ნანა სელეპანოვა - ვაგლახ,ქალი ვარ

 (ხმები: 2)


ნეტავ შენს ახლოს მამყოფა,
შორიდან გითვალთვალებდი,
რომ მხოლოდ შენთვის მეცქირა
ე, მაგ თაფლისფერ თვალებში.
ჩამოვივლიდი შენ სახლთან,
ზოგჯერ ნერვებზეც მოგშლიდი,
მერე გაბუტულ ტკბილ ტუჩებს
მალიმალ დაგიკოცნიდი.
რატომ მზე არ ვარ ცხრათვალა,
თვალებში გიციმციმებდი
და შენი ხილვით ნამთვრალი
ჩუმჩუმად ჩავიცინებდი.
ანდა მქნა ბალის კუნწულად
ყურზედა დაგეკიდები,
ანდა ზღვა ვიყო, სხეულზე
ტალღებად დაგედინები.
ან ვიყო ხარი ნიკორა,
შენთვის ცხრა უღელს გავწევდი,
მთის წყარო ვიყო ანკარა,
ჩაივლიდი და დამლევდი.
ჩიტი,რომ ვიყო ნიბლია,
ხელებზე დაგიფრინდები,
იმ ნატყორცნ ისრად მაქვია
შენ რომ არ აიცილებდი.
შენ ჭური იყო, მე ღვინო,
პირთამდე ამოგავსებდი,
ნეტავ, ჭა ვიყო უძირო,
მიყვარხარ,ჩამომძახებდი.
მერეც,რასაც კი ვინატრებ,
შენთვის არ დავიშურებდი,
ვაგლახ,ქალი ვარ,დავდივარ
კაბების შარიშურებით.



Loading...

ტექსტის სანახავად გაიარეთ რეგისტრაცია.