დათო ალოური - ერთმანეთს ისე შემოვეყარეთ

ერთმანეთს ისე შემოვეყარეთ
ჩემი ცხოვრების გზაზე,
რომ უნებურად შემომეყვარე,
მიხარიხარ და მავსებ...

ჩემი გახდი და აღარ დამტოვო...
ამ სიყვარულის ხათრით
შენი სხეული უნდა მათხოვო
ჩვენი შვილისთვის - ცხრა თვით.

მე შენგან მინდა მხოლოდ და მხოლოდ
ფშავლის თავნება ბიჭი.
მამის თვალები გამოვაყოლოთ
და სიყვარულის ნიჭი.

რომ გაგვახსენდეს შენი წარსული
ვაჟს მოვაყოლოთ ქალი.
მინდა შენ გგავდეს ჩემი ასული -
დედის ალი და კვალი...

მერე გაივლის კიდევ ცხრა თვე და
კიდევ ცხრა თვე და ცხრა თვე...
მინდა სულ ასე გვერდით მყავდე და
მინდა სულ შენით გავთბე.

ერთმანეთს ისე შემოვეყარეთ,
აზრი აღარ აქვს მალვას,
გნახე თუ არა, შემომეყვარე
და დაგიჩემე ქალავ...