანში.
კურირებდა მთელ რიგ საიდუმლო ოპერაციებს, ხელმძღვანელობდა სამხედრო ტყვეების ნორვეგიიდან განთავისუფლების ღონისძიებებს, დაადგინა გერმანული რაკეტების `ფაუს~ ადგილმდებარეობა, მოკავშირეთა ჯარების გადასხმას იტალიაში უზრუნველჰყოფდა სადაზვერვო მონაცემებით.
ერთი ვერსიით, რომელიც 1987 წელს გახმაურდა, - თითქოს ფლემინგმა 1945 წლის 1 მაისისთვის დაგეგმა და უშუალოდ მონაწილეობდა მარტინ ბორმანის გატაცებაში. ამ ოპერაციას ერქვა კოდური სახელწოდება `ჯეიმს ბონდი~.
პატრიკ ბისლიმ, ყოფილმა თანამშრომელმა დაზვერვიდან, ადმირალ გოდფრიზე დაწერილ ბიოგრაფიაში ასეთი სტრიქონები მიუძღვნა იან ფლემინგს: `ყველა, ვინც ომის განმავლობაში თავის მახლობლად ხედავდა იანს, დამეთანხმება, რომ მან ძალიან დიდი წვლილი შეიტანა სამხედრო-საზღვაო ფლოტის გამარჯვებაში~.
`კაზინო `როიალის~ დასაწყისშივე პირველად მოგვევლინება ჯეიმს ბონდი. 007-ს ცივი და ულმობელი თვალები აქვს, 1933 წლის `ბენტლის~ ატარებს. სვამს შამპანურს და მშრალ მარტინის, ასევე თავისივე გამოგონილ კოქტეილს - `სამი წილი `გორდონი~, ერთი - არაყი, ნახევარი საწყაო `კინა ლილეტი~, კარგად აურიეთ, ყინული არ დაგავიწყდეთ და ბოლოს ლიმონის სქელი ნაჭერი დაუმატეთ~. ბონდი `მორლანდის~ სიგარეტებს ეწევა (სპეციალური ბალკანური და თურქული თამბაქოს ნაზავი); ატარებს ავტომატურ, ოცდახუთკალიბრიან `ბერეტას~ და მალევე შეხვდება მომხიბვლელ `საღამოს ვარსკვლავს~, ლინდს, რომელსაც აცვია შავი ხავერდის კაბა, უბრალო და ბრწყინვალე.
იან ფლემინგის პირველმა ბიოგრაფმა, ჯონ პირსონმა 1952 წლის 15 იანვარი დაასახელა ჯეიმს ბონდის დაბადების დღედ, და ამასთან განაცხადა, რომ `კაზინო `როიალი~ 18 მარტს დამთავრდა, ან უფრო ადრეც კი.
იმავე წლის ორშაბათს, 24 მარტს იან ფლემინგმა ენ როზერმერი შეირთო ცოლად და ხშირად ხუმრობდა, - იმიტომ დავწერე `კაზინო `როიალი~, რომ საკუთარი შეხედულება გამომეთქვა კარსმომდგარ ქორწინებაზეო. სამხედრო-საზღვაო ფლოტის დაზვერვაში სამსახურის შემდეგ იმის იმედით წერდა ჯაშუშის ამბავს, რომ რეალობაში არსებული ყველანაირი ჯაშუშური ისტორია მოეშორებინა თავიდან. ორმოცდასამი წლის იყო, ცოლის შერთვას აპირებდა და პირველი შვილი ჰყოლოდა. მისი ამბიცია და გამოცდილება ჯეიმს ბონდის შექმნის მომენტში გაერთიანდა. საკუთარი თავი დაიჯილდოვა, შეკვეთით გამზადებული საწერი მანქანა შეიძინა – მოოქროვილი მეტალით რომ იყო დაფარული. კარგა ხანს აყოვნებდა, სანამ მორცხვად წარუდგენდა რომანს თავის მეგობარს, უილიამ პლომერს, შესანიშნავ პოეტსა და გამომცემლობა Jonathan Cape Ltd –ის რედაქტორს. პლომერმა მაშინვე შეაფასა რომანის ღირსება და წიგნი ჯონათან კეიპმა შეიძინა. იან ფლემინგმა უშუალო გავლენა იქონია გარეკანის პროექტზე და იგი ისე აღწერა, როგორც `ბრწყინვალე სიმეტრიისა და აბსოლუტური სიბრძნის~ ნაირსახეობა. მან ხელნაწერი გაუგზავნა პოლ გოლიკოს, რომელსაც `სანდი ტაიმსიდან~ იცნობდა, და გოლიკო ბედნიერი იყო ჯეიმს ბონდისთვის პირველი ლიტერატურული შეფასება მიეცა: `წიგნი – ნოკაუტი~.
მეორე რომანის, `სხვა მოკვდეს და შენ იცოცხლეს~ დამთავრების შემდეგ იან ფლემინგმა მუშაობა დაიწყო როგორც გაზეთ `სანდი ტაიმსის~ წამყვანმა კომენტატორმა. რომანებმა `მუნრეიკერი~ და `ბრილიანტები მარადიულია~ ძალიან გაზარდეს მისი წიგნების გაყიდვები ბრიტანეთში და ამერიკის შეერთებულ შტატებში. `რუსეთიდან, სიყვარულით~, მეხუთე რომანი შემობრუნების მომენტად იქცა იან ფლემინგის ბიოგრაფიაში. რომანი დაწერილი იყო ჩინებული დეტალებით, დამუხტული გახლდათ დამაჯერებელი პასაჟებით საბჭოურ ჯაშუშობაზე, ასევე შეიცავდა შედარებით სრულად მოაზრებულ ჯეიმს ბონდის ხასიათს. კრიტიკოსებმა და მკითხველმა დააფასა ამ წიგნის ღირსება.
დაწერილ რომანთა წყება მატულობდა, და წიგნები ამრავლებდნენ საერთაშორისო წარმატებას. მათ გაუგონრად აუმაღლდათ პოპულარობა ამერიკაში, 1961 წელს - ეს მას შემდეგ მოხდა, რაც პრეზიდენტმა კენედიმ `რუსეთიდან, სიყვარულით~ ჟურნალ `ლაიფის~ ათ საუკეთესო წიგნის სიაში დაასახელა. ამავე წელს იან ფლემინგმა გულის შეტევა გადაიტანა. გარკვეული დრო დაკარგა გამოჯანმრთელებაში, თან `ჩითი ჩითი ბენგ ბენგ~-ს წერდა, ზღაპარს თავისი შვილის, კასპერისთვის. მერე კვლავ განაგრძობდა რომანების წერას ჯეიმს ბონდზე, ბოლო რომანი იყო `კაცი ოქროს პისტოლეტით~ 1963 წელს...
იან ფლემინგის თითქმის ყველა რომანი ეკრანიზებულია და ამ ფილმებმა დიდება მოუტანა არა მხოლოდ ავტორს, არამედ მსახიობებსაც. მათმა მთავარმა გმირმა, `აგენტმა 007-მა~ (ორი ციფრი `ნული~ იძლევა მკვლელობის უფლებას საგანგებო სიტუაციაში) მალე მოიპოვა მაყურებლის სიყვარული. ჭკვიანი, მომხიბვლელი, მკაცრი და თავის საქმეში წარმატებული ბონდი `ბონდიანას~ ყველა რომანში ზღაპრული გმირივით ბოროტებას ებრძვის და ხორცს ასხამს ისეთ ცნებებს, როგორიცაა `მოვალეობა~, `ვაჟკაცობა~ და `ერთგულება~.
იან ფლემინგის გარდაცვალების შემდეგ მისმა მემკვიდრეებმა ჩამოაყალიბეს Ian Fleming Publications Ltd, და რამდენიმე მწერალმა, მათ შორის ისეთმა ცნობილებმა, როგორნიც არიან კინგსლი ემისი და ჯონ გარდნერი, მიიღეს უფლება სახელგანთქმულ ჯაშუშზე რომანების სერიის გასაგრძელებლად.
და ვიდრე იან ფლემინგზე ერთ მშვენიერ მოგონებას წარმოგიდგენდეთ, იმასაც მოგახსენებთ, რომ საერთო ჯამში ჯეიმს ბონდზე შექმნილი რომანები მთელ მსოფლიოში ას მილიონზე მეტი ტირაჟით გაიყიდა.
`იან ფლემინგი
(კეიტ ფლემინგის მოგონება)
იან ფლემინგი იყო შემქმნელი გმირისა, რომელიც ლეგენდად იქცა მთელ მსოფლიოში და აგრეთვე ჯადოსნური ავტომობილისა, რომელმაც მილიონობით ბავშვის წარმოსახვა დაიპყრო. ის გმირი, რა თქმა უნდა, ჯეიმს ბონდია, ავტომობილი კი – `ჩითი ჩითი ბენგ ბენგი~.
მაინც ვის მიაგავდა ეს შემოქმედებითი გენია? რას მოგვაგონებდა? მაღალი იყო, შავი თმა ჰქონდა და ლურჯი თვალები. ყმაწვილივოთ თხელი და სპორტული იყო. მისი გარეგნობა თავისებური მკაცრი ვერსია იყო ჰიუ გრანტისა, მისი ცხვირისა, რომელიც სკოლაში თამაშისას გაიტეხა და რომელიც ერთგვარ პირქუშ გამომეტყველებას სძენდა. მაგრამ ეს იუმორისტული სახეც იყო. იანი ყოველთვის ტკბებოდა და ერთობოდა ცხოვრებით.
ის არ აპირებდა მწერლობას. მან, ფაქტიურად, მანამდე არ დაწერა თავისი პირველი წიგნი, `კაზინო `როიალი~, სანამ ორმოცდასამი წლისა არ შეიქმნა. მაგრამ ყოველთვის უყვარდა წერა, და ყოველთვის უყვარდა წიგნები, არა მხოლოდ საკითხავად, არამედ როგორც თავისთავადი მიზანი. ომამდე მეგობრის დახმარებით მთელ მსოფლიოში აგროვებდა წიგნებს, მშვენიერი ბიბლიოთეკა შექმნა, რომლებზეც შეიძლება ითქვას, რომ პირველები იყვნენ საიდანმე – ფილოსოფიური იდეებისა თუ ტექნიკური პროგრესის სფეროდან. ისინი განლაგებული იყო, მაგალითად, დარვინის `სახეობათა წარმოშობიდან~ მაგიდის ჩოგბურთის წესების პირველ გამოცემამდე. და სასაცილოა, რომ თავად იანის რომანების პირველი გამოცემებიც ამჟამად ასეთივე საძებარია.
მისი უფროს ძმას, პიტერ ფლემინგს შესანიშნავი ლიტერატურული კარიერა ჰქონდა და ძალიან აქებდნენ ახალგაზრდობიდანვე. იანი, უეჭველად, ამის გამო ჩრდილში გრძნობდა თავს, და, თავდაპირველად წერისას მართალია რწმენა აკლდა, მაგრამ ძმის პროზით მაინც ძალიან ამაყობდა. როგორც ჟურნალისტი, რომელიც ომამდე როიტერის სააგენტოში მუშაობდა, სწავლობდა ჩქარა, მოკლედ და ზუსტად წერას. აქედან არის ზოგიერთი საკუთარი სიტყვები, რომლებიც რომანებში შეიძლება მოინახოს.
წიგნების გარდა, თამაშებით იყო გატაცებული, განსაკუთრებით გოლფით, სარომლისოდაც ძალიან აქეზებდა თავისი შოტლანდიელი ბებია, როცა იანი პატარა ბიჭი იყო; ავტომობილებიც, რომლებზეც ღრმა ცოდნა ჰქონდა; პროდუქტი, რომელიც ბუნებრივი უყვარდა, მაღალი ხარისხისა; და ქალები, რომლებთანაც მომხიბვლელი იყო. იანს შეეძლო ყოფილიყო მახვილგონიერი, ახირებული, სამაგალითო და ჯიუტი (თუმცა დღევანდელი სტანდარტებით რბილი). ის იყო აგრეთვე კეთილი და ფიქრიანი. იანი, უპირველეს ყოვლისა, ორიგინალური იყო ყველაფერში, რაც გააკეთა – არავისი გემოვნების და სტილის იმიტატორი არა ყოფილა.
იანის პატარა ნათესავებისთვის თავიანთი ბიძის მონახულება ნიშნავდა დაუვიწყარ ხიბლს, სიცილს, მღელვარებას. ეს იქამდე იყო, სანამ ჯეიმს ბონდს მსოფლიო გაიცნობდა, ორმოცდაათიან წლებში, როცა დიდი ბრიტანეთი ჯერ კიდევ გონს ვერ მოსულიყო იმ საშინელი ომის შემდეგ. იანმა უფრო ეგზოტიკური ცხოვრების სურნელი მოიტანა და როგორც წესი, უჩვეულო ავტომობილით დაიარებოდა. კარის შიგნით მოთავსებული რაკეტა `თანდერბერდი~ მეტად ამაღელვებელი იყო. მას უყვარდა ბავშვების გართობა, და ღია ბარათი იანისგან ყოველთვის მახვილგონივრული იყო.
ომის შემდეგ იანმა გადაწყვიტა, რომ ინგლისურ ზამთარში ცხოვრება აღარ უნდოდა. ამის გამო იამაიკაზე მარჯნის რიფი იყიდა და ბუნგალოს აშენებას მიჰყო ხელი. იქ ყველაფერი უბრალო იყო, ძვირი კი არა. ორმოციანი წლების ბოლოს არცთუ ბევრი ფიქრობდა ამგვარი ოცნების აღსრულებაზე. ამაში იანი თავის დროს ასწრებდა. და იქ, `ოქროსთვალში~, 1952 წელს დაიწყო წერა...
დანარჩენი კი უკვე ისტორიაა.

მიხო მოსულიშვილი



პირველი თავი - საიდუმლო აგენტი

ღამის სამი საათისთვის კაზინოში სიგარეტის კვამლისა და ოფლის სუნი გაუსაძლისი ხდება.
აზარტული თამაშების მიერ გამოწვეული სულიერი მდგომარეობა - სიხარბის, შიშისა და ნერვული დაძაბულობის ერთობლიობა - აუტანელია, თითქოს ყველა შეგრძნებას ერთად აღვიძებს და აჯანყებას იწყებს.
ჯეიმს ბონდი უეცრად მიხვდა, რომ დაიღალა. ყოველთვის გრძნობდა, რამდენი შეეძლო მის სხეულსა თუ გონებას, და ჩვეულებვრივ, ამაზე დაყრდნობით იქცეოდა. ეს თვისება ეხმარებოდა გადაღლილობისა და სისულელით გამოწვეული შეცდომების თავიდან აცილებაში.
ჯეიმს ბონდმა `რულეტის~ თამაში შეწყვიტა, შეუმჩნევლად მოშორდა მაგიდას და ცოტა ხნით იმ მოაჯირთან შეჩერდა, რომლის იქითაც დარბაზში ყველაზე დიდი - მკერდამდე სიმაღლის ბანქოს მაგიდა იდგა.
შიფრე თამაშს განაგრძობდა და, სავარაუდოდ, ისევ იგებდა, რადგან მის წინ ათასიანი ჩიპების რამდენიმე გორა იდგა. მისი მსხვილი მარცხენა ხელის ჩრდილში კი შეუმჩნევლად ეწყო დიდი ყვითელი ჩიპები, თითოეული დაახლოებით ნახევარ მილიონ ფრანკს შეესაბამებოდა.
ბონდი ერთხანს უყურებდა შიფრეს საინტერესო, შთამბეჭდავ პროფილს. შემდეგ მხრები აიჩეჩა, აზრები მოიკრიფა და გზა განაგრძო.
სალაროებს და დარბაზს ერთმანეთისგან ნიკაპის სიმაღლის ბარიერები ჰყოფდა. ბარიერებს იქით კი, მბრუნავ სკამებზე მსხდომი მოლარეები ჩიპებისა და ბანკნოტების გორებში იყვნენ ჩაფლულნი და ბანკის რიგით თანამშრომლებს მოგაგონებდნენ.
ბარიერის მეორე მხარეს მოლარეები ერთ ხაზზე არიან ჩამწკრივებულნი და პირდაპირ თქვენს საზარდულს უყურებენ. მათ თავის დასაცავად ხელკეტი და იარაღი აქვთ, ასე რომ, ბარიერზე გადახტომა, ბანკნოტების წართმევა, მერე უკან გადმოხტომა და კაზინოს კარებიდან ან სხვა რომელიმე გასასვლელებიდან გაქცევა, - შეუძლებელია. თანაც მოლარეები, ჩვეულებრივ, წყვილებად მუშაობენ.
ბონდი ამ სირთულეებზე ჩაფიქრდა, თან მოლარეს ჯერ ასი ათასის ოდენობის ბანკნოტები გამოართვა, შემდეგ კი ათი ათასიანი ბანკნოტის რამდენიმე შეკვრა აიღო. ტვინის მეორე ნაწილით კი კაზინოს კომიტეტის ხვალინდელი რიგითი სხდომა წარმოიდგინა.
- ბატონმა შიფრემ ორი მილიონი მოიგო. მისი გუშინდელი თამაში ისითივე იყო, როგორიც ყველა სხვა დანარჩენი. მის ფეარჩაილდმა სულ რაღაც ერთ საათში მილიონი შეაგროვა და შემდეგ წავიდა. მას მთელი საათის მანძილზე ეჭირა ბატონი შიფრეს სამი `ბანკი~ და უეცრად დაგვტოვა. ძალიან მშვიდად თამაშობდა. ბატონმა ვიკომტ დე ვილორინმა რულეტზე მილიონ ორასი ათასი მოიგო. პირველ და ბოლო დუჟინზე მაქსიმალური ფსონებით ითამაშა. ძალიან უმართლებდა. რაც შეეხება ინგლისელ ჯენტლმენს, მისტერ ბონდს, მან საკუთარი მოგება ორი დღის მანძილზე ზუსტად სამ მილიონამდე გაზარდა. ის მეხუთე მაგიდასთან პროგრესული სისტემით წითელზე თამაშობდა. პარტია დუკლოსს მიყავდა და შეუძლია დეტალები მოგვახსენოს. მისტერ ბონდი დაჟინებული მოთამაშეა და ხშირად რისკავს. როგორც ჩანს, კარგი ნერვები აქვს და ბედიც სწყალობს. იმ საღამოს `ცხრის~ თამაშმა მოიგო – X, `ბაკარამ~ - Y, `რულეტმა~ - Z, `ბულე~ კი, რომელსაც ყველაზე მეტი ხალხი აწყდება, ჯერ ისევ წაგებაშია.
- გმადლობ, ბატონო ხავიერ.
- გმადლობ, ბატონო პრეზიდენტო.
`დაახლოებით ასე წარიმართება~, - გაიფიქრა ბონდმა და გზა დარბაზის მბრუნავი კარების გავლით განაგრძო. გასვლისას თავი დაუკრა საღამოს სამოსში გამოწყობილ მოწყენილ მამაკაცს, რომლის სამსახურსაც თქვენი გასვლა-შემოსვლის დროს წარმოქმნილი ნებისმიერი საფრთხის შემთხვევაში ელექტროღილაკზე ფეხის დაჭერა და გასასვლელების ავტომატური ჩაკეტვა წარმოადგენდა.
ამით კაზინოს კომიტეტის სხდომა დამთავრებულად გამოცხადდებოდა, ანგარიშები გადაიცემოდა და მონაწილეები ლანჩზე წავიდოდნენ. ზოგი - სახლში, ზოგიც - რესტორანში.
რაც შეეხება სალაროს გაძარცვას, რასაც თავად ბონდი, ცხადია, არ აპირებდა და მხოლოდ თეორიული დეტალებით იყო დაინტერესებული, ათი კარგად გაწვრთნილი ადამიანი დასჭირდებოდა. ეს საქმე უმსხვერპლოდ ნამდვილად ვერ ჩაივლიდა. ერთი-ორი თანამშრომლის მოკვლა გარდაუვალი იყო. ჯეიმსმა ჩათვალა, რომ არც საფრანგეთში და არც სხვა რომელიმე ქვეყანაში ამ საქმისთვის საჭირო და მოცლილი ათი მკვლელის პოვნა პრაქტიკულად შეუძლებელი იყო.
ბონდმა გარდერობში მდგომ ახალგაზრდას მომსახურებისთვის ათასი ფრანკი აჩუქა, კიბეებზე ჩამოვიდა და საბოლოოდ დარწმუნდა, რომ შიფრე ვერც ერთ შემთხვევაში ვერ გაბედავდა კაზინოს გაძარცვას და ყველა ეჭვი თავიდან ამოიგდო. ამ აზრებისგან განთავისუფლებული ჯეიმსი თავის შეგრძნებებზე ჩაფიქრდა. მან მშრალი, უსიამოვნო ხრეში იგრძნო საღამოს ფერსაცმლის ქვეშ. მიხვდა, რომ პირში ცუდი, მომწარო გემო ჰქონდა და ოდნავ გაოფლიანებულიყო. ისეთი დაღლილი იყო, რომ მოეჩვენა, თითქოს დაძაბულობისგან თვალები საკუთარ ბუდეებს გრძნობდნენ. შუბლი, ცხვირი და ლოყები ეწვოდა. ღამის სასიამოვნო ჰაერი ღრმად ჩაისუნთქა. ყველა შეგრძნების მობილიზაცია მოახდინა და თავი ხელში აიყვანა. ახლა მხოლოდ თავისი ოთახის შემოწმება უნდოდა. აინტერესებდა, მას შემდეგ, რაც სადილის დროს გასაღები ჩააბარა, ვინმე ხომ არ შევიდა მის ოთახში და ხომ არ გაჩხრიკეს.
ბონდმა ჯერ ფართო ბულვარი გაიარა, შემდეგ ბაღი და სასტუმრო `სფლენდიდში~ შევიდა. კონსიერჟს გაუღიმა, რომელმაც ოთახის გასაღები - ნომერი 45, პირველი სართული - და დეპეშა გადასცა.
დეპეშა იამაიკიდან იყო. ბონდმა კითხვა დაიწყო:

კინგსტონი XXXX XXXXXX XXXX XXX
როიალ სფლენდიდ ლეს - ო ჯეიმს ბონდს
ჰავანას სიგარების წარმოება
ყველა კუბური ქარხანა 1915
ათი მილიონი ვიმეორებ ათი მილიონი წერტილი
იმედი მაქვს ეს სწორედ ის თანხაა რომელიც გაწყობთ.
პატივისცემით,
დასილვა

