ირემაძე თამთა - Iremadze Tamta

 (ხმები: 0)


(მაშინ)

ერთი ძუძუ დიდი მაქვს მეორეზე, ბებია სულ მეუბნება ეგ არაფერია, სხეულის მარჯვენა ნაწილი ყოველთვის უსწრებს მარცხენასო, არადა, ვიცი, რომ ჩემს კლასელებს ეგ პრობლემა არ აქვთ.
ვატარებ ისეთი ფორმის ლიფს, რომ მუქი ფერის ტანსაცმელზე არაფერი მეტყობა, თუმცა ყოველთვის ვიძაბები ვინმე თუ მკერდზე დამაცქერდება- მკლავებს ვაჯვარედინებ და მხრებში ვიხრები.
გულამოღებულებს არ ვიცმევ, არც სახლში და არც გარეთ.

მჯერა, რომ ვერ გავთხოვდები, რადგან ჩემმა გათხოვილმა მეგობარმა მითხრა ლიფით ვერ დაიძინებ ქმართანო.
ბანაობის დროს ჭერს ვაცქერდები ან თვალებს ვხუჭავ, ისე არ მიყვარს ჩემი ტანის დანახვა. არადა ყველაფერი ლამაზი მაქვს, თხელი მუცელი, წვრილი წელი, მეჯები, გრძელი ფეხები და ეს მკერდიც რომ მქონოდა ნორმალური რა იქნებოდა?!
ერთმა ახალგათხოვილმა გოგომ ერთ საღამოს სასხვათაშორისოდ მითხრა: შენ შავგვრემანი რომ ხარ მუქი ძუძუსთავები გექნება ჩემსავით, ჩემს ქმარს ზუსტად ეგ მოსწონს ჩემში ყველაზე ძალიანო.
მერე მე ვკითხე კიდევ რა უყვართ კაცებს მეთქი და პატარა ძუძუს თავებიო, ანუ გადღლარზული კანზე არაო. ვერ გავიგე, მაგრამ სახლში რომ ავედი პირველად სარკეში მაშინ დავაკვირდი ჩემს მკერდს და მელამაზა.
მაშინ ვიგრძენი, რომ ნაკლი შეიძლება ნაკლი არც კი ყოფილიყო და ნათიას დაბადების დღეზეც თამამად წავედი მეორე კვირას.

ბიჭზე არასოდეს მიფიქრია, დედას გოგო ვიყავი და ხუთოსანი. დედა ყველასთან ამაყობდა: ამან სკოლისა და სახლის მეტი არაფერი იცის, ზოგი გოგო ამის ასაკში მარტო შეყვარებულობაზე რომ ოცნებობსო.

ნათიას დაბადების დღეზე ვიცეკვეთ მე და ლაშამ-
ვიგრძენი,
რომ უფრო ლამაზი და სასურველი ვიყავი, ვიდრე მეგონა.
ვიგრძენი,
რომ კარგი იყო ცეკვა და სხვანაირი.
ვიგრძენი,
რომ მუცლის დაბლა რაღაცნაირად მოვდუნდი და მუცელი ამტკივდა.
ახლაც, როცა ვიხსენებ მაგ ღამეს- მუცელთან რაღაც მივლის და თავბრუ მეხვევა.
თვალდახუჭული რომ ვუსმენ იმ სიმღერას, რაზეც ვიცეკვეთ- მეტირება
და ცეკვა მინდება.
მაშინ პირველად აღარ მინდოდა სკოლა და სახლი, მაშინ პირველად აღარ მინდოდა ჩემი ხუთოსნობა, მე ლაშა მიყვარდა და იმ ცეკვაზე ფიქრი მავსებდა.

სახლამდე გამაცილა, მკლავი გადამხვია და ხელის მტევანი დამადო იმ პატარა ძუძუზე, რომელსაც მარტო ლიფის ფორმით ვხდიდი მეორესთან თანაბარს.
არ შემეშინდა,
არც შემრცხვა,
პირიქით, მინდოდა რომ ხელი არ აეღო და გვევლო ასე მთელი ღამე.
მეორედ მაშინ მელამაზა და შემიყვარდა ჩემი მკერდი, მისი ხელის ქვეშ.
ჩვენ ვიარეთ.


(ახლა)
მძინავს ლიფის გარეშე და ლიფითაც. ლაშა იცინის, რომ ერთი ძუძუ უფრო დიდი მაქვს, ვიდრე მეორე. მეც ვიცინი, ცოტა დაძაბულად, მაგრამ მაინც. ის მკოცნის პატარა ძუძუზე და ვუყვარვარ.

- მრგვალი მუცელი გაქვს, წვეტიანი არაო და გოგო გეყოლებაო, მეუბნება ბებია.
მკერდი შემევსო და
- უფრო შეგევსება, ბავშვი რომ გეყოლებაო, მეფერება მუცელზე დედა.
ლაშა ამბობს, თუ გოგო გეყოლება შენნაირი ლამაზი იქნებაო.
ცოტა მეშინია,არ მინდა ჩემი ნაკლი დაყვეს ჩემს გოგოს. არა, არკი მეშინია, უბრალოდ არ მინდა რომ დაყვეს.
მინდა, ჩემი გოგო სრულყოფილი იყოს და გინდა არც იყოს, ჩვენ გვეყვარება.

ლაშა ერთ რამეზე მსაყვედურობს მხოლოდ:
- ნუ იცი ხოლმე ხელების გადაჯვარედინება და მხრებში ამოხრილი ნუ დადიხარ მოხუცი ქალივითო.

მკერდს აღარ ვმალავ და ასე რატომ დავდივარ მეთქი, მეც მიკვირს ჩემი თავის.



Loading...

ტექსტის სანახავად გაიარეთ რეგისტრაცია.