მანანა ბოჭორიშვილი - ჩამკიდე ხელი და წავიდეთ ბებია

 (ხმები: 1)


ჩამკიდე ხელი და წავიდეთ ბებია,
უნდა გაჩვენო ლამაზი მინდვრები.
ამ სილამაზეს შევხარი წლებია,
ბედი რომ გქონია უთუოდ მიხვდები.
განა ყველას აქვს ასეთი სამშობლო,
სამოთხის სადარი მთა და ველებია,
მიყვარს ყველაფერი და მინდა დავლოცო
დიდი თუ პატარა, ყველა ჩემები ხართ.
მინდა მოიყაროთ სუყველა ჩემხელა,
გიყვარდეთ მამული, თქვენი საქართველო,
მის სილამაზეს ვერარა შეედრება
იმრავლოს ქართველმა და მუდამ ასახელოს.
მადლობა უფალს რომ სწორედ აქ გავჩნდით,
აქ,ამ დალოცვილ ადგილზე, მიწაზე,
გიყვარდეთ,იცავდეთ და ვალში არ დარჩეთ
გამჩენის საამოდ და მტერთა ჯინაზე.
დავდივარ, შევყურებ ამ სილამაზეს და
ვლაღობ, ვერ ველევი, სიცოცხლე მწადია,
ვიცი რომ მიხვდები, შენც იამაყებ მას,
სამშობლოდ საქართველო ხომ მართლაც მადლია.
ღმერთმა თავად უწყის ვინ რით ანებივროს,
წყალობა ჩვენს თავზე ნამდვილად დიდია,
გონი გაგინათდეთ, თვალნი აგეხილოთ,
საქმით დაამტკიცეთ რომ ღირსი შვილნი ხართ.
თქვენს ლამაზ სამშობლოს მიხედეთ შვილებო,
თვალს ნუ დაიჭერთ სხვა ქვეყნად წასვლაზე,
უფალმა დაგლოცოთ, სიკეთე ინებოს,
წასულნიც დაბრუნდნენ და ქართველი გამრავლდეს.
შევყურებ ამ ცას, ამ მიწას,ამ მდელოს,
გული სითბო და სიამით მევსება,
ანდერძად გიტოვებთ მტერს არ დაანებოთ,
მიყვარს, მივდივარ და იმედი მექნება,
რომ მზეც ამოვა და ნატვრაც აუხდება,
დრო მოვა მისთვისაც დრო დალხინებისა,
ტკივილს დაივიწყებს, ჟამი დაუდგება
წინსვლისა, დიდების და გაბრწყინებისა.

/მანანა ბოჭორიშვილი/




ტექსტის სანახავად გაიარეთ რეგისტრაცია.