ეს კი იმას ნიშნავდა, რომ ათი მილიონი ფრანკი უკვე გამოგზავნილი იყო ჯეიმსისთვის. ეს პასუხი იყო იმ დეპეშაზე, რომელიც ბონდმა შუადღისას პარიზიდან ლონდონში, თავის შტაბში გააგზავნა და დამატებითი ფინანსები ითხოვა. პარიზმა აწარმოა მოლაპარაკება ლონდონთან, კლემენტსმა - ბონდის განყოფილების უფროსმა დიდ ხანს ისაუბრა მ-სთან, მ-მ ცივად გაიღიმა და ამ თანხის ხაზინიდან გაცემის განკარგულება გასცა.
ბონდს ერთხელ მოუწია იამაიკაზე დავალების შესრულება და ახლა ის იამაიკის ყველაზე დიდი საექსპორტო-საიმპორტო კომპანიის `მესერს კეფერის~ ძალიან მდიდარი კლიენტი იყო, რომელსაც იამაიკიდან აკონტროლებდა ერთი ძალიან წყნარი კაცი, იგი კარიბის კუნძულების ერთ-ერთ კველაზე სკანდალურ გაზეთ `დეილი გლინერში~ ფოტოგანყოფილებას ხელმძღვანელობდა.
ამ კაცს ფოუკეტი ერქვა. მან კაიმანის კუნძულებზე კუზე მონადირეთა დიდი კლუბის ბუღალტრობით დაიწყო კარიერა. შემდეგ, ომის დასაწყისში, ერთ-ერთი პირველი მოხალისე იყო და მალე მალტაში პატარა საზღვაო სადაზვერვო სამსახურის უფროსის თანაშემწე გახდა. ომის დასასრულს კი, როდესაც ფოუკეტი დამძიმებული გულით კარიბის კუნძულებზე დაბრუნებას აპირებდა, კარიბის კუნძულებით დაინტერესებულმა საიდუმლო სამსახურმა შეამჩნია. ფოუკეტი მონდომებით მოეკიდა ფოტოხელოვნებისა და კიდევ რამდენიმე დარგის შესწავლას, რის შემდეგაც ერთი გავლენიანი იამაიკელი კაცის დახმარებით `დეილი გრინერის~ ფოტოგანყოფილებამდე გაიკვლია გზა.
პერიოდულად, ფოუკეტი შიფრავდა ფოტოებს, რომლებსაც ისეთი დიდი სააგენტოები უგზავნიდნენ, როგორიცაა `ქეისტოუნი~, `ვაილდ ვორლდი~, `უნივერსალი~, `აი-ენ-პი~ და `როიტერ ფოტო~. ის უპირობო დავალებებს პერმანენტულად ტელეფონით იღებდა კაცისგან, რომელიც არასდროს ენახა. ფოუკეტს ისეთი მარტივი დავალებების შესრულება ევალებიდა, რომლებიც მხოლოდ დაკვირვებას, სისწრაფეს და სიზუსტეს მოითხოვდა. ამ სამსახურისთვის ის ინგლისში მცხოვრები ფიქტიური ნათესავისა და კანადის ეროვნული ბანკის საშუალებით ყოველთვიურად ოც ფუნტს იღებდა.
ფოუკეტის ამჟამინდელი დავალება იყო ყოველგვარი შეფერხების გარეშე გადაეცა ბონდისთვის ყველა ის შეტყობინება, რომელსაც ის სახლში, ტელეფონით მიიღებდა უცნობისგან. ფოუკეტი დარწმუნებული იყო, რომ მის მიერ გაგზავნილი არც ერთი დეპეშის ტექსტი იამაიკის საფოსტო ოფისის ეჭვს არ გამოიწვევდა. ყველა ამ წვრილმანი სამსახურის გათვალისწინებით, ფოუკეტს საერთოდ არ გაჰკვირვებია ის ფაქტი, რომ უეცრად `სანაპირო პრესისა და ფოტოსააგენტოს~ კორესპონდენტად დანიშნეს, ქვეყნიდან შეუფერხებელი გასვლისა და კორესპონდენციის გაგზავნის უფლება მისცეს საფრანგეთსა და ინგლისში, თანაც ათი ფუნტის ოდენობის დამატებითი გასამრჯელოც დაუნიშნეს.
ფოუკეტი თავს დაცულად და წახალისებულად გრძნობდა. ის ბრიტანეთის საპატიო მედალზე ოცნებობდა. პირველი თანხა `მორის მაინორზე~ შეიტანა და მწვანე კეპიც კი იყიდა, რომელიც თვალებს მზისგან იცავდა და, რომლის ხელში ჩაგდებაც კარგახანია უნდოდა. ეს ყველაფერი ფოუკეტისთვის ერთგვარი თავის დამტკიცებაც კი იყო ფოტოგანყოფილების უფროსის პოსტზე.
ბონდმა დეპეშა სტრიქონებს მიღმა გადაიკითხა. უკვე შეჩვეული იყო, რომ ინფორმაციას ყოველთვის არაპირდაპირი გზებით აწვდიდნენ. ეს ფაქტი სულაც არ აწუხებდა, პირიქით, გარკვეულ კომფორტსაც კი უქმნიდა. შესაძლებელია, ბონდს ერთი ან ორი საათი დასჭირვებოდა მ-სთან მოსალაპარაკებლად და მშვენივრად იცოდა, რომ ეს მხოლოდ თვალის ახვევა იყო. მას სრულიად დასაშვებად წარმოედგინა, რომ სადაზვერვო სამსახურის რომელიმე თანამშრომელი სასტუმრო `სფლენდიდში~ იმყოფებოდა და დამოუკიდებლად აწვდიდა ცენტრს ინფორმაციას, მაგრამ მაინც იქმნებოდა ილუზია, თითქოს ბონდს ლამანშის ყურეს იქით ასორმოცდაათი მეტრიც კი არ აშორებდა `რეჯენტს პარკის~ გვერდით მდებარე უზარმაზარ ოფისის შენობას, საიდანაც გამუდმებით თვალყურს ადევნებდა რამდენიმე ცივი გონება. ბონდიც ისეთივე სიტუაციაში იყო, როგორშიც კინგსტონში მცხოვრები ფოუკეტი, რომელმაც იცოდა, რომ თუ `მორის მაინორს~ განვადების მაგივრად მთლიანად იყიდდა, ლონდონში ვიღაც აუცილებლად დაინტერესდებოდა იმით, თუ საიდან მოიტანა მან ამისთვის საჭირო ფული.
ბონდმა ორჯერ გადაიკითხა დეპეშა. მაგიდიდან დეპეშის ახალი ფორმა აიღო (რატომ უნდა გაეგზავნა ზუსტი ასლი?) და პასუხი დიდი ასოებით მიწერა:

დიდი მადლობა ინფორმაცია მაკმაყოფილებს - ბონდი

ჯეიმსმა დეპეშა კონსიერჟს გადასცა. დასილვას გამოგზავნილი კი ჯიბეში ჩაიდო. ბონდმა იცოდა, რომ თუ კონსიერჟი ვინმეს ინფორმაციას აწვდიდა, ადგილობრივ საფოსტო განყოფილებაში თავისუფლად შეეძლო დეპეშის ასლის აღება. რა თქმა უნდა, იმ შემთხვევაში, თუ უკუღმა წაკითხვა უკვე არ ჰქონდა მოსწრებული, როცა ჯეიმსს ხელში ეჭირა დეპეშა.
ბონდმა გასაღები აიღო, კონსიერჟს ღამე მშვიდობისა უსურვა, კიბისკენ მიბრუნდა და ლიფტის გამყოლს უარის ნიშნად თავი გაუქნია. იცოდა, რომ ლიფტი ყოველთვის დამატებითი საფრთხის წყარო იყო. პირველ სართულზე ჩასაფრებულს არავის ელოდა, მაგრამ გადაწყვიტა მაინც სიფრთხილე გამოეჩინა.
ბონდი კიბეებზე ფრთხილად ადიოდა და, თან სულ უფრო და უფრო ნანობდა, რომ მ-ს იამაიკაში ასეთი ამაყი პასუხი გაუგზავნა. როგორც მოთამაშეს, კარგად ესმოდა, რომ მანევრის თავისუფლების შეზღუდვა შეცდომა იყო, მაგრამ იმასაც ხვდებოდა, რომ მ აღარც მეტის უფლებას მისცემდა და აღარც დააფინანსებდა. მხრები აიჩეჩა, კიბის ავლის შემდეგ დერეფანში შეუხვია და ფრთხილად მივიდა ოთახის კართან.
ჯეიმსმა ზუსტად იცოდა, სად იყო შუქის ასანთები. ერთი მოძრაობით ჩართო სინათლე, კარი ღია დატოვა, ამოიღო იარაღი და სასროლად მომზადებული, წამით გაშეშდა ზღურბლზე. მერე ჩათვალა, რომ საშიში არაფერი იყო. აბაზანის ნახევრად ღია კარს ყურადღება არ მიაქცია, ოთახში შევიდა და კარი გასაღებით ჩაკეტა. ჯერ საწოლთან მდგომი ტორშერი აანთო, შემდეგ სარკის განათება ჩართო და იარაღი ფანჯრის გვერდით მოთავსებულ დივანზე მოისროლა. დაიხარა და დიდი ინტერესით დააკვირდა თავისსავე შავ თმის ღერს, რომელიც ისევ საწერი მაგიდის უჯრაზე შემორჩენილიყო.
ამის შემდეგ ბონდმა შეამჩნია ტალკის ფერმკრთალ კვალი, რომელიც ტანსაცმლის კარადის შიდა სახელურზე იყო დარჩენილი. საეჭვო აღარაფერი იყო. აბაზანაში შევიდა. ფრთხილად ახადა სახურავი უნიტაზის ავზს და წყლის დონეს დააკვირდა. გასვლამდე გაკეთებული მონიშვნის ხაზი და წყლის დონე ერთმანეთს ემთხვეოდა.
ასეთი წვრილმანებისთვის ყურადღების მიქცევა ბონდს სისულელედ სრულებითაც არ მიაჩნდა. ის საიდუმლო აგენტი გახლდათ და საკუთარი პროფესიის დეტალური ცოდნისა და ყურადღების წყალობით იყო ჯერ კიდევ ცოცხალი. საყოფაცხოვრებო დეტალების მუდმივი გადამოწმება მისთვის ისეთივე აზრიანი და მნიშვნელოვანი გახლდათ, როგორც მყვინთავისთვის, გამომცდელი მფრინავისთვის ან ნებისმიერი სხვა კაცისთვის, ვინც ფულს საშიში პროფესიით შოულობს.
ბონდი თავს ძალიან კმაყოფილად გრძნობდა იმის გამო, რომ მის არყოფნაში ოთახში არავინ შესულა. ტანსაცმელი გაიხადა და ცივი შხაპი მიიღო. შემდეგ ამ დღისთვის სიგარეტის მეჩვიდმეტე ღერს მოუკიდა, საწერ მაგიდასთან ჩამოჯდა და თავისი მოგება - ფულის სქელი შეკვრები წინ დაილაგა, ჯიბის პატარა წიგნაკი ამოიღო და რაღაც ციფრები ჩაიწერა. ორი დღის გადაბმული თამაშის შედეგად ზუსტად სამი მილიონი ფრანკი მოიგო. ლონდონიდან ათი მილიონით გამოისტუმრეს, კიდევ ათი წუთი-წუთზე უნდა ჩამოსვლოდა. ამის გათვალისწინებით `კრედიტ ლეონის~ ფილიალში ბონდის მიმდინარე ანგარიშზე ოცდა სამი მილიონი ფრანკი, ანუ სადღაც ოცდასამი ათასი გირვანქა სტერლინგი იდო.
რამდენიმე წუთი ბონდი გაუნძრევლად იჯდა და ფანჯრიდან მუქლურჯ ზღვას გასცქეროდა. შემდეგ ბანკნოტების შეკვრა ბალიშის ქვეშ დადო, კბილები გაიხეხა, შუქი გამორთო და დაწყნარებული შეძვრა უხეშ ფრანგულ თეთრეულში. ათი წუთის მანძილზე ბონდი მარცხენა მხარეს იწვა და დღის განმავლობაში მომხდარ მოვლენებს აანალიზებდა. შემდეგ გადაბრუნდა და გონების კონცენტრირება ძილის გვირაბზე მოახდინა.
მისი ბოლო მოქმედება ბალიშის ქვეშ მარჯვენა ხელის შეცურება და გადაჭრილ ლულიანი, ოცდათვრამეტკალიბრიანი `პოლის პოზიტივის~ შემოწმება იყო. შემდეგ ჩაეძინა. დახუჭული თვალებიდან აღარ გამოდიოდა სითბო და მძინარე ბონდის სახეზე ერთმანეთს ენაცვლებოდნენ ირონიული, ბოროტი და ცივი გამომეტყველებები.


მეორე თავი - დოსიე მ-სთვის


ეს დოსიე მემორანდუმამდე ორი კვირით ადრე სადგურ ს-დან გაუგზავნეს მ-ს, რომელიც მაშინაც და ახლაც ბრიტანეთის თავდაცვის სამინისტროში დაზვერვას ხელმძღვანელობდა:

მ-ს
ს-ს ხელმძღვანელისგან
თემა: ბატონი შიფრეს განადგურების გეგმა (იგი აგრეთვე ცნობილია შემდეგი სახელებით: `ნამბერი~, `ჰერრ ნამბერი~, `ჰერრ ზიფფერი~ და ა.შ.) საფრანგეთში ოპოზიციის ერთ-ერთი მთავარი აგენტი და ასევე საიდუმლო აგენტი ელზასელი მუშების იმ დაჯგუფებისა, რომელსაც კომუნისტური სავაჭრო და ელზასის სატრანსპორტო გაერთიანებები აკონტროლებენ. ჩვენი ინფორმაციით, `მეხუთე კოლონა~, რომელიც საბჭოთა კავშირთან შეჯახების შემთხვევისთვისაა გამიზნული.
დოკუმენტები: ბიოგრაფიების მთავარი არქივიდან შიფრეს ბიოგრაფია იხილეთ დანართში A, აგრეთვე, დანართ B-ში მოცემულია ცნობები `სმერშის~ შესახებ.

ჩვენი ინფორმაციით, ბოლო დროს შიფრეს მძიმე ფინანსური მდგომარეობა აქვს. მიუხედავად იმისა, რომ შიფრე საბჭოთა კავშირის ერთ-ერთი საუკეთესო აგენტია, მაინც გააჩნია სისუსტეები და გამორჩეული გემოვნება ზოგიერთ საკითხში, რაც საშუალებას გვაძლევს დროდადრო უპირატესობა მოვიპოვოთ. მისმა ერთ-ერთმა საყვარელმა ევრო-აზიელმა (ნომერი 1860), რომელიც სადგური ფ-დან იმართება, შიფრეს შიდა სამზარეულოში ჩახედვის საშუალება მოგვცა.
მოკლედ, როგორც ჩანს, შიფრე გაკოტრების პირასაა. როგორც ამას მოწმობს ნომერი 1860, წელს ძვირფასეულობისა და ანტიბზე მდებარე ვილის გასაიდუმლოებული გაყიდვა, აგრეთვე შიფრეს ბოლო პერიოდში გაზრდილი გასავალი, რაც სრულიად განსხვავდება მისი ჩვეული ხარჯებისგან. უფრო დაწვრილებითი ინფორმაცია მოგვაწოდა ჩვენმა კომპანიონმა და მეგობარმა `მეორე ბიურომ~ (რომელთანაც ამ საქმეში აქტიურად ვთანამშრომლობთ). გაერთიანებული ძალებით მეტად საინტერესო ამბავი გამოვააშკარავეთ.
1946 წლის იანვარში შიფრემ ნორმანდიასა და ბრიტანეთში მოქმედ საროსკიპოთა ქსელი შეისყიდა. ეს ქსელი `ყვითელი ბაფთის~ სახელითაა ცნობილი. შიფრე დიდ რისკზე წავიდა და ამ ბიზნესში ორმოცდაათი მილიონი ფრანკი ჩადო იმ ფულიდან, რომელიც მას ლენინგრადის მესამე განყოფილებამ ზემოთაღნიშნული სავაჭრო გაერთიანებისთვის გამოუყო.
სხვა მხრივ, `ყვითელი ბაფთა~ ფულის დაბანდების ძალიან კარგი საშუალება იყო და სრულიად შესაძლებელია, შიფრეს მხოლოდ და მხოლოდ გაერთანების ბიუჯეტის გაზრდა ჰქონდა მიზნად დასახული და დასაქმებულთა ხარჯზე ხელის მოთბობას სულაც არ აპირებდა. მიუხედავად ამისა, შიფრეს პროსტიტუციაში ფულის დაბანდებაზე უკეთესი რამის მოფიქრებაც შეეძლო, რომ არა ავადმყოფური სურვილი საკუთარ განკარგულებაში განუსაზღვრელი რაოდენობის ქალი ჰყოლოდა.
ბედმა ელვისებური სისწრაფით აგებინა პასუხი.
სამი თვეც არ იყო გასული, რომ 13 აპრილს, საფრანგეთმა გამოსცა კანონი ნომერი 46685 - `საროსკიპო სახლების და პროქსენეტიზმის შესახებ~.
(როდესაც მ ამ წინადადებამდე მივიდა, რაღაც წამოიყვირა და სელექტორის ღილაკს დააჭირა თითი.
- ს-ს ხელმძღვანელი ხართ?
- დიახ, სერ.
- პროქსენეტიზმი რა ჯანდაბაა? რას ნიშნავს ეს სიტყვა? - და დაუმარცვლა, - პრო-ქსე-ნე-ტი-ზმი!
- სუტინიორობას, სერ.
- აქ ბერლიცის ენების სკოლა არ გვაქვს, ს-ს ხელმძღვანელო. თუ უცხო სიტყვათა ცოდნის გამომჟღავნებით თავის გამოჩენა გნებავთ, კეთილი ინებეთ და თქვენს მასალებს ლექსიკონიც დაურთეთ თან. თუმცა, უკეთესი იქნება, ინგლისურად თუ დაწერთ.
- მაპატიეთ, სერ.
მ-მ ღილაკიდან თითი აიღო, მემორანდუმს მიუბრუნდა და კითხვა განაგრძო).
ეს კანონი `მარტი რიშარის~ სახელით უფროა ცნობილი. კანონის მიხედვით დაიხურა საეჭვო რეპუტაციის სახლები, აიკრძალა პორნოგრაფიული გამოცემები და შესაბამისად, მსგავსი ფილმების გაქირავებაც. შიფრემ მომენტალურად დაკარგა უზარმაზარი ფული და გაერთიანების ბიუჯეტშიც დიდი სიცარიელე გაჩნდა. შექმნილი რთული სიტუაციის გამოსასწორებლად, შიფრემ საროსკიპოები სასტუმროებად გადააკეთა, რომლებიც `დე პასის~ სახელით იყო ცნობილი და სადაც კანონის ფარგლებში ეწყობოდა გასაიდუმლოებული შეხვედრები. შიფრემ რამდენიმე მიწისქვეშა კინოთეატრი დაიტოვა, მაგრამ ამ ცვლილებებმა მისი დანაკარგები ვერ აანაზღაურა. შიფრეს სურდა ზარალის ფასად მაინც გაეყიდა საკუთრების მცირედი ნაწილი მაინც, მაგრამ ყველა მცდელობა უშედეგოდ დასრულდა. მთელი ამ დროის მანძილზე შიფრეს პოლიცია კვალში ედგა და თორმეტზე მეტი დაწესებულება დალუქა.
პოლიციას შიფრე თავიდან მხოლოდ ისე აინტერესებდა, როგორც საროსკიპოების დიდი ქსელის მეპატრონე. მას შემდეგ კი, რაც ჩვენ `მეორე ბიურო~ საქმის კურსში ჩავაყენეთ, მათ პოლიციის განყოფილებიდან შიფრეს დოსიე მოგვაწოდეს.
აღსანიშნავია ის ფაქტი, რომ პოლიციის დახმარებით, ბოლო რამდენიმე თვის მანძილზე შიფრეს `ყვითელი ბაფთის~ ყველა სახლი დაიხურა და შედეგად, შიფრეს დაწესებულებებიდან არც ერთი არ დარჩა. ფინანსურ პოლიციას კი ნებისმიერ წამს შეუძლია გამოააშკარავოს გაერთიანების ბიუჯეტში ორმოცდაათ მილიონიანი გარღვევა. ყველასათვის ცნობილია, რომ ამ გაერთიანებაში როგორც ფინანსთა განმკარგველი, ასევე მოლარე, თავად შიფრეა.
როგორც ჩანს, შიფრეს ხელმძღვანელები ლენინგრადის მესამე განყოფილებიდან ჯერ არაფერს ეჭვობენ, მაგრამ სრულიად შესაძლებელია, რომ შიფრე უკვე მოხვდა `სმერშის~ თვალსაწიერში. გასულ კვირას სადგურ პ-ს სანდო წყარომ მოგვახსენა, რომ ამ მეტად ოპერატიული ორგანიზაციის ერთ-ერთი მაღალჩინოსანი, აღმოსავლეთ ბერლინის გავლით, უკვე გაემგზავრა ვარშავიდან სტრასბურგში. ეს ორგანიზაცია - `სმერში~ სამშობლოს მოღალატეთა განადგურებაზეა ორიენტირებული. თუმცა, `სმერშის~ აგენტის გამოგზავნის ინფორმაციას არ ადასტურებს `მეორე ბიურო~, არც ძალოვანი სტრუქტურები სტრასბურგში (რომლებზეც დაყრდნობა ყოველთვის შეგვიძლია). აგრეთვე არაფერს გვატყობინებს შიფრეს შტაბბინაც, სადაც ნომერ 1860-ის გარდა, მუშაობს ჩვენი მეორე გამოცდილი ორმაგი აგენტი.
შიფრეს წარმოდგენა რომ ჰქონდეს იმის შესახებ, რომ `სმერში~ კვალში ჩაუდგა ან უმცირესი ეჭვი მაინც აქვთ მასზე, სხვა გზა არ დარჩებოდა და თავის მოკვლა მოუწევდა. უკიდურეს შემთხვევაში, გაქცევას მაინც შეეცდებოდა. მაგრამ, როგორც ჩანს, შიფრე ისეთი სასოწარკვეთილია, რომ ჯერ ვერ ხვდება, როგორი რისკის ქვეშაა მისი სიცოცხლე. სწორედ ამ ვითარების გამო შევიმუშავეთ კონტრ-ოპერაციის პროექტი და გადავწყვიტეთ შემოგვეთავაზებინა ერთობ სარისკო და არასტანდარტული გეგმა, რომელიც მოცემულია მემორანდუმის ბოლოს.
მოკლედ, შიფრეს ჩანაფიქრი მარტივია. როგორც ყველა სასოწარკვეთილი მფლანგველი, ისიც ბევრჯერ ნაცად მეთოდს მიჰყოფს ხელს და აზარტული თამაშების გზით ფულის დაბრუნებას შეეცდება. სხვა ყველა გზა მოჭრილი აქვს: ბირჟაზე აქციების შესყიდვას დიდი დრო სჭირდება, ისევე როგორც, ნარკოტიკებითა და იშვიათი წამლებით უკანონო ვაჭრობას. არც ერთი ტოტალიზატორი არ მიიღებს, შიფრეს რომ სჭირდება, იმხელა ფსონებს, და რომც გაუმართლოს, უფრო რეალურია, რომ ფულის ნაცვლად ტყვია მიიღოს.
ასეა თუ ისე, ჩვენ გვაქვს ინფორმაცია, რომლის თანახმადაც, შიფრემ გაერთიანების ფონდიდან კიდევ ოცდახუთი მილიონი აიღო და ხვალინდელი დღის ჩათვლით, როიალ-ლე-ოს მახლობლად, დიეპის ჩრდილოეთით მდებარე მოკრძალებული ვილა იქირავა ორი კვირით.
ასე რომ, სავსებით მოსალოდნელია, ამ ზაფხულს კაზინო `როიალი~ მსხვილი და მეტად სერიოზული თამაშის მხილველი გახდეს. დიდი მოგების ნახვის მიზნით, საკურორტო კომპანია `როიალმა~, დორვილმა და ტუკემ უკვე გაანთავისუფლა `ბაკარას~ მაგიდა, აგრეთვე `ცხრის~ სათამაშო ორი დიდი მაგიდა და ისინი მუჰამედ ალის დაჯგუფებას დაუთმო. ეს ბანკირებისა და ბიზნესმენების სერიოზული დაჯგუფება ეგვიპტის ემირატებს ეკუთვნის. ჭორებზე დაყრდნობით, მათ განკარგულებაში ყოფილი სამეფო ფონდის ნაწილია. უკვე მრავალი წელია ეს დაჯგუფება ცდილობს მოგება მიიღოს საფრანგეთის უმსხვილესი სათამაშო სახლების შემოსავლების განყოფილებიდან. ამისთვის ისინი მონოპოლური მფლობელების - ზოგრაფოსის და მისი ბერძენი თანამოაზრეების დახმარებას იყენებენ.
შუამავლების შეუმჩნეველი დახმარებით ამ ზაფხულს ამერიკისა და ევროპის უმსხვილესი მოთამაშეები წაახალისეს, რათა მათ ადგილები დაეჯავშნათ კაზინო როიალ-ლეს-ოში. ამდენი ცნობილი მოთამაშის ჩასვლის წყალობით, შესაძლებელია, ამ ძველმოდურმა ადგილმა დაიბრუნოს დიდება, რომლითაც კაზინო ვიქტორიანულ პერიოდში სარგებლობდა.
სანდო წყაროებზე დაყრდნობით მოგახსენებთ, რომ თამაში 15 ივნისს დაიწყება. შიფრე ოცდახუთ მილიონიანი საწყისი კაპიტალით `ბაკარას~ მაგიდაზე ორმოცდაათი მილიონის მოგებას გეგმავს (იქნებ, ამ გზით სიკვდილს გადაურჩეს.)
შემოთავაზებული კონტრ-ოპერაცია:
ვთვლით, რომ ამ ძლევამოსილი საბჭოთაA აგენტის გაკოტრება და განადგურება შედის როგორც ამ ქვეყნის, ასევე ჩრდილოატლანტიკური ორგანიზაციის, `ნატოს~ შემადგენლობაში შემავალი სხვა ქვეყნების ინტერესებში. თუ კომუნისტური სავაჭრო გაერთიანება გაკოტრდება და რეპუტაციას დაკარგავს, ნამდვილად დიდ სარგებელს ვნახავთ. კარგი იქნება, თუ 50 000 კაცის ძალის მქონე, პოტენციური მეხუთე კოლონა, რომელსაც ომის დროს საფრანგეთის ჩრდილო ფრონტის მთლიანად გაკონტროლება შეუძლია, რწმენას დაკარგავს და დანაწევრდება. ეს ყოველივე შესაძლებელი გახდება, თუ შიფრეს სათამაშო მაგიდასთან დამარცხებას მოვახერხებთ (შიფრეს ფიზიკურ განადგურებას აზრი არ აქვს, რადგან ლენინგრადის მესამე განყოფილება ხელს დააფარებს მის ფინანსურ საქმიანობას და შიფრეს უდანაშაულო მსხვერპლად გამოაცხადებს).
ამიტომ, ჩვენ გთავაზობთ საიდუმლო სამსახურის საუკეთესო აზარტულ მოთამაშეს მისცეთ საჭირო ფინანსები და შიფრეს დასამარცხებლად კაზინოში შეაგზავნოთ.
რისკი თავისთავად მაღალია და საიდუმლო ფონდის ზარალის დიდი ალბათობაც არსებობს, მაგრამ ჩვენ აქამდეც გამოგვიყვია დიდი თანხები ისეთი ოპერაციების შესასრულებლად, რომელთა წარმატება უფრო მაღალი რისკის ქვეშ იყო და მიზნადაც გაცილებით უმნიშვნელო რამეს ისახავდა.
თუ თქვენი პასუხი უარყოფითია, ალტერნატიულ გამოსავლად შეგვიძლია ამ საქმის მეორე განყოფილებისთვის ან ვაშინგტონის ცენტრალურ სადაზვერვო სააგენტოში მომუშავე ჩვენი ამერიკელი კოლეგებისთვის გადაცემა შემოგთავაზოთ. ორივე ორგანიზაცია ყოველგვარი ეჭვის გარეშე დაუყოვნებლივ დაიწყებს ოპერაციის განხორციელებას.
ხელს აწერს ს.
--------
დანართი A:
სახელი: შიფრე.
აგრეთვე ცნობილია სახელებით: სიტყვების `ნომერი~ და `ციფრის~ ვარიაციები სხვადასხვა ენებზე; მაგ. `ჰერ ზიფერი~.
წარმოშობა: უცნობია.
პირველად ჩნდება როგორც გერმანულ ბანაკში მცხოვრები, გადაყვანილი პიროვნება. 1945 წელის ივნისში გადაყვანილი იქნა ამერიკულ ზონაში, გერმანიაში. სავარაუდოდ აწუხებდა ამნეზია და ხმის იოგების დამბლა (ორივე შემთხვევაში დასაშვებია სიმულაცია). მკურნალობის ხანგრძლივი კურსის შედეგად ხმა აღუდგა, რაც შეეხება მეხსიერებას, ობიექტი მხოლოდ იმას იხსენებდა, რომ რაღაც აკავშირებდა ელესთან, სადაც 1945 წლის სექტემბერში მოხდა კიდევაც მისი გადაყვანა, როგორც მოქალაქეობის არმქონე პირის. პასპორტის ნომერი 304 596. თვითონ აიღო გვარი შიფრე (რადგან თვლიდა, რომ პასპორტის ნომრის გარეშე, არაფერს წარმოადგენდა). ნათლობის სახელი არ გააჩნია.
ასაკი: დაახლოებით 45 წლის.
აღწერილობა: სიმაღლე - 5 ფუტი და 8 დეიმი. წონა - 18 სტოუნი (ფუტი – 30,5 სმ., დუიმი – 2,54 სმ., სტოუნი – 6,33 სმ. – მთარგმნელის შენიშვნა). სახის ფერი - ძალიან ფერმკრთალი. სუფთად გაპარსული, მოკლედ შეჭრილი თმით. თმა - მოწითალო ყავისფერი. თვალები - ძალიან მუქი ყავისფერი, ფართე გუგებით. პატარა, მეტად ქალური პირი. ჩასმული, საკმაოდ ძვირფასი კბილები. ყურები - პატარა, ფართო ბიბილოებით, რაც ებრაული სისხლის მაჩვენებელია. ხელები - მოკლე, კარგად მოვლილი, თმიანი. ფეხები - პატარა. რასა - ობიექტი სავარაუდოდ ხმელთაშუაზღვისპირელისა და პრუსიელის ან პოლონელის ნაჯვარია. იცვამს გემოვნებით და დიდ ყურადღებას აქცევს დეტალებს. ჩვეულებისამებრ, ორბორტიან კოსტიუმებს ატარებს. ეწევა ბევრს. უპირატესობას ანიჭებს `კაპორალს~. მოიხმარს ნიკოტინის საწინააღმდეგო მუნდშტუკს. ხშირი ინტერვალებით იყენებს ინჰალატორს. ხმა - რბილი და წყნარი. ორენოვანია - ფლობს ფრანგულს და ინგლისურს. კარგად საუბრობს გერმანულად. ოდნავ შეიმჩნევა მარსელური აქცენტი. იშვიათად იღიმება. არასდროს იცინის.
ჩვევები: უყვარს ყველაფერი ძვირფასი, მაგრამ არ ტრაბახობს. აქვს გაძლიერებული და განსაკუთრებული სექსუალური მოთხოვნილებები. არის ჩქაროსნული მანქანების მართვის ექსპერტი. კარგად ფლობს საბრძოლო ხელოვნებას, იარაღს, მათ შორის დანებს. თან მუდმივად ატარებს სამ ბასრ საჭრელს: ქუდის შიგნით, მარცხენა ფეხსაცმელში და პორტსიგარში. იცის ბუღალტერია და მათემატიკა. კარგი აზარტული მოთამაშეა. ყოველთვის ახლავს ორი შეიარაღებული პირადი მცველი. ორივე კარგად ჩაცმული. ერთი - ფრანგი, მეორე - გერმანელი (თუ დაინტერესდებით, შეგვიძლია მათ შესახებ დაწვრილებითი ინფორმაცია მოგაწოდოთ).
შენიშვნა: საბჭოთA კავშირის მნიშვნელოვანი და საშიში აგენტი, რომელსაც პარიზის საშუალებით ლენინგრადის მესამე განყოფილება აკონტროლებს.
ხელს აწერს: არქივარიუსი.
დანართი B:
თემა: `სმერში~.
წყაროები: საკუთარი არქივები, მეორე განყოფილებისა და ვაშინგტონის ცენტრალური სადაზვერო სამსახურის მიერ მოწვდილი მწირი ცნობები.
`სმერში~ არის ორი რუსული სიტყვის ნაერთი: `სმერწ~ და `შპიონამ~, რაც ითარგმნება როგორც `სიკვდილი ჯაშუშებს~.
მოქმედებს `ემ-ვე-დეს~ (ყოფილი `ენ-კა-ვე-დეს~) კონტროლით, ბერიას პირადი მითითებებით.
შტაბბინა: ლენინგრადში (ქვე-სადგური მოსკოვში).
`სმერშის~ მოვალეობას სამშობლოს მოღალატეების განადგურება წარმოადგენს. ისინი საბჭოთა კავშირის საიდუმლო სამსახურის სხვადასხვა განყოფილებებთან და საიდუმლო პოლიციასთან ერთად მოღვაწეობენ, როგორც ქვეყანაში, ისე მის ფარგლებს გარეთ. საბჭოთა კავშირის ყველაზე ძლევამოსილი და საშიში ორგანიზაციაა. ითვლება, რომ აქამდე არც ერთი მისია არ ჩავარდნიათ და ჯერ ვერავინ გაქცევია მის განსაკუთრებული სისასტიკით გამორჩეულ სასჯელს.
სავარაუდოდ, ტროცკის მკვლელობა მექსიკაში (22 აგვისტოს, 1940 წელს) `სმერშის~ საქმიანობას უნდა მივაწეროთ. მას შემდეგ, რაც სხვა რუსმა პიროვნებებმა თუ ორგანიზაციებმა ეს მისია ვერ შეასრულეს, `სმერში~ გამოჩნდა და თავი ამ წარმატებით დაიმკვიდრა.
`სმერშის~ შემდეგი გამოჩენა ემთხვევა ჰიტლერის რუსეთზე იერიშს. 1941 წელს რუსული ძალების უკანდახევის დროს ორგანიზაცია განსაკუთრებით გაფართოვდა, რათა მოღალატეებსა და ორმაგ აგენტებს სათანადოდ გასწორებოდა. იმ დროისთვის `სმერში~ `ენ-კა-ვე-დეს~ აღმასრულებელ გუნდს წარმოადგენდა და საბოლოო მიზანი ჯერ არ ჰქონდა დასახული.
ომის დასრულების შემდეგ ორგანიზაცია უმკაცრესად გაწმინდეს და როგორც გვგონია, ახლა მხოლოდ რამდენიმე ასეული საუკეთესოდ მომზადებული ოპერატიული მუშაკისგან დაკომპლექტებული ხუთი განყოფილებისგან შედგება. ეს განყოფილებებია:
პირველი განყოფილება: პასუხს აგებს კონტრდაზვერვაზე საბჭოთა კავშირის ორგანიზაციებს შორის, როგორც ქვეყანაში, ასევე მის ფარგლებს გარეთ.
მეორე განყოფილება: ევალება ოპერაციების დაგეგმვა, ასევე მათი შესრულება.
მესამე განყოფილება: პასუხისმგებელია ადმინისტრაციასა და ფინანსურ მხარეზე.
მეოთხე განყოფილება: დაკავებულია გამოძიებებითა და სხვა კანონიერი საქმიანობით. მის კომპეტენციაში აგრეთვე შედის კადრები.
მეხუთე განყოფილება: გახლავთ სასამართლო. განყოფილება, რომელსაც განაჩენი გამოაქვს ნებისმიერი მსხვერპლისთვის.
ომის დასრულების შემდეგ `სმერშის~ მხოლოდ ერთი ოპერატიული მუშაკის ხელში ჩაგდება მოვახერხეთ. ეს გახლდათ გოიჩევი. აგრეთვე ცნობილი სახელით გერად-ჯონსი. მან 1948 წლის 7 აგვისტოს ჰაიდ პარკში, იუგოსლავიის საელჩოს ტექნიკურ თანამშრომელ პეჩორას ესროლა. დაკითხვის დროს, ქურთუკის ღილი გადაყლაპა, რომელიც მყარი კალიუმის ციანიდისგან იყო დამზადებული და თავი მოიკლა. მან არაფერი გაგვიმხილა. მხოლოდ ის გვითხრა, რომ `სმერშის~ თანამშრომელი იყო და ამით ძალიან ამაყობდა.
ჩვენ ვვარაუდობთ, რომ `სმერშის~ მსხვერპლი აგრეთვე გახდნენ შემდეგი ბრიტანელი ორმაგი აგენტები: დონოვანი, ჰართროპ-ვაინი, ელიზაბეტ დუმონტი, ვენტნორი, მეისი, სარვინი. (დაწვრილებითი ინფორმაციისთვის იხილეთ არქივი: განყოფილება ქ.)
დასკვნა: ყველა ძალის გამოყენებით უნდა ვეცადოთ და მეტი ინფორმაცია მოვიპოვოთ ამ ძლევამოსილი ორგანიზაციის შესახებ. ვალდებული ვართ, ჩავშალოთ მისი ოპერაციები.


მესამე თავი - ნომერი 007


განყოფილება ს-ს ხელმძღვანელი (საიდუმლო სამსახური, რომელსაც აწუხებდა საბჭოთა კავშირის საკითხი) ისეთი მონდომებული იყო შიფრეს განადგურებაზე, რომ გეგმა თითქმის მარტომ შეიმუშავა, მემორანდუმიც პირადად აიტანა პირქუში შენობის ბოლო სართულზე, საიდანაც ხელისგულივით გადაშლილიყო ხედი რეჯენტს პარკზე. გაიარა მწვანე კარი, გაუყვა დერეფანს და ბოლო კაბინეტს მიადგა.
მან უხეშად შეაბიჯა მ-ს კაბინეტში. მ ახალგაზრდა კაცი იყო, რომელიც ადრე გამნაღმველი იყო და ახლა შტაბის უფროსად დანიშნეს, რასაც მ 1944 წელს მოწყობილი საბოტაჟის დროს წარმოებული ოპერაციის დროს მიყენებულ ჭრილობას უმადლოდა. თან ამ თანამდებობის მიღებამდე შტაბის კომიტეტის ერთ-ერთ მდივნად მუშაობდა. ამ ორი არასახარბიელო შემთხვევის გათვალისწინებით, მ-ს კვლავ შემორჩენოდა იუმორის გრძნობა.
- იცი რა, ბილ. მინდა შეფს რაღაც შევუცურო, როგორ ფიქრობ, კარგ დროს მოვედი?
- შენ რას ფიქრობ, პენი? - ს-ს ხელმძღვანელმა ახლა მ-ს პირად მდივანს ჰკითხა, რომელთანაც ოთახს იყოფდა.
მის მანიპენს ცივი, უმეტყველო და დამცინავი თვალები რომ არ ჰქონოდა, საოცრად მომხიბლავი ქალბატონი იქნებოდა.
- უკეთეს დროს ვერც შეარჩევდით. ამ დილით უცხოეთის სამსახურთან ურთიერთობაში მცირედ გამარჯვებას მიაღწია და თანაც, მომდევნო ნახევარი საათის მანძილზე არავინ ჰყავს დაბარებული, - თქვა პენიმ და უხალისოდ გაუცინა ს-ს ხელმძღვანელს, რომელიც პიროვნულადაც მოსწონდა და ისიც იცოდა, რომ განყოფილება ს ერთ-ერთი ყველაზე მნიშვნელოვანი იყო სისტემაში.
- კარგი, ბილ, ჩაიბარე, - ს-ს ხელმძღვანელმა ბილს სქელი შავი საქაღალდე გადასცა, რომელსაც სრული გასაიდუმლოებულობის ნიშნად თავზე წითელი ვარსკვლავი ეხატა. - ღვთის გულისთვის, როცა გადასცემ, შეეცადე, რომ მონდომება შეგატყოს. და უთხარი, სანამ გაეცნობა, აქ დაველოდები და კოდექსს გადავიკითხავ. შეიძლება, დამატებითი ინფორმაცია დასჭირდეს. ნებისმიერ შემთხვევაში მინდა ორივეს გთხოვოთ, რომ სანამ კითხვას არ დაასრულებს, ყურადღება არაფერზე გადაუტანოთ და არავინ შეუშვათ.
- გასაგებია, სერ, - ბილმა თითი სელექტორის ღილაკს დააჭირა და ფრთხილად დაიხარა მიკროფონისკენ.
- გისმენთ, - მ-ს მშვიდი ხმა გაისმა.
- განყოფილება ს-ს ხელმძღვანელს თქვენთვის გადაუდებელი საბუთები აქვს მოტანილი, სერ.
სიჩუმე ჩამოწვა.
- შემომიტანეთ, - თქვა მ-ს ხმამ.
ბილმა ღილაკს ხელი გაუშვა და ადგა.
- გმადლობ, ბილ. მე აქვე ვიქნები, - თქვა განყოფილება ს-ის ხელმძღვანელმა.
ბილი თავისი ოთახიდან გავიდა და მ-ს კაბინეტისკენ მიმავალი ორმაგი კარი გაიარა. ერთ წუთში უკან გამოვიდა. შესასვლელის თავზე კი პატარა ლურჯი სინათლე აინთო, რაც ყველას აფრთხილებდა, რომ მ-ს შეწუხება დაუშვებელი იყო.



მოგვიანებით, გახარებულმა ს-ს ხელმძღვანელმა თავის მოადგილეს უთხრა:
- მგონი, ბოლო აბზაცში ცოტა გადავაჭარბეთ. მ-მ განაცხადა, რომ ეს ლამის შანტაჟი იყო, თანაც ეს თითქმის სერიოზულად თქვა. მიუხედავად ამისა, ალბათ, დათანხმდება. ამბობს, რომ გიჟური აზრია, მაგრამ ცდად ღირს, თუ, რა თქმა უნდა, ხაზინა არ იქნება უარზე. მ ფიქრობს, რომ დათანხმდება. ის შეეცდება ხაზინის წარმომადგენლები დაარწმუნოს, რომ რუსი დეზერტირი პოლკოვნიკების ორმაგ აგენტებად გადაკეთებაში ფულის გადაყრას, ამ საქმისთვის ფინანსების გამოყოფა სჯობია. ერთ-ორ თვეში ისინი მაინც `ლტოლვილებად~ იქცევიან. თანაც, მ-ს თვითონაც ძალიან უნდა შიფრეს აყვანა. ამისთვის საჭირო კაციც ჰყავს და სურს, რომ ამ საქმეში გამოსცადოს.
- მართლა? ვინ? - ჰკითხა მოადგილემ.
- ერთ-ერთი აგენტი ორნულიანებიდან – მგონი, 007. საკმაოდ ძლიერია. მ კი თვლის, რომ შიფრეს შეიარაღებულ დაცვასთან შეიძლება პრობლემები შეგვექმნას. ალბათ, კარგი მოთამაშეა, თორემ ომის დაწყებამდე ორი თვით ადრე უხილავი მელნითა და მუქი სათვალით კაზინო `მონტე კარლოში~ არ გაუშვებდნენ რუმინული ჯგუფის სათვალთვალოდ. იმ დავალების ბოლოს 007 მარტო რუმინელებით კი არა, მოგებული მილიონი ფრანკით დაბრუნდა. იმ დროს ეს კარგი ფული იყო.



ჯეიმს ბონდის ინტერვიუ მ-სთან ხანმოკლე აღმოჩნდა.
- აბა, რას ფიქრობთ, ბონდ? - ოთახში დაბრუნებულ ბონდს ჰკითხა მ-მ. შემოსვლამდე 007 განყოფილება ს-ს ხელმძღვანელის მემორანდუმს გაეცნო და მთელი ათი წუთი მოსაცდელი ოთახის ფანჯრიდან პარკის ხეებს გაჰყურებდა.
ბონდმა მაგიდის მიღმა ნათელ, ჭკვიან თვალებში ჩახედა.
- ძალიან დამავალეთ, სერ. სიამოვნებით შევასრულებ ამ დავალებას. თუმცა, მოგების გარანტიას ვერ მოგცემთ. `ბაკარაში~, ისევე როგორც `30-40~ -ში თუ თამაში კარგად აეწყო, პატარა ფსონების დადების დროს მოგების ალბათობა დიდია. მაგრამ შეიძლება, პარტია ცუდად წარიმართოს და გამოვვარდე. იქ სერიოზული თამაში იქნება, ვფიქრობ, საწყისი ფსონი ნახევარ მილიონამდე ავა.
ბონდი გაყინულმა თვალებმა შეაჩერა. მ-მ ეს ყველაფერი უკვე მშვენივრად იცოდა. ყველა შანსი ბონდივით ჰქონდა გათვლილი. მ-ს სამსახურიც ზუსტად ეს იყო - ყველაფერი გაეთვალა, გაეშიფრა თავისი და მოწინააღმდეგის შანსები. ბონდმა ინანა, ამაზე რომ წამოიწყო საუბარი.
- პარტია შეიძლება მისთვისაც ცუდად წარიმართოს, - უთხრა მ-მ, - დიდი კაპიტალი გექნებათ, სადღაც ოცდახუთ მილიონამდე. თქვენ და შიფრეს დაახლოებით ერთნაირი თანხა გამოგდით. ათ მილიონს თან გაგატანთ და, როცა საჭიროდ ჩათვლი, მეორე ათსაც გამოგიგზავნით. დარჩენილი ხუთის მოგებას, ვგონებ, თვითონაც შეძლებთ. - მ-მ გაიღიმა. -საშუალება გექნებათ დიდი თამაშის დაწყებამდე რამდენიმე დღით ადრე ჩახვიდეთ `როიალში~ და სიტუაციაში გაერკვეთ ქ-ს დაელაპარაკეთ ოთახების, ვარჯიშის და ყველა საჭირო აღჭურვილობის შესახებ. ფულს ფონდიდან გამოგიყოფთ. `მეორე ბიუროს~ მოველაპარაკები და ისინიც მზადყოფნაში იქნებიან. ეს მათი ტერიტორიაა და გაგვიმართლებს, თუ აყალ-მაყალს არ ატეხენ და მშვიდ სამუშაო ატმოსფეროს შეგვიქმნიან. ვეცდები, `მეორე ბიურო~ მატისის გამოგზავნაზე დავითანხმო. როგორც მახსოვს, მონტე კარლოს კაზინოში მსგავს საქმეზე ერთად კარგად იმუშავეთ. `ნატოს~ აზრი რომ შევიტყოთ, ვაშინგტონსსაც ჩავაყენებ საქმის კურსში. ცენტრალურ სადაზღვევო სამსახურს ერთი-ორი კარგად მომზადებული კაცი ჰყავს ფონტენბლოში, რომლებიც მოკავშირე სადაზვერვო სამსახურებთან თანამშრომლობენ. კიდევ რამე გაინტერესებთ?
ბონდმა უარის ნიშნად თავი გააქნია.
- მატისთან მუშაობა ძალიან მახარებს, სერ.
- ვნახოთ, ვნახოთ. ეცადეთ, გაგიმართლოთ. ყველას წინაშე ნამდვილ სულელებად გამოვჩნდებით, რომ არ გაგიმართლოთ. თან სიფრთხილე გამოიჩინეთ. არ გეგონოთ, რომ ეს რიგითი, იოლად შესასრულებელი დავალებაა. შიფრე ძალიან სერიოზული მოწინააღმდეგეა. სულ ესაა. წარმატებას გისურვებთ.
- გმადლობ, სერ, - თქვა ბონდმა და კარისკენ დაიძრა.
- ერთი წუთით.
ბონდი მობრუნდა.
- ვფიქრობ, თქვენს დასაფარად, კიდევ ერთ აგენტს ჩავრთავ ამ საქმეში, ბონდ. მოგეხსენებათ, ორი თავი ერთს ჯობია. ვინმე დაგჭირდებათ, ჩვენთან კავშირს რომ მიხედოს და კომუნიკაციაზე იყოს პასუხისმგებელი. `როიალში~ დაგიკავშირდებიან და თვითონ შეგატყობინებენ. არ ინერვიულოთ, ვინმე გამოცდილს დაგინიშნავთ.
ბონდს მარტო მუშაობა ერჩია, მაგრამ მ-ს არ შეეკამათა. კაბინეტიდან იმის იმედით გავიდა, რომ კაცი, რომელსაც გაუგზავნიდნენ, ერთგული იქნებოდა. ბონდს მიაჩნდა, რომ მტრებზე გაცილებით უარესი ამბიციურ და სულელ კოლეგებთან მუშაობა იყო.



მეოთხე თავი - მეზობლები

როდესაც ორი კვირის შემდეგ ჯეიმს ბონდმა სასტუმრო `სფლენდიდის~ საკუთარ ოთახში გაიღვიძა, წარსულის ეს რამდენიმე ფრაგმენტი გონებაში გაუცოცხლდა.
ბონდი როიალ-ლეს-ოში წინა დღეს, ჩამოვიდა. ამ დროის მანძილზე მასთან დაკავშირება არავის უცდია. როდესაც კონსიერჟმა სარეგისტრაციო ფურცელზე `იამაიკაზე, პორტ მარიაში მცხოვრები ჯეიმს ბონდი~ ამოიკითხა, მის თვალებში აგენტს განსაკუთრებული დაინტერესება არ შეუნიშნავს.
როგორც ჩანს, მ მაინც და მაინც დაინტერესებული არ იყო ბონდის საქმიანობის დაფარვით.
ბონდი იამაიკას კარგად იცნობდა. სწორედ ამიტომ ითხოვა, მითითებები იამაიკელი კაცისგან მიეღო, რომლის მამამაც ქონება თამბაქოსა და შაქრით ვაჭრობით დააგროვა, ხოლო შვილმა ამ ფულის ბირჟასა და კაზინოებში დახარჯვა არჩია. თუ ვინმე დეტალებით დაინტერესდებოდა, ბონდს შეეძლო კინგსტონში მცხოვრები ჩარლზ დასილვა თავის ადვოკატად წარმოედგინა. ჩარლზ დასილვას კი ყველანაირი ისტორიის სიმართლედ წარმოჩინების იშვიათი უნარი გააჩნდა.
ბონდი ბოლო ორი შუადღისა და აქ გატარებული ღამეების უმრავლესობის მანძილზე კაზინოში იყო. ცდილობდა `რულეტთან~ რთული პროგრესული სისტემებით ეთამაშა მაშინაც, როცა მოგების ძალიან მცირე შანსი ჰქონდა. ყოველთვის, როცა ბონდს სთვაზობდნენ პარტიას დიდი ბანკით, სიამოვნებით თანხმდებოდა. წაგების შემთხვევაში პარტიას მიყვებოდა, თუმცა, ზედიზედ ორი წაგების შემდეგ, უარს ამბობდა.
სასტუმრო `სფლენდიდში~ ცხოვრების მანძილზე ბონდმა ნერვებისა და ინტუიციის სრული მობილიზება მოახდინა და დაახლოებით სამი მილიონი ფრანკიც მოიგო. ამ მოგებაზე მნიშვნელოვანი კი ის იყო, რომ ყველაფერი შეისწავლა. სასტუმროს განლაგება უკვე თვალდახუჭულმა იცოდა. შიფრესთვის თვალთვალიც მოასწრო და თავისთვის სინანულით ჩაინიშნა, რომ შიფრე ერთ-ერთი ყველაზე უბადლო და იღბლიანი მოათამაშეა.
ბონდს კარგი საუზმის მირთმევა უყვარდა. ცივი შხაპის მიღების შემდეგ, ფანჯრის წინ, მაგიდასთან დაჯდა. ცოტა ხნით მშვენიერი ამინდით ტკბებოდა, შემდეგ დიდი ჭიქით ყინულიანი ფორთოხლის წვენი დალია, სამი ნახევრად თოხლო კვერცხი და ბეკონი მიირთვა, შემდეგ ამ ყველაფერს ორმაგი უშაქრო ყავა დააყოლა. ცოტა ხანში ამ დღისთვის სიგარეტის პირველ ღერს მოუკიდა. ბალკანური და თურქული თამბაქოს ნარევს ეწეოდა, რომელიც სპეციალურად ბონდისთვის გროსვენორ სტრიტზე მაღაზია `მორლანდსში~ დაამზადეს. ბონდმა ფანჯარაში ცქერა განაგრძო: პატარა ტალღები ნელა გადმოდიოდნენ გრძელ სანაპიროზე, სათევზაო ნავები წვრილ ხაზად დაძრულიყვნენ დიეპიდან. ნავების ქარავანს თავზე მოვერცხლისფრო თოლიების გუნდი დასტრიალებდა.
ბონდი ფიქრებში იყო ჩაფლული, როცა უეცრად ტელეფონმა დარეკა. ეს კონსიერჟი გახლდათ. მან ჯეიმსს შეატყობინა, რომ ქვევით `რადიო სტენტორის~ წარმომადგენელს ბონდის მიერ პარიზიდან გამოწერილი რადიომიმღები მოეტანა და შემკვეთს ელოდებოდა.
- ჩემთან გამოუშვით, - უპასუხა ჯეიმსმა.
`რადიო სტენტორის~ თანამშრომლის ამბავი `მეორე ბიურომ~ მოიფიქრა, თავიანთი მოკავშირისა და ბონდის შეხვედრა რომ დაეფარათ. ბონდი კარს თვალს არ აცილებდა, იმედი ჰქონდა, რომ ეს მატისი იქნებოდა.
როდესაც მატისი ოთახში შემოვიდა, ჯეიმსის წინ წარსდგა პატივსაცემი ბიზნესმენი, რომელსაც კარგად შეფუთული ოთხკუთხა ნივთი ტყავის სახელურით ეჭირა. ბონდი ძალიან თბილად მიესალმებოდა მატისს, ოთახში შემოსვლისთანავე იმას კარი რომ არ მიეხურა და წარბშეკრული სახით თავისუფალი ხელი რომ არ გაეწოდებინა ჩამოსართმევად.
- ახლახანს ჩამოვედი პარიზიდან, ბატონო. აი, თქვენი შეკვეთა - სუპერჰეტეროდინი, მგონი, ასე უწოდებთ მას ინგლისში. მისი საშუალებით ევროპის ყველა დედაქალაქის გადაცემებს დაიჭერთ. სასტუმროდან ორმოცი მილის რადიუსში არცერთი მიმართულებით მთა არ არის და ტალღებს პრობლემებს არაფერი შეუქმნის.
- მგონი ზუსტად ისაა, რაც მინდოდა, - მიუგო ბონდმა და ტექნიკის ამ საოცრებას ჩაფიქრებულმა შეხედა.
მატისმა ყურადღება არ მიაქცია. ამანათი გახსნა და რადიო მიმღები თაროს ქვეშ მოთავსებული, გამორთული ელექტრობუხრის გვერდით დადო.
- ახლა თორეტი საათია დაწყებული. საშუალო ტალღაზე რომიდან მუსიკალური გადაცემა უნდა გადიოდეს. ევროპაში ტურნეს ატარებენ. არ მგონია, პრობლემა შეიქმნას, მაგრამ მაინც მოდი, მიღება შევამოწმოთ.
მატისმა თვალი ჩაუკრა. ბონდმა შეამჩნია, რომ მატისმა ხმა ბოლომდე აუწია, შორიდან მიღებული ტალღების ღილაკი განათდა, მაგრამ რადიოს ხმა არ ამოუღია.
მატისმა რადიოს უკანა მხარეს რაღაც წაუჩხიკინა და ცოტა ხანში ოთახში საშინელი ხრიალი გაისმა. მატისი ცოტა ხნით კმაყოფილი უყურებდა რადიომიმღებს და შემდეგ ძალინ დამწუხრებული ხმით წარმოთქვა:
- ბატონო, მაპატიეთ, რაღაც ცუდი ჟღერადობა აქვს. - შემდეგ ისევ მიმღების ნაწილებს დაუბრუნდა. რამდენიმე შესწორების შემდეგ, ოთახში ჰაერი ჰარმონიული ფრანგული ფრაზებით გაიჟღინთა. მატისი გაიმართა, ბონდს ზურგზე ხელი წამოარტყა და ხელის ჩამორთმევისას მეორე ხელი იქამდე არ გაუშვა, სანამ ჯეიმსს თითები არ ეტკინა.
ბონდმა გაუღიმა.
- ახლა მითხარი, რაშია საქმე? - ჰკითხა ბონდმა.
- ჩემო ძვირფასო მეგობარო, - მიუგო გახარებულმა მატისმა, - მინდა გითხრა, რომ გისმენენ, ან უფრო სწორედ გისმენდნენ. აი, იქიდან. - მატისმა თითი ჭერისკენ გაიშვირა. - სწორედ ამ წუთას ვინმე ბატონი მუნცი ან მისი ვითომ სურდოთი შეპყრობილი მეუღლე დავაყრუეთ, აბსოლუტურად დავაყრუეთ, რაც, იმედი მაქვს, ნამდვილად არ ესიამოვნათ. - მატისმა ბონდის გამოხედვაში იოლად შესამჩნევ უნდობლობას ღიმილით უპასუხა.
მატისი ლოგინზე ჩამოჯდა და `კაპორალის~ კოლოფის ცერა თითის ფრჩხილით გახსნა დაიწყო. ჯეიმსმა არაფერი უთხრა და მოთმინებით დაელოდა, როდის განაგრძობდა მატისი ახსნას.
მატისი კმაყოფილი იყო იმით, რომ მისმა სიტყვებმა ჯეიმსის გაკვირვება გამოიწვიეს და უეცრად დასერიოზულდა.
- ზუსტად არ ვიცით, ეს როგორ მოხდა. შენი ჩამოსვლის ამბავი `როიალში~ დაბინავებამდე როგორ გაიგეს, მაგრამ ვვარაუდობთ, რომ შენზე აქ ჩამოსვლამდე ორი დღით ადრე გამოვიდნენ. ოპოზიციამ ძალების სრული მობილიზაცია მოახდინა და აქ დაგვხვდა. შენს ზევით მუნცების ოჯახია. ბატონი მუნცი გერმანელია. მისი მეუღლე ცენტრალური ევროპიდანაა, სავარაუდოდ ჩეხი. ხომ იცი, ეს ძველმოდური სასტუმროა და შესაბამისად, ამ ელექტრობუხრების ზევით ცარიელი საკვამურებია. - მატისმა თითი ბუხრის ზემოთ, კედლისკენ გაიშვირა. - ჰოდა, მანდ დამაგრებულია ძალიან ძლიერი რადიო სიგნალების მიმღები. შენი სადენები საკვამურში გადის და პირდაპირ მუნცების ელექტრო ბუხრის უკან ხვდება. მუნცებს მანდ ხმის გამაძლიერებელი უკიდიათ. ოთახში ხმის ჩამწერი და ორი ყურსასმენი აქვთ, რომლის საშუალებითაც ცოლ-ქმარი რიგრიგობით გისმენენ. სწორედ ამიტომ აქვს ქალბატონ მუნცს სურდო. ავადმყოფობა მოიგონა, რომ სულ ოთახში იყოს და გისმინოს. ბატონ მუნცსაც საკვები ოთახში ააქვს ცოლთან და მთელ დროს გარეთ სეირნობისა და ბუნებით დატკბობის ნაცვლად მასთან ატარებს. ამის შესახებ ნაწილობრივ იმიტომ შევიტყვეთ, რომ აქ, საფრანგეთში ყველანი ძალიან ჭკვიანები ვართ და ნაწილობრივ კი იქიდან, რომ უბრალოდ, შენს მოსვლამდე რამდენიმე საათით ადრე ელექტრობუხარი დავშალეთ.
დაეჭვებული ჯეიმსი ელექტრობუხართან მივიდა და ჭანჭიკებს დააკვირდა. მათ ახალი ნაკაწრების კვალი ახლაც ემჩნეოდათ.
- ახლა ჩვენი დადგმა განვაგრძოთ, - თქვა მატისმა. რადიოს მიუახლოვდა, რომელიც `ჰარმონიას~ უქმნიდა სამ მსმენელს და გამორთო.
- კმაყოფილი ბრძანდებით, ბატონო? - ჰკითხა მატისმა. - ხომ კარგად გამოვიდნენ? დამეთანხმეთ, რომ ძალიან კარგი გუნდია. - მატისმა მარჯვენა ხელით ჰაეროვანი მოძრაობა გააკეთა და წარბები აწია.
- ნამდვილად. ისეთი კარგები არიან, რომ პროგრამის ბოლომდე მოსმენის სურვილი გამიჩნდა, - უპასუხა ბონდმა და თან გაეღიმა იმის წარმოდგენაზე, თუ რა სახეებით შეხედავდნენ ახლა ერთმანეთს მუნცები. - თვითონ აპარატიც ბრწყინვალე ჩანს. ზუსტად ისეთია, როგორსაც იამაიკაზე წასაღებად ვეძებდი.
მატისმაც შეთქმულივით გაიღიმა და რადიო იგივე ტალღაზე ჩართო.
- შენ და შენი იამაიკა, - თქვა და ისევ საწოლზე ჩამოჯდა.
ბონდმა სერიოზული სახე მიიღო.
- დაღვრილ რძეზე ტირილს აზრი არ აქვს, - უთხრა მან. - მეორე აგენტის სწრაფად მომაგრებას არც ველოდი, მაგრამ ასე მალე თუ გაგვშიფრავდნენ, არ მეგონა.
ბონდმა პასუხის ძიებაში გონება უშედეგოდ დაძაბა. ნუთუ რუსებმა ჩვენი რომელიმე კოდი გატეხეს? თუ ასეა, შესაძლებელია ბონდს ცენტრიდან ბარგის ჩალაგება და სახლში წასვლაც უბრძანონ. კოდის გაშიფვრა ყველაზე უიმედო სიტუაცია იქნებოდა. ეს ცენტრის გეგმის ბოლომდე `გაშიშვლებას~ ნიშნავდა.
მატისს სახეზე შეეტყო, რომ ჯეიმსის აზრებს კითხულობდა.
- ჯერ ერთი, კოდს ვერც ერთ შემთხვევაში ვერ გაშიფრავდნენ, - მიუგო მან. - და ასეც რომ იყოს, პრობლემა არ არის. ლონდონს დაუყოვნებლივ შევატყობინეთ და მათაც ყველა კოდი შეცვალეს. ისე, მინდა გითხრა, რომ სერიოზული პანიკა გამოვიწვიეთ. - მატისმა ბონდს მეგობრულად გაუღიმა, თუმცა ამ ღიმილში ოდნავი პირველობის შეგრძნება შეიმჩნეოდა, - ახლა საქმეს დავუბრუნდეთ, სანამ ჩვენი კეთილი `კომპანიონების~ მოთმინება ამოიწურება.
- უპირველეს ყოვლისა, - თქვა მატისმა და ღრმა ნაფაზი დაარტყა, - უნდა გაგახარო და მოგახსენო, რომ შენი დამხმარეთი აუცილებლად კმაყოფილი დარჩები. ისეთი მომხიბლავია... - მატისმა სიტყვა `მომხიბლავზე~ ბონდის უკმაყოფილო გამომეტყველება შენიშნა და ნათქვამი გადაასწორა, - ნამდვილად საოცრად მომხიბლავია! - ბონდის ამჟამინდელი რეაქციით კმაყოფილმა მატისმა განაგრძო: - შავი თმა აქვს, ლურჯი თვალები და არაჩვეულებრივი, როგორ გითხრა, ასე ვთქვათ, არაჩვეულებრივი ფორმები. რადიოკავშირის სპეციალისტია და სქესის მიუხედავად, რადიო `სტენტორში~ საუკეთესო თანამშრომელია. ამ სეზონზე რადიომიმღებების გაყიდვის სფეროში ჩემი პირადი თანაშემწეა. - მატისს გაეღიმა. - ჩვენ სასტუმროში ერთად გავჩერდით და ჩემი თანაშემწე სიამოვნებით დაგეხმარება, თუ შენს რადიოს შემთხვევით რამე მოუვიდა. მოგეხსენება, ყველა ხელსაწყოს, თუნდაც საუკეთესო ფრანგულ რადიოს, პირველი ორი დღის მანძილზე სხვადასხვა პრობლემები ექმნება, განსაკუთრებით ღამ-ღამობით. - ბოლო წინადადება მატისმა დაასრულა თუ არა, ჯეიმსს თვალი ჩაუკრა.
ბონდს არაფერი გაკვირვებია.
- ძალიან მაინტერესებს ქალი რისთვის გამომიგზავნეს? მაგათ პიკნიკზე ხომ არ ვგონივარ?
მატისმა გააწყვეტინა.
- დაწყნარდი, ძვირფასო ჯეიმს. ისეთი სერიოზულია, როგორიც შენ გჭირდება და თან ყინულის ლოლუასავით ცივი. ფრანგულად ისე ლაპარაკობს, ფრანგისგან ვერაფრით გაარჩევ, თანაც თავის საქმის ნამდვილი სპეციალისტია. მშვენივრად შეეწყობით ერთმანეთს და შენს დაფარვასაც კარგად მოახერეხებს. ამაზე ბუნებრივი რა შეიძლება იყოს? იამაიკელმა მილიონერმა აქური ლამაზი გოგონა გაიცნო და დაუახლოვდა. - მატისმა მრავლისმეტყველად დაახველა, - თანაც შენი ცხელი სისხლის პატრონი აქ მარტო რომ ყოფილიყავი, ყველას ისევე გაუკვირდებოდა, როგორც შიშველს რომ გევლო.
ბონდმა თავი დაუქნია.
- სხვა ეჭვი ხომ არ გაქვთ? - თავად დაეჭვებულმა ჰკითხა მატისს.
- საინტერესო არაფერია, - უპასუხა მატისმა. - შიფრე თავის ვილაშია გამაგრებული, რომელიც სანაპირო ხაზიდან ათი მილის სავალზე მდებარეობს. თან ორი მცველი ახლავს. ბიჭებს ეტყობათ, რომ საკმაოდ ძლიერები არიან. ერთ-ერთი მათგანი ორი დღის წინ პატარა პანსიონატში ნახეს, სადაც სამ საკმაოდ უცნაურ პიროვნებასთან ერთად მოძრაობდა. შესაძლებელია, ისინიც გუნდის წევრები იყვნენ. მოქალაქეობა არ აქვთ. სავარუდოდ, ჩეხები არიან, თუმცა ჩვენი ერთ-ერთი თანამშრომელი გვარწმუნებს, ბულგარულად ლაპარაკობდნენ. აქ ბევრ ბულგარელს ვერ ნახავ. ცნობილია, რომ მათ ძირითადად თურქების და იუგოსლაველების წინააღმდეგ იყენებენ. დიდი ჭკუით ვერ გამოირჩევიან, მაგრამ მითითებებს ზუსტად ასრულებენ. რუსები ბულგარელებს მარტივი მკვლელობებისთვის იყენებენ. რთულ საქმეებს კი ვერ ანდობენ და არ ავალებენ.
- ძალიან დიდი მადლობა, როგორ დამამშვიდე. ნეტავ, ჩემი მკვლელობის საქმე რომელია? - ღიმილით იკითხა ბონდმა. - დარჩა კიდევ რამე?
- არა. ხვალ ლანჩამდე სასტუმრო `ერმიტაჟის~ ბარში მოდი. შენი და შენი დამხმარის გაცნობას მე მოვაწყობ. საღამოს ვახშამზე დაპატიჟე და ღამით კაზინოში რომ წამოგყვება, უფრო ბუნებრივად გამოჩნდება. მეც იქ ვიქნები, ოღონდ შევეცდები, არ გამოვჩნდე. ჩემთან ერთად ორი თანამშრომელი იქნება და თვალს არ მოგაშორებთ. ჰო, რაც მთავარია, კინაღამ დამავიწყდა მეთქვა, აქ ერთი ამერიკელია, გვარად ლეითერი, ცენტრალური სადაზვერვო სამმართველოდანაა. კარგი ტიპი ჩანს, შეიძლება გამოგვადგეს.
უეცრად, რადიოდან აგრესიული იტალიური წინადადება გაისმა. მატისმა რადიო გამორთო. შემდეგ კიდევ ცოტა ხანს ისაუბრეს ბონდის შენაძენზე და გადახდის ფორმაზე. მატისი ოფიციალური დამშვიდობებისა და ბოლო მეგობრული თვალის ჩაკვრის შემდეგ ოთახიდან გავიდა.
ბონდი ფანჯარასთან ჩამოჯდა და აზრებს თავი მოუყარა. მატისის არცერთი წინადადება არ ჟღერდა იმედისმომცემად. ჯეიმსი დავალების დასაწყისშივე აღმოაჩინეს, თანაც ეს ნამდვილი პროფესიონალების ნახელავი იყო. სრულიად შესაძლებელად და დასაშვებად მიაჩნდა, რომ მანამდე მოეშორებინათ თავიდან, სანამ შიფრეს სათამაშო მაგიდასთან შეხვდებოდა. რუსები მკვლელობების დაგეგმვაში დროს არ კარგავდნენ. ამ არასახარბიელო სიტუაციას ქალის საქმეში ჩართვაც ემატებოდა, რაც ბონდს გულწრფელად აწუხებდა. თვლიდა, რომ ქალები მხოლოდ დასვენებისა და განტვირთვისთვის იყვნენ შექმნილები. საქმეში ქალები სულ ფეხებში ეჩხირებოდნენ. დავალების შესრულების დროს ყველაფერს აფუჭებდნენ სექსით და მათი სასიყვარულო გულისგატეხვები და ემოციური აურა ჯეიმსს თავგზას უბნევდა.
- ბოზი, - თქვა ბონდმა. შემდეგ მუნცები გაახსენდა, ამჯერად უფრო ხმამაღლა და გამოთქმით დაიყვირა ეს სიტყვა, და ოთახიდან გავიდა.


მეხუთე თავი - ქალი შტაბ-ბინიდან

ბონდი რომ სასტუმრო `სფლენდიდიდან~ გამოვიდა, მერიის თავზე დამაგრებული საათი ზუსტად თორმეტს აჩვენებდა. ჰაერი ანანასისა და მიმოზების სურნელით იყო გაჟღენთილი. მოპირდაპირე მხარეს კი კაზინოს ახლადმორწყული ბაღები გახლდათ განლაგებული, სადაც პატარა ქვაფენილიანი გზები მოწესრიგებულად დარგულ ყვავილებში მიმოფანტულიყო. ეს ცოტა არ იყოს ფორმალური დეკორაცია ბალეტს უფრო მოუხდებოდა, ვიდრე მელოდრამას.
მზე იქაურობას სხივებს ჰფენდა. მისი სხივებისგან გამოწვეული მხიარული განწყობა იმაზე მეტყველებდა, რომ ეს პატარა, ძველმოდური კურორტი გრძელვადიანი უმოქმედობის პერიოდის შემდეგ, კვლავ შეძლებდა აღორძინებას და მოდის ახალი ტენდენციისთვის საფუძვლის ჩაყრას.
როიალ-ლეს-ო მდებარეობდა სომთან, იქ, სადაც სწორი სანაპირო ზოლი სამხრეთ პიკარდიის ქვიშიან ნაპირებს უერთდება. ეს უკანასკნელი კი თავის მხრივ ბრეტანის ფრიალო კლდეებამდე და ჰავრამდე გრძელდება. ოდესღაც ამ კურორტმაც ტრუვილის ბედი გაიზიარა.
თავიდან ამ ადგილს უბრალოდ როიალი ერქვა (ო-ს გარეშე) და მეთევზეების პატარა სოფელს წარმოადგენდა. პირველი იმპერიის ხანაში ტრუვილის მსგავსად, ისიც ძალიან მოკლე პერიოდში გადაიქცა ერთ-ერთ ყველაზე მოდურ კურორტად. მაგრამ ისევე, როგორც დუვილმა დაასამარა ტრუვილი, კარგა ხნის მერე, ტუკმა ჩაძირა როიალი.
საუკუნის დასაწყისში, როდესაც საკურორტო ქალაქის საქმეები ძალიან ცუდად მიდიოდა, მაღალ საზოგადოებაში მოდაში შემოვიდა სამკურნალო წყლები. სწორედ ამ დროს როიალის ახლოს მთაში აღმოაჩინეს გოგირდის შემცველი წყალი, რომლის გამოყენებაც სასარგებლო აღმოჩნდა ღვიძლის მკურნალობისთვის. იმის გამო, რომ აბსოლუტურად ყველა ფრანგს ღვიძლთან დაკავშირებული პრობლემები აქვს, როიალი მალე საოცრად პოპულარული გახდა და როიალ-ლეს-ო დაერქვა, რაც როიალს წყალზე ნიშნავს. გარდა ამისა, ბოთლებში როიალის სახელწოდების მინერალური წყალი ჩამოასხეს და ყველა სასტუმროსა თუ რესტორანში შეიტანეს.
თუმცა `როიალმა~ ისეთ ცნობილ მინერალურ წყლებთან კონკურენციას, როგორიცაა `ვიში~, `პერიე~ და `ვიტელი~ დიდხანს ვერ გაუძლო. სასამართლო პროცესების მიმდინარეობის დროს მეპატრონეებმა ფული დაკარგეს და `როიალ-ო~-ს წარმოება ისევ ადგილობრივ ფარგლებში დაბრუნდა. როიალი ზაფხულობით რამდენიმე ფრანგი და იშვაითად, ინგლისური ოჯახების ხარჯზე განაგრძობდა არსებობას. ზამთარში კი სათევზაო ფლოტის იმედზე იყო. ერთ დროს განთქმული მისი კაზინო - ტუკის დიდი კაზინოს სათამაშო მაგიდებზე დარჩენილი ნამცეცებით სულდგმულობდა.
ამ ყველაფრის მიუხედავად, კაზინო `როიალს~ ვიქტორიანული ეპოქის ფუფუნება და დახვეწილობა ახლაც ეტყობოდა. 1950 წელს კაზინო როიალით დაინტერესდა ერთ-ერთი პარიზული დაჯგუფება, რომელიც ემიგრანტი ვიშისტების სერიოზულ ფინანსებს განკარგავდა.
კაზინო მთლიანად გადაახალისეს. შენობა პირვანდელ ფერებში - თეთრსა და ოქროსფერში გადაღებეს. ოთახები მონაცრისფრო ტონებში გადაწყვიტეს და ღვინისფერი ხალიჩებით და ფარდებით გააფორმეს. ჭერებზე დიდებული შანდლებიანი ჭაღები დაკიდეს. ბაღები ფაქტიურად ხელახლა გააშენეს და შადრევნებიც აამუშავეს. სულ მალე თავიდან გაიხსნა ორი გარემონტებული დიდი სასტუმრო `სფლენდიდი~ და `ერმიტაჟი~.
პატარა ქალაქის ძველი პორტის შემოსასვლელშიც კი ეკიდა როიალში მოსაწვევი აბრები. მთავარი ქუჩა გაამხიარულა მაღაზიათა ქსელმა, რომელიც უფასო ადგილებით დაინტერესებულმა პარიზელმა იუველირებმა გახსნეს. იუველირები ყურადღებას არ აქცევდნენ იმ ფაქტს, რომ სეზონი აქ ძალიან მალე მთავრდებოდა და ახალ-ახალ მაღაზიებს ხსნიდნენ.
სწორედ ამ დროს მოიწვიეს მუჰამედ ალის დაჯგუფება, რომელიც პასუხისმგებელი უნდა ყოფილიყო დიდი პარტიების წარმართვაზე კაზინოში. ქალაქის მერს დიდი იმედი ჰქონდა, რომ ოდესმე ტუკი იძულებული გახდებოდა წლების მანძილზე დაგროვილი უზარმაზარი კაპიტალის ნაწილი როიალისთვის დაეთმო.
ამ დიდებული სანახაობის ფონზე იდგა ჩაფიქრებული ბონდი და საკუთარი დავალების ბუნდოვანებაზე ფიქრობდა. მიაჩნდა, რომ მისი როლი ამ დრამაში მოთამაშე სხვა `მსახიობებისათვის~ შეურაცმყოფელი იყო.
ბონდი მხრებში გაიმართა. წამიერი სისუსტით გამოწვეული აზრები გონებიდან განდევნა, სასტუმროსკენ მიბრუნდა და ესტაკადით მანქანების მიწისქვეშა სადგომში ჩავიდა. `ერმიტაჟში~ დანიშნულ პაემანზე გამოცხადებამდე სანაპიროზე მანქანით გასეირნება გადაწყვიტა. თან შიფრეს ვილის შეთვალიერება ჰქონდა ჩაფიქრებული. უკან დაბრუნება კი პარიზში მიმავალი მეორე მაგისტრალით გადაწყვიტა.
ბონდის ერთადერთი პირადი ჰობი მანქანა იყო. 1933 წელს მან `ბენტლის~ ერთ-ერთი უკანასკნელი მოდელი შეიძინა, რომელსაც ამჰერსტ ვილიერსის ტურბოგამბერი ჰქონდა. ომის მიმდინარეობის პერიოდში ბონდს ის უსაფრთხო ადგილას ჰყავდა დამალული და ყოველწლიურად ბენტლის ქარხნის მექანიკოსს ამოწმებინებდა. ეს მექანიკოსი ბონდის ჩელსიში მდებარე სახლის ახლოს მუშაობდა და მანქანას ისე უვლიდა, რომ ოჯახის წევრსაც კი შეშურდებოდა. ბონდს `ბენტლის~ მართვა შესისხლხორცებული ჰქონდა და მისგან თითქმის ფიზიკურ სიამოვნებას იღებდა. ბონდის ბენტლი ფოლადისფერი იყო, კუპე, გადასახდელი სახურავით და საათში ოთხმოცდაათ მილს ავითარებდა. რეზერვში კიდევ ოცდაათ მილამდე ჰქონდა.
ბონდმა თავისი ბენტლი მანქანების სადგომიდან გამოიყვანა, ესტაკადაზე გაიქროლა და რამდენიმე წამში უკვე ჩამწკრივებულ ხეებიან ბულვარში მიქროდა. შემდეგ პატარა ქალაქის ხალხმრავალი მთავარი ქუჩა გაიარა და სამხრეთის ქვიშიან სანაპიროს გაუყვა.
ერთი საათის შემდეგ ჯეიმსი სასტუმრო `ერმიტაჟში~ მივიდა და მაგიდა ფანჯარასთან შეუკვეთა.
`ერმიტაჟის~ დარბაზი ზემამაკაცური აქსესუარების გამოფენას მოგაგონებდათ. აქ ყველა წვრილმანი იყო თავმოყრილი, რისგანაც ფრანგების აზრით ფუფუნება შედგება: დახვეწილი ჩიბუხები, პატრონის ფეხებთან ხვეულთმიანი ტერიერები. ირგვლივ ყველაფერი ძვირფას, წითელ ხესა და ტყავში იყო ჩასმული. ფარდები და ხალიჩები სამეფო ლურჯში გადაეწყვიტათ. მიმტანებს ზოლიანი ჟილეტები ეცვათ და მწვანე წინსაფრები ეკეთათ. ბონდმა `ამერიკანო~ შეუკვეთა და ფრთხილად დაიწყო სტუმრების დათვალიერება. შეამჩნია, რომ ყველა ერთნაირად იყო ჩაცმული - ელეგანტურად, თუმცა ზომიერების შეგრძნება ყველას დაკარგული ჰქონდა. როგორც ეტყობოდა, საზოგადოების უმრავლესობა პარიზიდან იყო. ყველა გამალებული საუბრობდა, ალბათ, რაიმე ძალიან მნიშვნელოვან თემებზე. ეს ყველაფერი აპერეტივის დროს ბარისთვის ტრადიციულ სიტუაციას წარმოადგენდა.
მამაკაცები განუწყვეტლივ უკვეთავდნენ შამპანურის ბოთლის მეოთხედებს, ქალები კი - მშრალ მარტინის სვამდნენ.
- ვაღმერთებ `დრაის~, - წამოიძახა მხიარულსახიანმა ქალბატონმა მეზობელი მაგიდიდან.
- რაღა თქმა უნდა, `დრაი~ არაჩვეულებრივია, ოღონდ `გორდონით~, - უპასუხა თანმხლებმა მამაკაცმა, რომელსაც სეზონისთვის ოდნავ შეუფერებელი ტვიდის კოსტიუმი ეცვა, ხელები უძვირფასეს ხელჯოხზე შემოეწყო და ქალბატონს სიმპათიით აღსავსე წყლიანი, ყავისფერი თვალებით შესცქეროდა.
- გეთანხმები, დეიზი, და სულ ცოტა ლიმონის წვენიც...
ბონდის ყურადღება ქუჩაში ტროტუარზე მდგომმა მატისის პროფილმა მიიპყრო. ნაცრისფერში ჩაცმული მომხიბლავი ახალგაზრდა ქალბატონი ახლდა. მატისს ქალისთვის ხელკავი ჰქონდა გაყრილი და თანმხლების ნაზი ხელი გულთან ახლოს ეჭირა. ამის მიუხედავად, ბონდმა ჩათვალა, რომ მათ რაღაც აკლდათ. ქალის გულგრილი გამომეტყველება სწორედ ის დეტალი იყო, რაც გაფიქრებინებდათ, რომ ისინი ერთმანეთთან არაფრით დაკავშირებული ორი ადამიანი უფრო იყო, ვიდრე წყვილი. ბონდმა დაინახა როგორ შემოვიდნენ მატისი და მისი თანმხლები ბარში, მაგრამ თამაშის წესების გათვალისწინებით, არაფერი შეიმჩნია და გამვლელების თვალიერება განაგრძო.
- ნუთუ ეს მართლა ბატონი ბონდია?! - ბონდს ზურგიდან მატისის გახარებული ხმა შემოესმა. ბონდი განზრახ აღელდა და ფეხზე წამოდგა. - ვერ დავიჯერებ, რომ მარტო ბრძანდებით! ვინმეს ელოდებით? ნება მიბოძეთ, ჩემი კოლეგა მადმუაზელ ლინდი წარმოგიდგინოთ. ძვირფასო, ეს ის ბატონია იამაიკიდან, დღეს დილით შეკვეთა რომ მივართვი ნომერში.
ბონდმა ქალბატონს თავი დაუკრა და მიუგო:
- ძალიან სასიამოვნოა თქვენი გაცნობა, მისს ლინდ, - მატისს კი შემონახული მეგობრული ღიმილით გაუღიმა. - მარტო გახლავართ. თუ სურვილი გექნებათ, შემომიერთდით.
ჯეიმსმა ლინდს სკამი გამოუწია. სანამ მატისი და ლინდი მაგიდასთან მოთავსდებოდნენ, ბონდმა მიმტანს დაუძახა და მატისის დიდი წინააღმდეგობის მიუხედავად, კონიაკი და ქალბატონისთვის `ბაკარდი~ შეუკვეთა.
მატისმა და ბონდმა ხმამაღლა მიმოიხილეს ამინდი და როიალ-ლეს-ოს აღორძინების პერსპექტივები. ლინდი ჩუმად იჯდა. მან აიღო ბონდის შეთავაზებული სიგარეტი. გასინჯა, თამბაქო შეაქო და მოწევა განსაკუთრებული აღფრთოვანების გარეშე განაგრძო. ქალბატონი ღრმა, თუმცა იშვიათ ნაფაზებს არტყამდა. კვამლს ტუჩებიდან და ნესტოებიდან მალ-მალე უშვებდა. ყველა მოძრაობა მოზომილი, თავისუფალი, ზუსტი და აუღელვებელი ჰქონდა. ბონდმა ლინდის საქციელში საკუთარი თავით ტკბობის მცირედი ნაპერწკალიც კი ვერ შეამჩნია.
მატისის თანამგზავრმა ჯეიმსზე კარგი შთაბეჭდილება მოახდინა. მატისთან საუბრის ყოველ წამს ბონდი ქალბატონისკენ ტრიალდებოდა და თავაზიანი ღიმილით დიალოგში ჩართვისკენ მოუწოდებდა. თან ყოველ მიტრიალებაზე თავის პირველი შთაბეჭდილების სისწორეში რწმუნდებოდა.
მის ლინდს ძალიან მუქი შავი თმა ჰქონდა, რომელიც წინ ოდნავ ფარავდა დახვეწილ ნიკაპს, სახის ლამაზ მოყვანილობას მოყვებოდა და უკან გრძლად და სწორედ ეფინებოდა მხრებზე. მიუხედავად იმისა, რომ ლინდის თმა საკმაოდ მძიმე იყო, თითოეულ მოძრაობაზე მაინც სახეზე ეყრებოდა, მაგრამ ის ყურადღებას საერთოდ არ აქცევდა. მის ლინდის ერთმანეთისგან შორს განლაგებული მუქი ლურჯი თვალები ჰქონდა, რომლებიც გულწრფელ მზერას უბრუნებდნენ ბონდს. თუმცა, ჯეიმსი მათში ირონიის ნაპერწკალსა და მისდამი ინტერესის დეფიციტს მაინც გრძნობდა. ეს იმდენად აღიზიანებდა, რომ ლინდის დამოკიდებულების გაქარწყლების სურვილი უჩნდებოდა. მზისგან ოდნავ ფერშეცვლილ სახეზე მაკიაჟს თითქმის ვერ ნახავდით. მხოლოდ ლინდის ფართო და მგრძნობიარე ტუჩები წარმოადგენდნენ გამონაკლისს. მის ლინდს მოკლედდაჭრილი, ულაქო ფრჩხილები ჰქონდა, რაც მის თავშეკავებულობაზე მეტყველებდა. ქალბატონის თავდაჭერილობას ხაზს მისი მოშიშვლებული მკლავებიც და თლილი ხელებიც უსვამდა, რომლებიც დიდ შთაბეჭდილებას ახდენდნენ ირგვლივმყოფებზე. მის ლინდს ყელზე ბრტყელშესაკრავიანი ოქროს სადა ყელსაბამი ეკეთა, მარჯვენა ხელის მეოთხე თითზე კი - განიერი ტოპაზის ბეჭედი. ნაცრისფერი, საშუალო სიგრძის აბრეშუმის კაბის ერთადერთი აქსესუარი სამინჩიანი სქელი შავი ქამარი იყო, რომელიც ისე ჰქონდა ტანზე მორგებული, რომ მისი ლამაზი მკერდი შეუმჩნეველი ვერ დაგრჩებოდათ. ქალბატონს ქამრის შესაფერისი შავი პატარა ხელჩანთა ჰქონდა. გვერდით სკამზე კი ოქროსფერი ჩალის ქუდი ედო, რომელსაც უკან ბაფთად შეკრული შავი ველვეტის ლენტი დაჰყვებოდა. ფეხზე კი ოდნავ ძველმოდური შავი უბრალო ტყავისგან შეკერილი ფეხსაცმელი ეცვა.
ბონდი მოხიბლა ლინდის სილამაზემ და დააინტრიგა მისმა გაწონასწორებულობამ. ჯეიმსს ლინდთან ერთად წყვილში მუშაობა უკვე სასიამოვნო ფაქტად ეჩვენებოდა. უეცრად, ბონდი რაღაცაზე აღელდა და თითებით მაგიდაზე დააკაკუნა.
მატისს ბონდის განწყობა შეუმჩნეველი არ დარჩენია. ის ცოტა ხანში წამოდგა.
- მაპატიეთ, - თანმხლებ ქალბატონს მიმართა მატისმა, - სასწრაფოდ უნდა დავრეკო დუბერნში, ამ საღამოს შეხვედრა უნდა დავნიშნო. იმედი მაქვს, წინააღმდეგი არ იქნებით, თუ ამ საღამოს გატარება ჩემს გარეშე მოგიწევთ.
ლინდმა თავი გააქნია.
ბონდი მინიშნებას მიხვდა და როგორც კი მატისი ტელეფონისკენ წავიდა, ბართან ჩამოდგა და ლინდს მიუგო:
- თუ დღეს მარტო რჩებით, იქნებ ჩემთან ერთად გევახშმათ?
ლინდმა გაიღიმა და ჯეიმსმა პირველად შენიშნა მის ღიმილში კონსპირაციის ნაპერწკალი.
- სიამოვნებით ვივახშმებ თქვენთან ერთად. მერე იქნებ კაზინოშიც წამიყვანოთ. ბატონი მატისი ამბობს, რომ იქ თავს ისე გრძნობთ, როგორც სახლში. ვინ იცის, იქნებ მეც იღბალი მოგიტანოთ.
მატისის არყოფნისას ბონდმა უეცრად ლინდისგან უფრო თბილი დამოკიდებულება იგრძნო. როგორც ჩანს, ლინდმა გააანალიზა, რომ ისინი ერთი გუნდის წევრები იყვნენ. შეხვედრის დეტალების გარკვევისას, ჯეიმსი მიხვდა, რომ ამის შემდეგ თავის გეგმებს უფრო იოლად განახორციელებდა. ბონდმა აღმოაჩინა, რომ ლინდი თავისი როლით აღფრთოვანებული და დაინტერესებული იყო და მასთან მუშაობა გაუადვილდებოდა. ჯეიმსს წარმოდგენილი ქონდა, რომ ურთიერთობის დამყარებამდე ბევრ სირთულეს წააწყდებოდა, მაგრამ ამ ქალბატონთან შეხვედრის შემდეგ უკვე იცოდა, რომ ახლა პირდაპირ საქმიან დეტალებზე შეეძლო გადასვლა. ბონდი საკუთარ თავთან სრულიად გულწრფელი იყო და აღიარებდა, რომ ლინდს ისე უყურებდა, როგორც ქალს და მასთან დაწოლაც ძალიან უნდოდა, ოღონდ დავალების შესრულების შემდეგ.
როგორც კი მატისი მაგიდასთან დაბრუნდა, ბონდმა ანგარიში მოითხოვა. წასვლა იმით ახსნა, რომ სასტუმროში ლანჩზე მეგობრები ელოდებოდნენ. როცა წასვლის წინ ჯეიმსმა ლინდის ხელი წუთით დაიჭირა, მათ შორის სიმპათიამ და ურთიერთგაგებამ დაისადგურა, რაც სულ რაღაც ნახევარი საათის წინ ასე წარმოუდგენლად მიაჩნდა.
ლინდმა ჯეიმსს მზერა ბულვარამდე გააყოლა.
მატისმა სკამი ლინდისკენ მიწია და ჩუმად უთხრა:
- ეს ჩემი ძალიან ახლო მეგობარია. მოხარული ვარ, რომ ერთმანეთი გაიცანით. უკვე ვგრძნობ ორი გაყინული მდინარის ყინულები როგორ დაიძრა. - და მატისს გაეცინა: -არასდროს მინახავს გამლღვალი ბონდი. ასე თუ მოხდა, მისთვის სასარგებლო გამოცდილება იქნება. სხვათაშორის, თქვენთვისაც.
ლინდმა პირდაპირ არ უპასუხა.
- ბატონი ბონდი ძალიან სიმპათიურია. რაღაცით ჰოგი ქარმიშელს მაგონებს, თუმცა მის გარეგნობაში რაღაც ცივი და ბოროტია...
ლინდმა წინადადება ვერ დაასრულა, რადგან მათ გვერდით ფანჯარა აფეთქებისგან ჩაიმსხვრა. აფეთქების ტალღა ისეთი ძლიერი იყო, რომ ორივე სკამებზე ააკრა. წამიერი სიჩუმე ჩამოწვა. შემდეგ ბარის უკან მდებარე თაროებიდან ბოთლებმა დაიწყეს ცვენა. მერე ყვირილი ატყდა და ყველა გასასვლელს მიაწყდა.
- აქ დარჩით, - თქვა მატისმა
მატისმა სკამის გასროლით გზა გაინთავისუფლა და დაცარიელებული ფანჯრის ჩარჩოდან ტროტუარზე გადახტა.



მეექვსე თავი - ორი ჩალისშლაპიანი მამაკაცი


ბარიდან გასული ბონდი ბულვარის ქვაფენილიანი გზით სასტუმროსკენ წავიდა. `სფლენდიდი~ ბარიდან რამდენიმე მეტრში მდებარეობდა. ბონდი შიმშილის შეგრძნებამ შეაწუხა.
ისევ მშვენიერი ამინდი იყო. მართალია, მზე უფრო ძლიერად აცხუნებდა, მაგრამ ბულვარის მწკრივში დარგული ფიჭვის ხეების ქვეშ საკმაოდ გრილოდა.
ქუჩაში ბევრი ხალხი არ იყო და ამიტომ ბულვარის მეორე მხარეს ხის ჩრდილში ჩუმად მდგომი ორი კაცი ჯეიმსს მაშინვე მოხვდა თვალში.
ბონდმა კაცები ასი იარდის დისტანციაზე დაინახა. უცნობებს სასტუმრო `სფლენდიდისგან~ ზუსტად ამხელა მანძილი აშორებდათ.
ჯეიმსმა მათ გარეგნობაში რამდენიმე საეჭვო დეტალი მაშინვე შეამჩნია. ორივე მომცრო ტანისა იყო და მუქი ფერის კოსტიუმები ეცვათ, რაც ბონდს ამინდისთვის შეუფერებლად მოეჩვენა. ორივე კომიკოს მსახიობს ჰგავდა, დათქმულ ადგილას თეატრში წასასვლელად ავტობუსს რომ ელოდებიან ხოლმე. ორივე მათგანს კურორტის სადღესასწაულო განწყობის შესაბამისად შავ ლენტიანი ჩალის შლაპები ეხურა. ქუდები და ხე, რომლის ქვეშაც უცნობები იდგნენ, მათი არასასიამოვნო სახეების ნაკვთებს ფარავდნენ. ორივეს მხარზე ფოტოაპარტის ჭრელი ბედეები ჰქონდათ გადაკიდებული, რომლებიც მათ ჩაცმულობას სრულებით არ შეეფერებოდა. ერთი მამაკაცის ფოტოაპარატის ბუდე კაშკაშა წითელი იყო, მეორესი კი - ცისფერი.
სანამ ბონდმა ეს წვრილმანები გააანალიზა, უცნობებს ორმოცდაათი იარდით მიუახლოვდა. ჯეიმსი აუღელვებლად ფიქრობდა, როგორი ტიპის იარაღი შეიძლებოდა ჰქონოდათ და რომლისგან როგორ დაეცვა თავი. სწორედ ამ დროს მის თვალწინ ასეთი სცენა გათამაშდა:
წითელმა ფოტოაპარატიანმა კაცმა თითქოს შეუმჩნევლად დაუქნია თავი ლურჯ ფოტოაპარატიანს. ის მაშინვე დაიხარა, ფოტოაპარატი მოიხსნა და თითქოს რაღაცის დარეგულირება დაიწყო. კონკრეტულად რას აკეთებდა, ბონდმა ვერ დაინახა, რადგან დიდი ხე ეფარებოდა. უეცრად, ჯეიმსმა თეთრი დამაბრმავებელი სინათლე დაინახა, რასაც გამაყრუებელი აფეთქების ხმა მოჰყვა. მიუხედავად იმისა, რომ ბონდსა და აფეთქების ტალღას შორის ხეები იყო, ცხელი ჰაერის ნაკადმა ჯეიმსი ისე აიტაცა, როგორც ქაღალდის ნაკუწი და სახით ტროტუარზე დაანარცხა. ბონდი გადმოტრიალდა და თვალი მზეზე გაუშტერდა. ასე გაუნძრევლად იწვა, სანამ ჰაერი ზედ ისე გადაუვლიდა, როგორც როიალის კლავიშებს ურო (ყოველ შემთხვევაში, ასე ეჩვენებოდა).
როდესაც დაყრუებული, გონების დაკარგვას ძლივს გადარჩენილი ბონდი ცალ მუხლზე წამოდგა, ხორცის ნაჭრების და სისხლიანი ტანსაცმლის ნაკუწების წვიმა წამოვიდა. რასაც ტოტების, წიწვებისა და ფოთლების ცვენა მოჰყვა. ყველა მხრიდან შუშის ნამტვრევები იყრებოდა. ჯეიმსმა ზევით აიხედა და შავი კვამლის სოკო დაინახა, რომელიც ნელ-ნელა იშლებოდა. ყველგან აფეთქების თანამდევი სუნი იდგა - დამწვარი ხის და შემწვარი ხორცის. ორმოცდაათი მეტრის რადიუსში არც ერთ ხეს არ შერჩენოდა ფოთოლი. ბევრიც დაიწვა. ბულვარის მეორე მხარეს ორი ფესვებიანად ამოგლეჯილი ხე ეგდო. მათ შორის ჯერ კიდევ ენთო ცეცხლი. იმ ორი ჩალის ქუდიანი კაცის კვალიც კი აღარსად ჩანდა. სამაგიეროდ, ქუჩაში, ტროტუარებზე და ხის მაღალ ტოტებზეც სისხლის წვეთები იყო.
ბონდს გულის რევის შეგრძნება დაეუფლა.
მატისმა პირველმა მიირბინა ჯეიმსთან. ამ დროისთვის ბონდი წამომდგარიყო და იმ ხეს ეყრდნობოდა, რომელმაც სიცოცხლე შეუნარჩუნა.
გაოგნებული, თუმცა უვნებელი ბონდი ჯერ კიდევ შოკში იყო. მატისს უხმოდ დართო ნება სასტუმროში წაეყვანა, საიდანაც აკივლებული ხალხი ქუჩაში გამორბოდა. როცა ბონდმა და მატისმა სასწრაფო დახმარებისა და პოლიციის სირენების ხმა მოესმათ, ნაბიჯი ააჩქარეს, ბრბო აქეთ-იქით გაწიეს და ბონდის ოთახში ავიდნენ.
შესვლის შემდეგ მატისი ერთი წამით გაჩუმდა, ბუხრის გვერდით მოთავსებული რადიო ჩართო და ჯეიმსს გასისხლიანებული ტანსაცმლის გახდაც არ აცადა, ისე დაატეხა თავს კითხვების ზღვა.
როდესაც ბონდმა იმ ორი კაცის აღწერა დაიწყო, მატისი მაშინვე საწოლის გვერდით მდებარე ტელეფონს ეცა.
- ...პოლიციას გადაეცით, რომ აფეთქების შედეგად დაზარალებული, იამაიკიდან ჩამოსული ინგლისელი ჯენტლმენი თავს კარგად გრძნობს. მას მე მოვუვლი. არავინ შეაწუხოს. პრესას შეატყობინეთ, რომ ეს, უბრალოდ, ორი ბულგარელის ვენდეტა იყო, რომლის შედეგადაც ერთმა მეორე ბომბის საშუალებით გაანადგურა. მესამე ბულგარელის შესახებ ნურაფერს იტყვით. ის ჩვენ უნდა მოვძებნოთ, სადმე ახლოს იქნება. ალბათ, პარიზში გამგზავრებას შეეცდებოდა. სასწრაფოდ გადაკეტეთ ყველა გზა. გასაგებია? წარმატებას გისურვებთ.
მატისი ბონდს მიუბრუნდა და ამბავი ბოლომდე მოისმინა.
- ღმერთო ჩემო, ჯეიმს, ძალიან გაგიმართლა! - თქვა ფრანგმა, როცა ბონდმა თხრობა დაასრულა, - ცხადია, ბომბი შენთვის იყო განკუთვნილი. ალბათ, ბომბის სროლას და ხეს ამოფარებას აპირებდნენ, მაგრამ რაღაც ვერ გამოუვიდათ. დეტალებს გამოვიძიებთ... - მატისი ჩაფიქრდა. - და მაინც რა საინტერესოა, ასე აპირებენ შენს განადგურებას? - მატისმა თავი შეურაცყოფილად იგრძნო. - ძალიან მაინტერესებს, ეს ბულგარელები მერე როგორ აპირებდნენ გაქცევას? ან იმ წითელ და ლურჯ ფოტოაპარატებს რა დანიშნულება ჰქონდათ? ძალიან უნდა მოვინდომოთ და წითელი ფოტოაპარატიანის რამე ნარჩენი უნდა ვიპოვოთ.
მატისმა ფრჩხილების კვნეტა დაიწყო. ძალიან აღელვებული იყო და თვალები უელავდა. ეს საქმე უკვე შემაშფოთებელ და დრამატულ სახეს იღებდა. ფრანგი კი ამ საქმით უკვე პიროვნულად იყო დაინტერესებული. ეს გაცილებით მეტს ნიშნავდა მისთვის, ვიდრე უბრალოდ, ბონდის ქურთუკის დაჭერა, სანამ ის თავის ანგარიშებს გაასწორებდა შიფრესთან. მატისი წამოხტა.
- ახლა რამე დალიე, ისადილე და კარგად დაისვენე, - ბრძანებითი კილოთი უთხრა ბონდს. - მე კი წავალ და ამ საქმეს მივხედავ, სანამ პოლიციელებმა თავიანთი დიდი შავი ფეხსაცმელებით დანაშაულის კვალი არ აატალახეს.
მატისმა რადიო გამორთო, ბონდს მეგობრულად დაუქნია ხელი და კარი გაიჯახუნა. ამის შემდეგ ოთახში სიჩუმე ჩამოწვა. ბონდი ფანჯარასთან ჩამოჯდა და გადაწყვიტა დამტკბარიყო იმით, რომ ცოცხალი გადარჩა.
გაუზავებელ ვისკის სვამდა ყინულით და სიამოვნებით უყურებდა პაშტეტით და მაიონეზიანი ლანგუსტებით დამშვენებულ ლანგარს, რომელსაც მიმტანი მის წინ დებდა. სწორედ ამ დროს ტელეფონმა დარეკა.
- ქალბატონი ლინდი გირეკავთ.
ჩუმი, აღელვებული ხმა გაისმა:
- თავს როგორ გრძნობთ?
- გმადლობ, კარგად ვარ.
- მიხარია ამის გაგება. ძალიან გთხოვთ, თავს გაუფრთხილდით.
ლინდმა ყურმილი დაკიდა.
ბონდი გონს მოეგო. დანა აიღო და ტოსტის ყველაზე სქელი ნაჭერი შეარჩია.
უეცრად გაიფიქრა: მოწინააღმდეგის მხარეს ორი კაცი დააკლდა, მე - ერთი შემემატა. დასაწყისისთვის ცუდი არ არის.
ჯეიმსმა დანა ცხელი წყლით სავსე ჭიქაში ჩაუშვა, რომელიც სტრასბურგული ფაიფურის ლარნაკის გვერდით იდგა და გაიფიქრა, რომ მიმტანი ასეთი განსაკუთრებული სადილისთვის ორმაგ გასამრჯელოს იმსახურებდა.



მეშვიდე თავი - წითელი და შავი


ბონდმა იცოდა, რომ თამაში, რომელიც ამ საღამოს უნდა დაწყებულიყო, შეიძლებოდა მთელი ღამე გაგრძელებულიყო და უნდოდა, დასვენებული ყოფილიყო. ამიტომ სამი საათისთვის მასაჟისტი გამოიძახა. როდესაც მაგიდა აალაგეს, ბონდი ფანჯარასთან გადაჯდა და ზღვის ცქერით იქმდე ტკბებოდა, სანამ კარზე დააკაკუნებდნენ. კარი გაიღო და ჯეიმსის წინ შვედი მასაჟისტი წარსდგა.
მან უხმოდ დაიწყო მუშაობა. მასაჟი ბონდის ფეხებიდან დაიწყო და კისრამდე ავიდა. ჯეიმსი გრძნობდა, როგორ ქრებოდა დაძაბულობა მის სხეულში და უწყნარდებოდა ჯერ კიდევ ათრთოლებული ნერვები. ისე მოდუნდა, რომ მარცხენა მხარზე და ფერდზე რომ გრძელი, წითელი იარები ჰქონდა, ისიც კი აღარ აწუხებდა. მასაჟისტი რომ წავიდა, ბონდს ღრმა ძილით ჩაეძინა.
საღამოს ბონდმა კარგად გამოძინებულმა და დასვენებულმა გაიღვიძა.
ცივი შხაპის მიღების შემდეგ ჯეიმსი კაზინოში წავიდა. იცოდა, რომ გადაბმული თამაშის შედეგად მოთამაშეები თამაშის შეგრძნებას კარგავდნენ. კონცენტრირება უნდა მოეხდინა და აღედგინა ის მთავარი თვისება, რომელიც ესოდენ მნიშვნელოვანია ყველა მოგებაზე ორიენტირებული მოთამაშისთვის და რომელიც ნახევრად მათემატიკური გათვლებისგან შედგება, ნახევრად კი - ინტუიციისგან.
ბონდი ყოველთვის კარგი აზარტული მოთამაშე იყო. უყვარდა შრიალის ხმა, რომელიც მშრალი ბანქოს დარიგებისას ისმოდა. მოსწონდა, მწვანე მაუდიანი ბანქოს მაგიდების გარშემო შეგროვილი ცივსისხლიანი ადამიანების დრამის ყურება. უყვარდა ბანქოს ოთახებისა და კაზინოების სოლიდური, დახვეწილი ინტერიერი, სავარძლების ნატიფად თლილი სახელურები, იდაყვთან აუცილებელ ატრიბუტად ქცეული შამპანურის ან ვისკის ჭიქები, წყნარი, თავშეკავებული და ყურადღებიანი მსახურები. ბონდს ყოველთვის აკვირვებდა `რულეტის~ ბურთის მიუკერძოებლობა და ბანქოს მაგიდების უსასრულო მინდვრები. მოსწონდა, ერთდროულად მაყურებელიც რომ იყო და მსახიობიც. სიამოვნებას იღებდა, როცა თავის სკამზე მჯდომი ერეოდა სხვა ადამიანების ოცნებებსა და გადაწყვეტილებებში, სანამ სანახევრო შანსების ქონის დროს იტყოდა საბედისწერო `ჰოს~ ან `არას~.
ყველაზე ძალიან კაზინოში კი ის მოსწონდა, რომ აქ ყველა თავად სწყვეტდა საკუთარ ბედს. მოგებასაც და წაგებასაც მოთამაშე მხოლოდ საკუთარ თავს მიაწერდა. იღბალი მსახური იყო და არა მბრძანებელი. ბონდმა იცოდა, რომ ბედნიერი შემთხვევა შეიძლებოდა ჩაგეთვალათ უბრალოდ იღბალად, ან კარგ შესაძლებლობად და ბოლომდე გამოგეყენებინათ. ჯეიმსს ისიც მშვენივრად ესმოდა, რომ აზარტული მოთამაშის მომაკვდინებელი ცდომილება ტაქტიკური შეცდომის, ცუდი თამაშის და უიღბლობის ერთმანეთში არევა იყო. ბონდი იღბალს ისე აღიქვამდა, როგორც ქალს. მისი ყველა ხასიათი უყვარდა და არ ეშინოდა. სათუთად ექცეოდა და შემდეგ დაუნდობლად იპყრობდა. თუმცა, არასდროს უსაფრდებოდა და არ აჩქარებდა. ქალებთან და ბანქოსთან მოპყრობის ერთნაირი დახვეწილი მეთოდის მიუხედავად, ბონდი აღიარებდა, რომ არც ერთის და არც მეორის გამო არასდროს უნერვიულია. წინასწარ იცოდა, რომ ოდესმე ან ქალი დააყენებდა მუხლებზე ან ბანქო და, როცა ეს მოხდებოდა, მის თვალებშიც გაჩნდებოდა მომაკვდინებელი კითხვის ნიშანი, რომელსაც ბანქოს მაგიდასთან მჯდომი სხვა მოთამაშეების თვალებში ყოველთვის ხედავდა. ეს გახლდათ მოგების რწმენის დაკარგვისა და წაგებამდე წინასწარ დადებული გადახდის პირობის ნაზავი.
ეს ყველაფერი ალბათ, სხვა დროს მოხდებოდა. ახლა კი, ივნისის მშვენიერ საღამოს ბონდი `სამზარეულოს~ გავლით ამაყად შევიდა სათამაშო დარბაზში. მომღიმარი სახით, აუღელვებლად გადაცვალა მილიონი ფრანკი სათამაშო ჩიპებზე და ორმოცდაათი ათასით პირველ `რულეტთან~ დაჯდა.
ბონდმა ფურცელი მოითხოვა, სადაც მის მოსვლამდე ყველა მომგებიანი რიცხვი იყო ჩამოწერილი. პარტიას ყოველთვის ასე იწყებდა, თუმცა მშვენივრად ესმოდა, რომ წინა პარტიებში დამჯდარ არც ერთ რიცხვს, `რულეტის~ არც ერთ დატრიალებას და ბურთის არც ერთ ბრუნს საერთო არაფერი ჰქონდა შემდეგ თამაშთან. იცოდა, რომ თითოეული პარტია ხელახლა იწყებოდა მხოლოდ მას შემდეგ, რაც კრუპიე მარჯვენა ხელით აიღებდა სპილოს ძვლის ბურთს, იმავე ხელის სწრაფი მოძრაობით საათის მიმართულებით დაატრიალებდა რულეტს და ხელის მესამე მოძრაობით ბურთს საათის მიმართულების საწინაღმდეგოდ ჩააგდებდა მბრუნავ ბორბალში.
ყველასთვის ნათელი იყო, რომ რულეტის აგებულება და თვითონ თამაშიც ისე იყო დახვეწილი ათწლეულების მანძილზე, რომ ვერც კრუპიეს მოხერხებული ხელი და ვერც მბრუნავი ბორბლის დახრილობა ბურთის ჩავარდნის ადგილზე ვერანაირ გავლენას ვერ იქონიებდა. მიუხედავად ამისა, `რულეტის~ მოთამაშეებს ჰქონდათ წესი, რომელიც პარტიის მსვლელობის ჩაწერას და მბრუნავი ბორბალის ყველა თავისებურების აღწერას ითვალისწინებდა. ბონდიც იცავდა ამ წესს. განსაკუთრებული ყურადღება ექცეოდა იშვიათ ფაქტს, როდესაც ერთი და იგივე რიცხვი ზედიზედ ორჯერ ჯდებოდა.
ბონდს ეს ტრადიცია არ მოსწონდა. თვლიდა, რომ რაც უფრო დიდი ფანტაზიით და მანევრის შეზღუდვის გარეშე ითამაშებდა, მით უფრო დიდ თანხას მოიგებდა.
ჯეიმსმა ბოლო სამი საათის მანძილზე გაკეთებული თამაშის ჩანაწერი ნახა და საინტერესო ვერაფერი შეამჩნია. ცხადია, იმას თუ არ ჩავთვლით, რომ ბოლო დუჟინიდან არც ერთი რიცხვი არ იყო დამჯდარი. ბონდი ყოველთვის ისე თამაშობდა, როგორც ინტუიცია კარნახობდა და ტაქტიკას მხოლოდ იმ შემთხვევაში ცვლიდა, თუ `ზერო~ დაჯდებოდა. ამჯერად, თამაში ერთ-ერთი თავისი უსაყვარლესი კომბინაციით დაიწყო - პირველი დუჟინის ყოველ მეორეზე მაქსიმალური ფსონი დადო. საბოლოოდ, მისმა ფსონმა ასი ათასი შეადგინა. ამ კომბინაციით მან `ზეროს~ გარდა რიცხვების ორი მესამედი დახურა. და რადგან დუჟინებს შანსი ორი ერთთან ჰქონდათ, ყოველთვის, როცა ოცდახუთზე ნაკლები რიცხვი ჯდებოდა, ბონდი ასი ათას ფრანკს იგებდა.
ბონდმა პირველი ექვსი ფსონი ზედიზედ მოიგო. მეშვიდეზე ოცდაათი დაჯდა და შესაბამისად, ჯეიმსმაც წააგო. ბონდის სუფთა მოგება ნახევარი მილიონი ფრანკი გახლდათ. უეცრად ინტუიციამ შემდეგი რაუნდის გამოტოვება უკარნახა. მერვე ფსონი გამოტოვა. კრუპიემ ბურთი ისროლა და `ზერო~ დაჯდა. ამ ბედნიერმა შემთხვევამ ჯეიმსი გაახალისა. ჩათვალა, რომ თამაში უნდა გაეგრძელებინა. გადაწყვიტა, რომ ახლა მესამე დუჟინს უნდა მოეგო და ფსონები პირველ და მესამე დუჟინზე დადო, რამაც ორჯერ მოუტანა წაგება. მეთერთმეტე და მეთორმეტე ფსონზე რიცხვები მეორე დუჟინიდან დაჯდა, რაც ოთხასი ათას ფრანკად დაუჯდა, მიუხედავად ამისა, მაგიდა ერთი მილიონი ფრანკის მოგებით დატოვა.
იმის გამო, რომ ბონდმა თამაში თავიდანვე მაქსიმალური ფსონებით დაიწყო, მაგიდის ცენტრად იქცა. მისი მოგებით დაინტერესებული ორი, შედარებით სუსტი მოთამაშე ბონდს შეუერთდა. ერთ-ერთი მათგანი მაგიდის მოპირდაპირე მხარეს იჯდა და ქცევის მიხედვით, ამერიკელი უნდა ყოფილიყო. ჯეიმსის თითოეულ მოგებას გადაჭარბებულად მეგობრული ღიმილით იზიარებდა და დაუფარავად ავლენდა სიმპათიას მის მიმართ. ყოველ ჯერზე უღიმოდა ბონდს და თავის პატარა - ათი ათასიან ფსონებს ჯეიმსის დიდ ფსონებთან ერთად დებდა. როდესაც ბონდი წამოდგა, ამერიკელმაც გასწია სკამი და მაგიდის იქითა მხრიდან მოურიდებლად გადასძახა:
- დიდი მადლობა დახმარებისთვის. ვფიქრობ, თქვენი სასმელზე დაპატიჟება ნამდვილად მეკუთვნის. შემომიერთდებით?
ბონდს ეჭვი გაუჩნდა. ეს ახალგაზრდა მამაკაცი შეიძლებოდა ცენტრალური სადაზვერვო სამსახურის სწორედ ის თანამშრომელი ყოფილიყო, რომელზეც მატისი უყვებოდა. ბონდმა მადლიერების ნიშნად კრუპიეს ათი ათასიანი ჩიპი აჩუქა და ამერიკელთან ერთად ბარისკენ დაიძრა. სულ მალე მიხვდა, რომ მართალი იყო.
- მე ფელიქს ლეითერი ვარ, - უთხრა ამერიკელმა, - ძალიან სასიამოვნოა თქვენი გაცნობა.
- ბონდი, ჯეიმს ბონდი.
- ძალიან კარგი, - თქვა ამერიკელმა, - აბა, შევარჩიოთ, რითი შეიძლება ჩვენი გაცნობის აღნიშვნა.
ბონდმა ლეითერი დაარწმუნა `ჰეიგ ენდ ჰეიგი~ შეეკვეთა, შემდეგ ბარმენს ეჭვის თვალით შეხედა.
- ერთი, მშრალი მარტინი, - თქვა ბონდმა, - შამპანურის დიდ ჭიქაში.
- დიახ, ბატონო.
- ერთი წუთით, - ჯეიმსმა კორექტივები შეიტანა შეკვეთაში, - სამი წილი `გორდონი~, ერთი - არაყი, ნახევარი საწყავი `კინა ლილეტი~, კარგად აურიეთ, ყინული არ დაგავიწყდეთ და ბოლოს ლიმონის სქელი ნაჭერი დაუმატეთ. დაიმახსოვრეთ?
- რა თქმა უნდა, ბატონო! - როგორც ჩანს, ბარმენს შეკვეთა ძალიან მოეწონა.
- ღმერთო ჩემო, რეცეპტიც ასეთი უნდა! - აღმოხდა ლეითერს.
ბონდმა გაიცინა.
- როცა ძალების მოკრება მინდა, სადილამდე ერთზე მეტ სასმისს არ ვსვამ, - აუხსნა ბონდმა. - მაგრამ მიყვარს, როცა ის ერთი ძალიან ძლიერია, ძალიან დიდი, ძალიან ცივი და ძალიან კარგად მომზადებული. პატარა პორცია აბსოლუტურად არაფერის არ მიყვარს. ეს სასმელი თავისი დოზებიანად ჩემი მოგონილია. კარგ სახელს რომ მოვიფიქრებ, აუცილებლად დავაპატენტებ.
ბონდი უყურებდა როგორ გადადიოდა ღია ოქროსფერი გაყინული სასმელი შეიქერიდან დიდ ჭიქაში. ჯეიმსმა ჭიქა თავისკენ მოწია და მოსვა.
- შესანიშნავია, - უთხრა ბარმენს, - უბრალოდ, არაყი კარტოფილის მაგივრად ხორბლის რომ იყოს, ბევრად უფრო გემრიელი იქნებოდა.
ჯეიმსმა წინადადება ფრანგულად განაგრძო. ფრანგული სიტყვების გაგონებისას ბარმენმა ბონდს გულიანად გაუღიმა. ჯეიმსმა შეატყო, რომ ლეითერი უხერხულ მდგომარეობაში ჩავარდა და მიუბრუნდა.
- `თმას არ დავიგლეჯთ~ - ეს ფრანგული ვულგარული გამონათქვამია, რაც იმას ნიშნავს, რომ კოქტეილის დალევა ასეც შეიძლება. - აუხსნა ბონდმა ჯერ ისევ დაბნეულ ამერიკელს.
ლეითერი ისევ ბონდის სასმელის შემადგენლობაზე ფიქრობდა:
- გინდათ, რომ ყველაფერში პროფესიონალი იყოთ?
ბონდმა და ლეითერმა ჭიქები აიღეს და ოთახის კუთხისკენ გაემართნენ. ლეითერმა ხმას დაუწია და ჯეიმსს უთხრა:
- მას შემდეგ, რაც შუადღისას გადაიტანეთ, კოქტეილს შეგიძლიათ `მოლოტოვი~ დაარქვათ.
ორივე დაჯდა. ბონდს გაეცინა.
- როგორც ვნახე, გზაჯვარედინის ნიშანი აფეთქებას ემსხვერპლა, პოლიციის მანქანები პატრულირებას აწარმოებენ. იმედია, ეს ხმაური ფულიან ხალხს არ დააფრთხობს.
- ხალხის ნაწილმა დაიჯერა ბულგარელი კომუნისტების ამბავი, ზოგსაც გაზის აფეთქება ჰგონია. დამწვარ ხეებს უკვე თხრიან და მიაქვთ. აქაც ისე თუ იმუშავეს, როგორც მაშინ, მონტე კარლოში, დილით არეულობის კვალიც კი არ დარჩება.
ლეითერმა ჯიბიდან `ჩესტერფილდი~ ამოიღო.
- ძალიან მოხარული ვარ, რომ ამ საქმეზე მუშაობა თქვენთან ერთად მიწევს. - თქვა ამერიკელმა და ჭიქაში ჩაიხედა. - განსაკუთრებით კი ის მახარებს, რომ დღეს არ აფეთქდით. ჩემებიც ისევე დაინტერესებულები არიან ამ ოპერაციით, როგორც თქვენი ხალხი და ეს გეგმა გიჟურად სულაც არ მიაჩნიათ. პირიქით, ვაშინგტონს გულიც კი სწყდება, ოპერაციაში წამყვან როლს ჩვენ რომ არ ვასრულებთ, მაგრამ უფროსობის გადაწყვეტილებებს რას გაუგებთ. თქვენთანაც ხომ ასეა, ლონდონში?
ბონდმა თავი დაუქნია:
- ვიცი, ვიცი, ყველაფერს საკუთარ თავზე იღებენ.
- ასეა თუ ისე, მე თქვენს დაქვემდებარებაში ვარ და მზად გახლავართ ნებისმიერი დახმარება აღმოგიჩინოთ. იმას თუ გავითვალისწინებთ, რომ მატისი და მისი ბიჭები აქ არიან, ჩემი გასაკეთებელი ბევრი არც არაფერი იქნება, მაგრამ მაინც მინდა, რომ ჩემი იმედი გქონდეთ.
- მოხარული ვარ, თქვენი იმედი რომ მაქვს. - მიუგო ბონდმა. - სასიამოვნოა, რომ ამ ოპერაციაში მე, მატისი და თქვენ ერთად ვიღებთ მონაწილეობას. კარგია, რომ შიფრე ასეთ უიმედო მდგომარეობაშია. ვფიქრობ, განსაკუთრებული დავალება არ მექნება თქვენთვის, მაგრამ არის ერთი რამ, რისი გაკეთებაც ნამდვილად შეგიძლიათ. თუ თქვენთვის სირთულეს არ წარმოადგენს, დღეს საღამოს კაზინოში ან მის მიმდებარე ტერიტორიაზე შეყოვნდით. აქ ჩემი თანაშემწე მოვა - მის ლინდი და თამაშის დაწყების შემდეგ მინდა, რომ ყურადღება თქვენ მიაქციოთ. მის გვერდით ყოფნა ნამდვილად არ შეგრცხვებათ, ძალიან მომხიბვლელი ქალბატონია! - თქვა ბონდმა და ლეითერს გაუცინა, - შიფრეს ორი შეიარაღებული მცველი ეყოლება თან. მათაც შეგიძლიათ თვალყური ადევნოთ. არა მგონია, რამე გაბედონ, მაგრამ მაინც...
- ჩემი იმედი გქონდეთ, - თქვა ლეითერმა, - სანამ ამ განყოფილებაში გადმოვიდოდი, საზღვაო კორპუსში ვმსახურობდი, თუ, რა თქმა უნდა, ეს სახელი რამეს გეუბნებათ. – დასძინა მან და ბონდს შეხედა.
- ცხადია, ეს ბევრ რამეზე მეტყველებს. ყველაფერი ნათელია! - მიუგო ბონდმა.
გაირკვა, რომ ლეითერი ტეხასიდან იყო. სანამ ის `ნატოს~ სადაზვერვო განყოფილებაში თავის სამსახურზე ყვებოდა და უხსნიდა, როგორი ძნელი იყო უსაფრთხოების დაცვა ორგანიზაციაში, სადაც ამდენი ეროვნების ადამიანი ირევა, ჯეიმსმა დაასკვნა, რომ კარგი ამერიკელები, სავსებით ნორმალური ადამიანები იყვნენ და ძირითადად, ყველა ტეხასიდან გახლდათ წარმოშობით.
ფელიქს ლეიტერი დაახლოებით ოცდათხუთმეტი წლის იყო. მაღალი და გამხდარი გახლდათ და ზუსტად ფრენკ სინატრასნაირი კოსტუმი ეცვა. ლეითერი ნელა მოძრაობდა და ასევე ნელა მეტყველებდა. თუმცა, ერთი შეხედვითაც იტყოდით, რომ ძალიან ძლიერი და ფრთხილი მოჩხუბარი იქნებოდა. ახლა, როდესაც მაგიდაზე დაყრდნობილი იჯდა, მტაცებელ ფრინველს მოგაგონებდათ. ამ შთაბეჭდილებას მისი სახის ნაკვთები ქმნიდა - გამოკვეთილი, წვეტიანი ნიკაპი, გამოშვერილი ყვრიმალები და განიერი, ცინიკური პირი. როცა ლეითერი ზევით იყურებოდა, სიგარეტის კვამლის სქელი ფენა კიდევ უფრო ელეგანტურად აჩენდა მის ნაცრისფერ თვალებს. თვალების კუთხეებში გაჩენილი ნაოჭები კი ისეთ შთაბეჭდილებას სტოვებდნენ, თითქოს გამუდმებით ვიღაცას დასცინოდა. იფიქრებდით, რომ ფელიქსი თვალებით უფრო იცინოდა, ვიდრე ტუჩებით. შუბლზე დაყრილი ღია ფერის თმა მის სახეს სანდომიანობას მატებდა. მიუხედავად იმისა, რომ ღიად საუბრობდა თავისი სამსახურის შესახებ პარიზში, ბონდმა დააფიქსირა, რომ არც ერთხელ არ უხსენებია ამერიკელი კოლეგები ევროპასა თუ ვაშინგტონში, რაც იმას ნიშნავდა, რომ ლეითერი საკუთარი ორგანიზაციის ინტერესებს უფრო მაღლა აყენებდა, ვიდრე ჩრდილოატლანტიკური ორგანიზაციის ზოგად პრობლემებს. ბონდი მის მიმართ სიმპათიით განეწყო.
ლეითერმა კიდევ ერთი ჭიქა ვისკი დალია. ბონდმა მას მუნცების ოჯახისა და სანაპიროზე მანქანით გასეირნების შესახებ უამბო. უკვე რვის ნახევარი იყო. გადაწყვიტეს, სასტუმროში ერთად დაბრუნებულიყვნენ. კაზინოდან გასვლამდე, ბონდმა მთელი თავისი კაპიტალი - ოცდაოთხი მილიონი ფრანკი სალაროს მიაბარა და ჯიბის ფულად მხოლოდ რამდენიმე ათი ათასიანი ბანკნოტი დაიტოვა.
როცა სასტუმრო `სფლენდიდს~ მიუახლოვდნენ, დაინახეს, რომ სპეციალური სამსახურის წარმომადგენლები აფეთქების ადგილს ასუფთავებდნენ. რამდენიმე ხე ფესვებიანად იყო ამოღებული და სამი მუნიციპალური მანქანა ბულვარს რეცხავდა. ცეცხლი აღარსად ენთო. მხოლოდ რამდენიმე გამვლელი მიშტერებოდა იქურობას. ბონდმა შეამჩნია, რომ სასტუმრო `ერმიტაჟის~ და მაღაზიების ჩამტვრეული შუშებიც უკვე მოეწესრიგებინათ.
შებინდებისას როიალ-ლეს-ო ისევ წყნარ, მოწესრიგებულ და სასიამოვნო კურორტს დაემსგავსა.
- ნეტავი, კონსიერჟი ვისთვის მუშაობს? - სასტუმროს რომ მიუახლოვდნენ, იკითხა ლეითერმა. ბონდმა ზუსტად არ იცოდა და გულწრფელად უპასუხა ფელიქსს.
მატისმა მის შესახებ ვერაფერი გაარკვია. `თუ ვინმეს შენ არ მოისყიდი, უნდა ივარაუდო, რომ მოწინააღმდეგემ მოისყიდა~, - მატისს ასე ჰქონდა ნათქვამი ბონდისთვის. - `ყველა კონსიერჟის მოსყიდვა შეიძლება. ეს მათი ბრალი არც არის. შეჩვეულები არიან, რომ სასტუმროს ყველა სტუმარი, ალბათ, მაჰარაჯების გარდა, პოტენციური აფერისტია ან ქურდი, ამიტომ ყველას თვალყურს ადევნებენ. თქვენი კარგად დასვენება და კომფორტი მაგათ ისე ანაღვლებთ, როგორც ნიანგებს~.
ბონდს მატისის ეს სიტყვები მაშინ გაახსენდა, როცა კონსიერჟმა აღელვებული ხმით ჰკითხა, თუ როგორ გრძნობდა თავს დღისით მომხდარი უბედური შემთხვევის შემდეგ. ჯეიმსმა საჭიროდ ჩათვალა ეთქვა, რომ ცოტა თავბრუ ეხვეოდა. იფიქრა, თუ მის სიტყვებს შიფრეს გადასცემდნენ, ის აუცილებლად გამოიყენებდა მოწინააღმდეგის ცუდ ფიზიკურ მდგომარეობას და დროის მოგების მიზნით, დღესვე დაიწყებდა თამაშს. კონსიერჟმა უმეტყველოდ გაუღიმა და მალე გამოჯანმრთელება უსურვა.
ლეითერის ოთახი რომელიღაც ზედა სართულზე იყო. ფელიქსმა და ჯეიმსმა კაზინოში შეხვედრა ათის ან თერთმეტის ნახევარზე დათქვეს და ლიფტთან დაშორდნენ ერთმანეთს.




მერვე თავი - ვარდისფერი სინათლე და შამპანური


ბონდი თავის ოთახში შევიდა. როგორც ჩანდა, მის არყოფნაში ოთახში უცხო არავინ იყო შესული. ცხელი აბაზანის შემდეგ ცივი შხაპი მიიღო და წამოწვა. სასტუმრო `სფლენდიდის~ ბარში, ლინდთან შეხვედრამდე ერთი საათი რჩებოდა. დიახ, ერთი საათი ჰქონდა იმისთვის, რომ დაესვენა და ზუსტად წარმოედგინა, როგორ წარიმართებოდა თამაში, გაეთვალა ყველა მოგება და წაგება. გაენაწილებინა მატისის, ლეითერისა და ლინდის როლები. ვირტუალურად დაენახა მოწინააღმდეგის საქციელი და მისი რეაქცია. ბონდმა თვალები დახუჭა და საღამოს ფრაგმენტები ისე გადაეშალა თვალწინ, როგორც სურათის ნაწილები ფერად კალეიდოსკოპში.
ცხრას ოცი წუთი აკლდა, როცა ბონდმა შიფრესთან დუელის ყველა ვარიანტი წარმოიდგინა. ადგა, ჩაიცვა და თავი აიძულა თამაშზე აღარ ეფიქრა.
ბონდი შავ, წვრილ ატლასის ჰალსტუხზე ორმაგ კვანძს იკეთებდა, როცა წამით სარკეში საკუთარ თავს მიაშტერდა. მონაცრისფრო-მოლურჯო თვალებს მშვიდი და ცოტა ირონიული გამომეტყველება ჰქონდა. მოკლედშეჭრილი შავი თმა ურჩად დაფენოდა მარჯვენა წარბს. მარჯვენა ლოყას მთლიანად მოუყვებოდა ვერტიკალური ნაიარევი, რომელიც სახეს მეკობრის ელფერს აძლევდა. უეცრად გაუელვა, რომ სულაც არ ჰგავდა ჰოუგი ქარმიშელს. ეტყობოდა, მატისს ლინდის კომენტარი ჯეიმსისთვის გადაეცა. ბონდმა ტყვიის ოქროს ზედაპირიანი პორტსიგარი ოცდაათი მორლანდით გაავსო და შარვლის უკანა ჯიბეში ჩაიდო. `რონსონის~ სანთებელა აანთო და დარწმუნდა, რომ აირის დამატება არ სჭირდებოდა. ათიათასიანი ბანკნოტების თხელი შეკვრის გადათვლის შემდეგ, გარდერობის უჯრა გამოაღო, მსუბუქი ხავერდის იარაღის ბუდე აიღო და მარცხენა მხრის ქვეშ ისე შემოიხვია, რომ ბუდე იღლიაზე სამი დუიმით ქვევით დამაგრდა. შემდეგ მეორე უჯრა გამოაღო და პერანგების ქვევიდან ოცდახუთკალიბრიანი, მსუბუქტარიანი `ბერეტა~ ამოიღო. საკეტი შეამოწმა, რამდენჯერმე გამოჰკრა ჩახმახს, შემდეგ მჭიდი ტყვიებით გაავსო, ფრთხილად გადატენა, დამცავი გადმოწია და მხარზე დამაგრებულ ცარიელ ბუდეში მოათავსა. ბონდმა ოთახს თვალი შეავლო, დარწმუნდა, რომ არაფერი რჩებოდა. შემდეგ აბრეშუმის პერანგზე ერთბორტიანი სმოკინგი შემოიცვა. სარკესთან მივიდა, ნახა, რომ იარაღი ოდნავადაც არ ეტყობოდა, საბოლოოდ შეისწორა ჰალსტუხი, კარი ჩაკეტა და ოთახიდან დაწყნარებული გავიდა.
ბონდი კიბეს ჩაუყვა და ის იყო ბარში უნდა შესულიყო, რომ მის ზურგს უკან ლიფტის კარი გაიღო და მშვიდმა ხმამ უთხრა:
- საღამო მშვიდობისა.
ეს ლინდი იყო. ის ბონდის ზევით ასვლას ელოდებოდა.
ჯეიმსს ლინდის გარეგნობის ყველა მშვენიერი დეტალი ახსოვდა, ამიტომ როცა მომხიბვლელ ქალბატონს შეხედა, აღარაფერი გაკვირვებია.
მის ლინდს საღამოს შავი კაბა ეცვა, ძალიან უბრალო, მაგრამ ისეთი სრულყოფილი, როგორის შექმნაც მსოფლიოში მხოლოდ რამდენიმე დიზაინერს შეუძლია. ყელს წვრილი ბრილიანტის ყელსაბამი უმშვენებდა, ასეთივე ბრილიანტის გულსაბნევი ეკეთა ღრმა დეკოლტეზე, რაც ხაზს უსვამდა მის მშვენიერ მკერდს. მის ლინდს ხელში უბრალო ბრტყელი საღამოს შავი ჩანთა ეჭირა. გაშლილი, კუპრივით შავი, სწორი თმა ბოლოებში ოდნავ დახვეული ჰქონდა.
ლინდი არაჩვეულებრივად გამოიყურებოდა და ბონდიც აღიარებდა ამას.
- მშვენივრად გამოიყურებით. როგორც ჩანს, რადიობიზნესში საქმე ძალიან კარგად მიდის.
ლინდმა ჯეიმსს ხელი გაუყარა:
- წინააღმდეგი ხომ არ იქნებით, თუ აქ არ დავსხდებით და პირდაპირ ვახშამზე გადავალთ? - ჰკითხა ქალმა. - შესვლისას შთაბეჭდილების მოხდენა მინდა. ერთი საშინელი საიდუმლო უნდა გაგიმხილოთ. ეს ხავერდის კაბა ჯდომის დროს საშინლად იკუჭება. ხო, მართლა, თუ ამ საღამოს ჩემი კივილი მოგესმათ, ჩათვალეთ, რომ დაწნულ სკამზე მომიხდა დაჯდომა.
ბონდს გაეცინა:^
- რა თქმა უნდა, პირდაპირ ვისადილოთ. შევიდეთ და სანამ სადილს მოგვართმევენ, თითო ჭიქა არაყი დავლიოთ.
ლინდმა ბონდს მრავლისმეტყველად გახედა და მანაც სასწრაფოდ გადააკეთა:
- ან თითო კოქტეილი მივირთვათ, თუ თქვენ ასე გირჩევნიათ. აქაური სამზარეულო საუკეთესოა მთელს როიალში.
ბონდმა უეცრად იგრძნო, რომ არ ესიამოვნა ლინდის მკაცრი გამოხედვა და ამაზე უფრო მეტად ის გაუკვირდა, რომ ქალის გამოხედვამ მის გადაწყვეტილებაზე იმოქმედა, უსიტყვოდ შეაცვლევინა და საკუთარი სურვილი თავად ჯეიმსსავე ათქმევინა.
აგენტების პატარა დაპირისპირება სულ რამდენიმე წუთს გაგრძელდა და სანამ სასტუმროს თანამშრომელი მათ ხალხით გადატვირთულ ოთახში მაგიდისკენ გზას უკვალავდა, ბონდმა ინციდენტი დაივიწყა. თანმხლები ქალბატონი წინ გაუშვა, თვითონ კი ტკბებოდა იმით, თუ როგორ უყურებდნენ მას სტუმრები.
სასტუმროს ყველაზე პრესტიჟულ ადგილად რესტორნის ის ნაწილი ითვლებოდა, რომელიც გემის ცხვირს წააგავდა, ერთი კედელი მთლიანად შუშის ჰქონდა და სასტუმროს მშვენიერ ბაღებს გადაჰყურებდა. მიუხედავად ამისა, ჯეიმსს მაგიდა დარბაზის სარკეებიან კუთხეში ჰქონდა შეკვეთილი. ეს კუთხე ედვარდების პერიოდის გადმონაშთს მოგაგონებდათ. სარკეებით გაფორმებულ თეთრ, ოქროსფრით გაწყობილ კედლებზე წითელი გადაწყვეტილი განათება იყო დამაგრებული. ასეთივე მოწითალო პატარა ტორშერი იდგა იმ მაგიდაზე, რომელთანაც ბონდი და მისი მხლებელი დასხდნენ. მას მეწამული აბრეშუმი ჰქონდა გადაფარებული. სანამ ბონდი და ლინდი წითელი ასოებით დაწერილ უზარმაზარ მენიუში გარკვევას ცდილობდნენ, ჯეიმსმა მთავარ მიმტანს დაუძახა.
- აირჩიეთ? - შეეკითხა ბონდი ლინდს.
- ჯერ ერთ ჭიქა არაყს დავლევ, - უპასუხა ლინდმა და მენიუს შესწავლა განაგრძო.
- არყის ერთი პატარა, ძალიან ცივი გრაფინი, თუ შეიძლება, - შეუკვეთა ბონდმა. - ამ ახალი კაბის სადღეგრძელოს ისე ვერ ლავლევ, თუ თქვენი სახელი არ მეცოდინება.
- ვესპერი, - თქვა ქალბატონმა, - ვესპერ ლინდი.
(რაც თარგმანში `საღამოს ვარსკვლავს~ ნიშნავს).
გაკვირვებულმა ბონდმა ლინდს შეხედა.
- უკვე ცოტა მომბეზრდა ყველასთვის ამის ახსნა. როგორც ჩემი მშობლები ამბობენ, მე რომ დავიბადე, იმ საღამოს საშინელი შტორმი იყო. მათ ამ დღის დამახსოვრება უნდოდათ. - ლინდს გაეღიმა, - ზოგს ჩემი სახელი მოსწონს, ზოგს - არა. პირადად მე შეჩვეული ვარ.
- ჩემი აზრით, მშვენიერი სახელია. - მიუგო ბონდმა. უცებ ერთმა აზრმა გაუელვა. - უნდა გთხოვოთ, რომ თქვენი სახელი დამითმოთ. - ბონდმა ლინდს უამბო თავისი კოქტეილის შესახებ. - უკვე დიდი ხანია მისთვის სახელს ვეძებ. ვესპერი ძალიან მოუხდება. `საღამოს ვარსკვლავი~ ნამდვილად შეესაბამება იმ დროს, როცა მთელს მსოფლიოში ხალხი ჩემს კოქტეილს დალევს.
- მხოლოდ იმ შემთხვევაში დაგთანხმდებით, თუ მე ვიქნები პირველი, ვისაც გაასინჯებთ. - უპასუხა ვესპერმა. - ისეთი სიამაყით საუბრობთ თქვენს კოქტეილზე, რომ ნამდვილად კარგი უნდა იყოს.
- ეს ყველაფერი რომ დასრულდება, ორივე ერთად მივირთმევთ. - უთხრა ბონდმა. -`ვესპერს~ დავლევთ ან გამარჯვებულები, ან დამარცხებულები. ახლა კი, შეარჩიეთ რისი მირთმევა გნებავთ? ძალიან გთხოვთ, ყველაფერი ძვირფასი ამოარჩიეთ! - თქვა ბონდმა, როცა ლინდის ოდნავ მორიდებული სახე შეამჩნია, - თორემ, ამ ზღაპრულ კაბას შეურაცყოფას მიაყენებთ.
- ორი რამ შევარჩიე და ორივე დელიკატესია, - თქვა ვესპერმა, - და რადგანაც დაჟინებით მოითხოვთ, რომ მილიონერივით მოვიქცე, რაც მე თავადაც ძალიან მსიამოვნებს, ხიზილალით დავიწყებ, შემდეგ გრილზე შემწვარ თირკმელებს მოვითხოვ სუფლეთი. ამის მერე მარწყვი მინდა ძალიან ბევრი ნაღებით. როგორ გგონიათ, ზედმეტად უსირცხვილოდ ხომ არ მოვირგე მილიონერის როლი? - იკითხა ვესპერმა და ბონდს გაუღიმა.
- არაჩვეულებრივი არჩევანია, განსაკუთრებით თუ საქმე ჯანსაღ საკვებს ეხება. - მიუგო ბონდმა და მიმტანს მიუბრუნდა, - და კიდევ ბევრი ტოსტი მოგვიტანეთ.
- პრობლემა ყოველთვის იმაშია, - აუხსნა მან ვესპერს, - რომ არასაკმარისი ხიზილალა კი არა, ტოსტი მოაქვთ ხოლმე.
- ახლა მე, - თქვა ბონდმა და მენიუს დაუბრუნდა, - მადმუაზელის არჩევანს ხიზილალით დაწყებაში გავიზიარებ. შემდეგ კი წვრილ ნაჭრებად დაჭრილი ძროხის ხორცის ფილე მინდა სისხლით და ბეანური სოუზით და რბილი არტეშოკით. სანამ მადმუაზელი მარწყვის დესერტს შეექცევა, მე მაიონეზის წვეთიან ავოკადოს გავსინჯავ. როგორი არჩევანია?
მიმტანმა თანხმობის ნიშნად თავი დაუქნია.
- მადმუაზელ, მუსიე, არაჩვეულებრივი არჩევანია. მუსიე ჟორჟ! - უფროსმა მიმტანმა მეორე მიმტანს დაუძახა. თვითონ კი გატრიალდა და შეკვეთა უმცროსს მიმტანს გადასცა.
- აი, ინებეთ, - თქვა ჟორჟმა და ტყავის ყდაში ჩასმული ღვინოების მენიუ მაგიდაზე დადო.
- თუ წინააღმდეგი არ იქნებით, ამ საღამოს თქვენთან ერთად შამპანურის დალევა მინდა. ჩვენს დღევანდელ შეხვედრას მოუხდება. იმედი მაქვს, დამეთანხმებით.
- მეც სიამოვნებით დავლევ შამპანურს, - უპასუხა ვესპერმა.
ბონდმა თითი მენიუს ერთ-ერთ ხაზს გააყოლა და ჟორჟს მიმართა:
- ორმოცდახუთი წლის ტეტინჟერზე რას გვეტყვით?
- ცხადია კარგი არჩევანია, მაგრამ თუ მუსიე ნებას დამრთავს, ვიტყვი, რომ ამავე მარკის 1943 წლის `ბლანკ დე ბლანკ ბრატს~ ვერაფერი შეედრება. - თქვა ჟორჟმა და ფანქრით შამპანურზე მიუთითა მენიუში.
ბონდს გაეღიმა:
- მაშინ დაგეთანხმებით, - თქვა მან.
- ეს მაინცდამაინც ცნობილი ფირმა არ არის, - აუხსნა ჯეიმსმა თანმხლებს, - მაგრამ მერწმუნეთ, მსოფლიოში საუკეთესო შამპანურია. - მერე თვითონვე გაეღიმა თავის სიტყვებზე. აქ მოსვლის შემდეგ ხომ მხოლოდ საკვებზე საუბრობდა.
- უნდა მომიტევოთ, - განაგრძო ბონდმა, - ალბათ, ცოტა სასაცილოდაც გეჩვენებათ ჩემი მხრიდან საჭმელებისა და სასმელების მიმართ ასეთი ყურადღების გამოჩენა. უბრალოდ, ეს ჩემს სამსახურთანაა დაკავშირებული. მე ხომ გამუდმებით ყველა დეტალისთვის ყურადღების მიქცევა მიწევს. შეიძლება ცოტა იმის ბრალიც არის, რომ უცოლო ვარ და ალბათ, ოდნავ ძველმოდურიც, მაგრამ პროფესიიდან გამომდინარე სადილობა სულ მარტოს მიწევს და დეტალებში ჩაძიება ცოტათი მიხალისებს ამ მოსაწყენ `დავალებას~.
ვესპერმა გაუღიმა.
- მე მომხრე ვარ, - თქვა მან, - მომწონს ყველაფრის ბოლომდე ჩაძიება. ცხოვრებაშიც ასე ვიქცევი, მინდა ყველაფრიდან ბოლო წვეთამდე მივიღო სიამოვნება, მაგრამ ალბათ, ეს სკოლის მოსწავლე გოგონას სიტყვებს გაგონებთ. მომიტევეთ. - სინანულით დასძინა ვესპერმა.
ამასობაში, ყინულებიან ვედროში მოთავსებული არყის პატარა გრაფინიც მოიტანეს და ბონდმა ჭიქები შეავსო.
- სხვათაშორის, მაგაში მეც გეთანხმებით. - თქვა ჯეიმსმა, - ახლა კი ჩვენს დღევანდელ იღბალს გაუმარჯოს, ვესპერ.
- გაუმარჯოს, - წყნარად თქვა ქალბატონმა და პატარა ჭიქა აწია. შემდეგ მისთვის უჩვეულოდ, პირდაპირ თვალებში შეხედა ჯაიმსს და თქვა^ - იმედი მაქვს, დღეს ყველაფერი კარგად ჩაივლის.
ბონდმა შენიშნა, რომ ვესპერი უნებლიედ შეიშმუშნა. თუმცა, მალევე გააკონტროლა თავი და მისი სხეული უმოძრაობამ მოიცვა.
- მატისისგან ახალი ამბავი მაქვს თქვენთვის. ერთი სული ჰქონდა, როდის გეტყოდათ. თვითონ ვეღარ მოახერხა და მე დამავალა გადმომეცა. ბომბს ეხება. ისეთი უცნაური ამბავია, შეიძლება, არც დამიჯეროთ.



მეცხრე თავი - თამაში `ბაკარა~


ბონდმა მიმოიხედა და დარწმუნდა, რომ მათ არავიმ უსმენდა. ხიზილალა და ცხელი ტოსტები ჯერ არ ჰქონდათ მოტანილი სამზარეულოდან.
- მიამბეთ, - თქვა მან და თვალები გაუნათდა.
- პარიზისკენ მიმავალი მესამე ბულგარელი დაიჭირეს. თურმე, `სიტროენით~ მგზავრობდა და პოლიციისთვის თვალების ასახვევად გზად ორი ინგლისელი ტურისტი გაუყოლებია. როგორც იცით, პოლიციამ გზები გადაკეტა. ჰოდა, ბარიერთან მისულ ბულგარელს ისეთი ცუდი ფრანგულით დაუწყია საუბარი, რომ მაშინვე საბუთები მოსთხოვეს. ბულგარელმა რევოლვერი ამოიღო და საპატრულო მოტოციკლზე მჯდომ ერთ პოლიციელს ესროლა. მეორე პოლიციელმა მისი შეჩერება მოახერხა. ბულგარელს თავის მოკვლა უცდია, მაგრამ ამის საშუალება არ მისცეს. შემდეგ რუანში გადაიყვანეს და იქ, ცხადია, ტრადიციული ფრანგული მეთოდით შეძლეს მისი ალაპარაკება. როგორც გაირკვა, სამივე სპეციალური დაჯგუფების წევრები ყოფილან, რომელიც საფრანგეთში მსგავსი საქმიანობით არის დაკავებული. მატისის მეგობრები უკვე დანარჩენ წევრებს ეძებენ. თურმე, თქვენი მოკვლისთვის ორ მილიონ ფრანკს მიიღებდნენ. ისინი დარწმუნებულები იყვნენ, რომ თუ მითითებებს ზუსტად შეასრულებდნენ, პოლიციას მათი აყვანის არანაირი შანსი არ ექნებოდა. - ვესპერმა არაყი მოსვა. - აი, აქ იწყება ყველაზე საინტერესო. როგორც თავადაც ნახეთ, მათ ორი ფოტოაპარატი ჰქონდათ. შემკვეთმა ისინი დაარწმუნა, რომ ფოტოაპარატების მყვირალა ფერები საქმეს გაუადვილებდათ. მათ უთხრეს, რომ წითელ ბუდეში ძლიერი ბომბი იყო, ლურჯში კი - სუსტი, რომელიც მარტო კვამლს უშვებდა. როდესაც ერთი ბულგარელი წითელ ბუდეს გადააგდებდა, ბომბი აფეთქდებოდა, მეორე ბულგარელს კი ამ დროს ლურჯი ბუდე უნდა გაეხსნა, ირგვლივ ყველაფერი კვამლით დაიფარებოდა და ისინიც გაქცევას შეძლებდნენ. მაგრამ სინამდვილეში ორივე ბუდეში ერთნაირი ბომბი იდო. ვიღაცას გადაწყვეტილი ჰქონდა, რომ ერთნაირად აეფეთქებინეთ თქვენც და დავალების შემსრულებლებიც და, ამ გზით დანაშაულის კვალი დაეფარა. როგორც ჩანს, მესამე ბულგარელის თავიდან მოშორებას მოგვიანებით, სხვა გზით აპირებდნენ.
- განაგრძეთ, ძალიან საინტერესოა! - თქვა ბონდმა და დაეტყო, რომ ორმაგი თამაშის ამ ხერხმა აღაფრთოვანა.
- ბულგარელებს ეს გეგმა მოეწონათ, მაგრამ, ეტყობა, გადაწყვიტეს, უფრო ჭკვიანურად მოქცეულიყვნენ: ჯერ კვამლის ბომბი გაეხსნათ და შემდეგ ესროლათ თქვენთვის განკუთვნილი ბომბი. ასე თავს უფრო დაცულად იგრძნობდნენ, მაგრამ როგორც კი ლურჯი ბუდე გახსნეს, თქვენ თავადაც ნახეთ როგორ აფეთქდა ორივე. მესამე ბულგარელი თავის მეგობრებს სასტუმრო `სფლენდიდის~ უკან უცდიდა წასაყვანად. როცა დაინახა, რაც მოხდა, იფიქრა, რომ მისმა ხალხმა რაღაც აურია. მაგრამ როდესაც პოლიციამ აუფეთქებელი წითელი ბუდიანი ბომბის ნაწილები აჩვენა, ბულგარელი მიხვდა, რაშიც იყო საქმე, დაიჯერა, რომ სამივე დაუნდობლად მოატყუეს და ალაპარაკდა. ალბათ, ახლაც ჩვენებას აძლევს, მაგრამ ამ ყველაფერს პირდაპირ შიფრეს ვერ ვუკავშირებთ. ბულგარელს ეს გვარი არაფერს ეუბნება. ალბათ, მას საქმე შიფრეს რომელიმე მცველთან ჰქონდა.
ვესპერმა ამბის მოყოლა ზუსტად იმ დროს დაასრულა, როცა მაგიდასთან ხიზილალა და ცხელი ტოსტრების მთელი გორა მოიტანეს. მიმტანებს ხელში პატარა თეფშები ეჭირათ, რომელზეც წვრილად დაჭრილი ხახვი და მაგრად მოხარშული კვერცხი იდო.
მიმტანებმა ხიზილალა სტუმრებს თეფშებზე გადაუნაწილეს და, ჯეიმსმა და ვესპერმაც ჩუმად დაიწყეს ჭამა.
ცოტა ხანში ბონდმა დაარღვია სიჩუმე:
- ძალიან სასიამოვნოა, როცა `გვამი~ მკვლელებს ადგილს უცვლის და ეს `გვამი~ შენ ხარ. ჩემს შემთხვევაში მტრები თავიანთ საკუთარ ხაფანგში გაებნენ. მატისი დღევანდელი შედეგით კმაყოფილი უნდა იყოს - მოწინააღმდეგის ხუთი კაცი უკვე გაუვნებელყოფილია. - თქვა ბონდმა და ლინდს მუნცებზე უამბო.
- ისე, მინდოდა მეკითხა, - მორიდებულად წარმოთქვა ბონდმა, - ასეთ საქმიანობაში საიდან ჩაერთეთ? რომელ განყოფილებაში მუშაობთ?
- მე განყოფილება ს-ის ხელმძღვანელის პირადი ასისტენტი ვარ. - უპასუხა ვესპერმა. -ვინაიდან ეს ს-ის ხელმძღვანელის მიერ შემუშავებული გეგმაა, მას სურდა თავის რომელიმე თანამშრომელს მიეღო მონაწილეობა და მ-ს სთხოვა, რომ მე დავემტკიცებინე. საუბარი მარტო იმაზე იყო, რომ მე მხოლოდ კავშირზე ვყოფილიყავი პასუხისმგებელი. ამ ოპერაციაში ჩემს ჩართვას დათანხმდა, თუმცა ს-ს უთხრა, რომ საქმეში ქალის ჩარევის გამო თქვენ საშინლად გაბრაზდებოდით... - ლინდი ცოტა ხნით შეჩერდა, ბონდის კომენტარს დაელოდა და რადგან ჯეიმსმა არაფერი თქვა, განაგრძო, - მატისს პარიზში უნდა შევხვედროდი და აქ წამოვყოლოდი. ძალიან გამიმართლა - ჩემი მეგობარი `დიორის~ მაღაზიაში გამყიდველად მუშაობს. მან შეძლო და ეს კაბა და ისიც, დილით რომ მეცვა, დროებით გამომატანა მაღაზიიდან. სხვაგვარად აქაურ სიტუაციას ვერ მოვერგებოდი, - თქვა ვესპერმა და დარბაზს თვალი გადაავლო. - განყოფილებაში როცა გაიგეს, რომ ერთ-ერთ 00 წოდების მქონე აგენტთან მომიწევდა მუშაობა, ყველა გოგონას შეშურდა ჩემი. ცხადია, ოპერაციის დეტალები არ იცოდნენ, მაგრამ ყველა 00 აგენტი ჩვენთვის გმირია. ეს თანამშრომლობა მეც დიდ პატივად მიმაჩნია.
ბონდი შეიშმუშნა^
- საერთოდ 00 აგენტის წოდების მიღება რთული არ არის. როცა თანამშრომელი ხალხის ცივსისხლიანად დასახოცად საკმარისად მომზადებულია, მალე იღებს ამ წოდებას. - თქვა კაცმა, - 00 აგენტიც ხომ მხოლოდ იმით გამოირჩევა, რომ მოწინააღმდეგეების ფიზიკური განადგურების სპეციალისტია. ამაში საამაყო არაფერია. 00 აგენტის წოდებას ნიუ იორკში იაპონელი კოდების გამშიფრავის გვამს და სტოკჰოლმში ნორვეგიელი ორმაგი აგენტის მკვლელობას ვუმადლი. როგორც ჩანს, ძალიან მნიშვნელოვანი და იშვიათი მოწინააღმდეგეები იყვნენ. მაგრამ მათაც იგივე ბედი გაიზიარეს, რაც იმ იუგოსლაველმა, ტიტომ რომ გაანადგურა. ერთი შეხედვით ყველაფერი ძალიან რთულია, მაგრამ როცა ეს შენი სამსახურია, უბრალოდ მითითებებს ასრულებ. როგორ მოგწონთ კვერცხი ხიზილალით?
- ერთმანეთს ძალიან უხდება, - თქვა ვესპერმა, - სადილი ძალიან მომწონს. საწყენი მარტო ისაა, რომ ჩვენ აქ... - ლინდი ბონდის გაყინულმა მზერამ შეაჩერა.
- ოპერაცია რომ არა, ჩვენ აქ არ ვიქნებოდით, - ცივად მიუგო ბონდმა.
ჯეიმსმა მიმოიხედა და მიხვდა, რომ უბრალო საქმიანი ვახშმისთვის ზედმეტად მეგობრული ატმოსფერო იყო და ინანა, ამდენი რომ ისაუბრა ისეთ თემებზე, რომლებსაც საქმესთან არანაირი კავშირი არ ჰქონდა. იმასაც მიხვდა, რომ ამჯერად თავად დახლართა სიტუაცია.
- მოდი განვიხილოთ, რა გვაქვს გასაკეთებელი, - უცებ ძალიან საქმიანი ხმით განაგრძო ბონდმა, - ახლავე მოგიყვებით, რის გაკეთებას ვაპირებ და მოვიფიქროთ, თქვენ რითი დამეხმარებით. სამწუხაროა, მაგრამ უნდა აღვნიშნო, რომ ბევრის გაკეთებას ვერ შეძლებთ.
- მოდით, ფაქტების კონსტანტირება მოვახდინოთ, - ასეთივე სერიოზული ხმით განაგრძო.
ბონდმა ვესპერისთვის გეგმის გაცნობა და შესაძლო ვარიანტების აღწერა დაიწყო.
მცირედი შესვენების შემდეგ ბონდმა და ლინდმა დელიკატესების მირთმევა განაგრძეს და კაცმაც საუბარი განაგრძო.
ვესპერი გულგრილი გამომეტყველებით უყურებდა, თუმცა დიდი ყურადღებით უსმენდა. გულის სიღრმეში ბონდის გაყინული ინტონაცია აღიზიანებდა და ძალიან სწყდებოდა გული, ს-ის ხელმძღვანელის რჩევებს მეტი ყურადღება რომ არ მიაქცია.
`საქმისთვის თავგანწირული კაცია~, - ვესპერს ხელმძღვანელის სიტყვები გაახსენდა, -`არავითარ შემთხვევაში არ იფიქრო, რომ ამ ოპერაციის დროს წამით მაინც გაერთობი~, - დავალებაზე გაშვების წინ უთხრა ს-მ ვესპერს. - `ოპერაციის მსვლელობისას ის მხოლოდ საქმეზე ფიქრობს და გარშემომყოფებისთვის ჯოჯოხეთურ ატმოსფეროს ქმნის. ბონდი თავისი საქმის ნამდვილი პროფესიონალია და მოწყენის საშუალებას არც შენ მოგცემს. საკმაოდ მომხიბვლელი მამაკაცია, მაგრამ ტყუილად თვალი არ დაადგა. არ მგონია, ან გული ჰქონდეს ან გრძნობების სიჭარბეს განიცდიდეს. ასეა თუ ისე, წარმატებას გისურვებ. თავს გაუფრთხილდი და უკან უვნებელი დაბრუნდი~.
ს-ის სიტყვები ერთგვარ გამოწვევას ჰგავდა. ამის ფონზე, ლინდს ძალიან ესიამოვნა, როცა შეამჩნია, რომ ბონდი მოხიბლა და დააინტერესა. მან გულის სიღრმეში იცოდა, რომ სწორედ ასე იყო. უბრალოდ, როცა ბონდმა გააანალიზა, რომ ვახშმისგან თვითონაც სიამოვნებას იღებდა, დაფრთხა, საუბრის მანერა შეცვალა და თავი ისე დაიჭირა, თითქოს ადამიანური სითბო მისთვის შხამი ყოფილიყო. ვესპერი თავს ნაწყენად გრძნობდა და ხვდებოდა, რომ სულელურ მდგომარეობაში ჩავარდა. უცებ, ყველა ეს აზრი გონებიდან განდევნა და კონცენტრირება ბონდის გეგმაზე მოახდინა. ლინდი დარწმუნებული იყო, რომ მსგავს შეცდომას აღარასდროს გაიმეორებდა.
- ... დღევანდელ საღამოს კი მთავარია ღმერთს ვთხოვოთ, რომ იღბალი ჩემს მხარეს იყოს და შიფრეს არ გაუმართლოს.
ბონდმა `ბაკარას~ თამაშის წესების ახსნა დაიწყო:
- `ბაკარა~ სხვა აზარტული თამაშებისგან დიდად არ განსხვავდება. ბანკის და მოთამაშეების შანსები თითქმის თანაბარია. ერთი პარტიაც საკმარისია იმისთვის, რომ ბანკი მოხსნათ, ან წააგოთ და თამაშს გამოეთიშოთ. ჩვენი ინფორმაციით, ამ საღამოს შიფრემ ეგვიპტური დაჯგუფებისგან `ბაკარას~ ბანკი იყიდა. ამ დარბაზში ყველა მაღალი მაგიდა ამ დაჯგუფებისაა. შიფრემ ეგვიპტელებს ამისთვის ერთი მილიონი გადაუხადა. ამ ფაქტის გათვალისწინებით, შიფრეს კაპიტალი ოცდაოთხ მილიონ ფრანკს შეადგენს. მეც დაახლოებით ამდენივე მაქვს. ვფიქრობ, მაგიდასთან ათი მოთამაშე იქნება. ჩვეულებრივ, ოვალურ მაგიდას ორ ნაწილად ჰყოფენ. ბანკირი ერთდროულად ეთამაშება მარცხენა და მარჯვენა მხარეებს. ბანკირმა ძალიან რთული გათვლები უნდა გააკეთოს და მაგიდის ორი მხარის ერთმანეთთან დაპირისპირების შედეგად დიდი თანხა უნდა მოიგოს. მაგრამ ჯერჯერობით როიალში ცოტა ხალხია და შიფრეც ერთ მხარესთან ითამაშებს. ასეთ დროს დიდი თანხის მოგების შანსი ნაკლებია, მაგრამ ბანკირი ხომ თავად გახლავთ შიფრე, ამას ცხადია, თავის სასარგებლოდ გამოიყენებს. მას ხომ ფსონების გაკონტროლების უფლება ექნება და ალბათ, ძირითადად, მაქსიმალურ ფსონებს მოითხოვს. ამგვარად, ბანკირი დანაყოფებიანი მაგიდის ცენტრში ზის. მის გარდა თამაშში მონაწილეობას იღებს კრუპიე, რომელიც ბანქოს არიგებს და ფსონებს აცხადებს, აგრეთვე პარტიის წამყვანი, თამაშის წესების დაცვას რომ უზრუნველყოფს. მე შევეცდები შიფრეს პირდაპირ დავიკავო ადგილი. მის წინ იდება ექვსი კარგად აჭრილი ბანქოს დასტა. დასტებთან ყველანაირი მანიპულაცია გამორიცხულია. კრუპიე კარგად ურევს, შემდეგ რომელიმე მოთამაშეს აჭრევინებს და ყველას თვალწინ მაგიდაზე აწყობს. არსებობს კიდევ ერთი ვარიანტი - ბანქოს დანომვრა. მაგრამ ამისთვის მინიმუმ კრუპიეს მოსყიდვაა საჭირო. ჩვენ კაზინოს თითოეული თანამშრომელი შევამოწმეთ - ყველა სუფთაა. მიუხედავად ამისა, ეს ვარიანტი მაინც ძალაშია და თამაშს თვალყური უნდა ვადევნოთ.
ბონდმა ცოტა შამპანური მოსვა და განაგრძო:
- ახლა რაც შეეხება თვითონ თამაშს. ბანკირი აცხადებს ხუთას ათასიან ფსონს. მაგიდასთან ყველა ადგილს თავისი ნომერი აქვს. ნუმერაცია ბანკირის მარცხენა მხარიდან იწყება. ნომერ პირველ მოთამაშეს შეუძლია მიიღოს ფსონი და ფული მაგიდის ცენტრში დადოს. ან შეუძლია თქვას `პასი~ ორ შემთხვევაში - თუ ფსონი ზედმეტად მაღალია მისთვის, ან თუ უბრალოდ მისი მიღება არ უნდა. ამის შემდეგ ნომერ მეორე მოთამაშის ჯერი დგება. თუ ისიც `პასს~ იტყვის - მესამის და ასე შემდეგ. თუ მაგიდასთან მჯდომი ყველა მოთამაშე უარს განაცხადებს, ფსონი საერთოდ ცხადდება და მოთამაშეები და ხანდახან მაგიდის ირგვლივ მდგომი მაყურებლებიც გაინაწილებენ. ყველა თავის წილს ჩამოდის და საბოლოოდ ხუთასი ათასიც გროვდება. ეს პატარა ფსონია და როგორც წესი, ყველა ეგრევე თანხმდება. მაგრამ როცა ბანკს ზედიზედ უმართლებს და ფსონი ერთ ან ორ მილიონამდე ადის, არათუ ერთი, მსურველთა ჯგუფის ნახვაც ძნელი ხდება. ამ თამაშში მე ვეცდები ყველა ფსონი მივიღო და იქამდე დავუპირისპირდე შიფრეს, სანამ ან მე გავაკოტრებ მის ბანკს, ან ის გამთიშავს თამაშიდან. ამას შეიძლება დიდი დრო დასჭირდეს, მაგრამ საბოლოოდ ერთ-ერთმა ჩვენგანმა უნდა გაიმარჯვოს. ამით ცხადია სხვა მოთამაშეებს არ შევურაცხვყოფ. ერთ-ერთი ჩვენგანის გაკოტრებაში ან გამდიდრებაში ისინი, ბუნებრივია, მიიღებენ მონაწილეობას. ჩემთან შედარებით შიფრეს მცირედი უპირატესობა აქვს, რადგან ბანკირია. მაგრამ ნერვებს ორი რამ მოუშლის. პირველი ის, რომ იცის, რისთვისაც ვარ აქ და მეორე, რისი იმედიც მაქვს, ის გახლავთ, რომ მან არ იცის, რა თანხაა ჩემს განკარგულებაში. ასე რომ, თამაშის დასაწყისში თითქმის თანაბარ პირობებში ვიქნებით.
ამასობაში მარწყვისა და ავოკადოს დესერტი მოიტანეს და ბონდმა საუბარი შეწყვიტა.
ცოტა ხანს ჩუმად მიირთმევდნენ დესერტს და შემდეგ, ყავის მოტანამდე, სხვა თემებზე ისაუბრეს. სიგარეტი მოსწიეს. სადილზე ბრენდი და ლიქიორი არც ერთმა არ დალია. ბონდმა გადაწყვიტა, რომ თამაშის არსის ასახსნელად ახლა შესაფერისი დრო იყო.
- თამაშის პრინციპს იოლად მიხვდებით. თუ `ოცდაერთობანა~ ერთხელ მაინც გითამაშიათ, გეცოდინებათ, რომ მისი აზრი იმდენი და ისეთი კარტის შეგროვებაა, რომ საბოლოო ჯამში თქვენი ქულა მოწინააღმდეგის საერთო ქულასთან შედარებით უფრო ახლოს იყოს ოცდაერთთან. `ბაკარას~ თამაშისას, მეც და ბანკირიც ორ-ორ კარტს ვიღებთ და თუ ვერც ერთმა ჩვენგანმა მაშინვე ვერ მოიგო, კიდევ თითო კარტის აღების უფლება გვაქვს. როცა ხელში ეს ორი ან სამი კარტი გიჭირავთ, ცხრა ან ცოტა ნაკლები ქულა უნდა შეაგროვოთ. ნახატიანი კარტი და ათიანები ნული ქულაა, ტუზი - ერთი ქულა, ყველა დანარჩენი კარტი კი თავის რიცხვს შეესაბამება. ქულების შეჯამებისას მხოლოდ ბოლო ციფრი ითვლება. ანუ თუ ცხრიანი და შვიდიანი გყავთ, ექვსი ქულა გაქვთ და არა თექვსმეტი. თუ ორივე მოთამაშეს თანაბარი ქულა დაუგროვდება, ახალი პარტია რიგდება. ის მოთამაშე იგებს, ვისი ქულაც ცხრასთან უფრო ახლოსაა.
ვესპერი მთელი ყურადღებით უსმენდა, მაგრამ თან მის სახეზე აბსტრაქტული ვნების ამოკითხვას ცდილობდა.
- მაშ, ასე, - განაგრძო ბონდმა, - თუ კარტის დარიგების შემდეგ, ეგრევე რვიანი ან ცხრიანი მომივიდა, კარტს ვხსნი და ავტომატურად ვიგებ, თუ, რა თქმა უნდა, მოწინააღმდეგესაც ასეთი კომბინაცია არ უჭირავს. ექვსი ან შვიდი ქულის დაგროვების შემთხვევაში, შეიძლება გამართლების იმედით ვითვალთმაქცო. თუ ხუთი ქულა შემიგროვდება, კარგად უნდა დავფიქრდე, მინდა თუ არა კიდევ ერთი კარტი. ხუთიანი `ბაკარაში~ ზღვარია. ასეთ დროს, ერთი კარტის ამატების შემთხვევაში, სიტუაციის გაუარესებისა და გაუმჯობესების შანსები თანაბარია. ბანკირს თავისი კარტის ნახვის უფლება მხოლოდ მას შემდეგ ეძლევა, რაც მე კიდევ ერთ კარტს მოვითხოვ, ან ვიტყვი, რომ ქულა შესრულებულია და მზად ვარ, კარტი გავხსნა. თუ ბანკირს ცხრიანი ან რვიანი მიუვა, კარტს გახსნის და მოიგებს; თუ რომელიმე სხვა კომბინაცია ექნება, ზუსტად ისე დაიწყებს ფიქრს, როგორც ჩემს მაგალითზე აგიხსენით. თუმცა, ბანკირს ერთი უპირატესობა მაინც აქვს. კარტის ამატება-არ ამატების გადაწყვეტაში, მას ჩემი მოქმედება ეხმარება. თუ კარტი არ ავიმატე, ბანკირი ჩათვლის, რომ ხუთი, ექვსი ან შვიდი ქულა მაქვს. თუ ავიმატე - ექვსზე ნაკლები, და ეცოდინება, რომ მის მიერ დარიგებული კარტით გავიუმჯობესე ან გავიუარესე მდგომარეობა. მნიშვნელოვანია ის ფაქტი, რომ ამატებული კარტი მაშინვე ტრიალდება და ბანკირიც უფრო იოლად გათვლის ჩემს შანსებს. რის შემდეგაც ან აიმატებს, ან არა. როგორც ხედავთ, ბანკირს მცირე უპირატესობა აქვს. ბანკირის სკამი გადაწყვეტილებების მიღებაში ეხმარება. თუმცა ხუთიანის შემთხვევაში რამის გათვლა ძალიან რთულია. ვერავინ მიხვდება, რას მოგიტანს ამატებული კარტი. ზოგი მოთამაშე, ხუთი ქულის დაგროვების შემთხვევაში, ყოველთვის იმატებს ერთ კარტს, ზოგი პირიქით, არასდროს რისკავს. მე ყოველთვის ჩემს ინტუიციას ვენდობი. რეალურად კი, - ახსნა დაასრულა ბონდმა, სიგარეტს მოუკიდა და ანგარიში მოითხოვა, - ყველაფერი იღბალზეა დამოკიდებული. მთავარი მაინც რვიანების და ცხრიანების მოსვლაა. იმედი მაქვს, ამ საღამოს მე უფრო მეტი რვიანი და ცხრიანი მომივა, ვიდრე მოწინააღმდეგეს.



Loading...

ტექსტის სანახავად გაიარეთ რეგისტრაცია.