დათო ახლოური - აღუვსებელი საწყაული ხდება საწუთრო



აღუვსებელი საწყაული ხდება საწუთრო,
ბედნიერების ძიებაში თუკი მოცდები...
როგორ გავბედავ დაგიჩემო, დაგისაკუთრო,
ისე კარგი ხარ, მეშინია შენზე ოცნების...

ჩემო პატარა ანგელოზო, ჩემო არაკო,
საოცარია - ამდენ ქალში ჩანხარ ეული...
მსურს ჩემს წყვდიადში მზის სხივივით შემოანათო,
მერე მკლავებზე დავიფინო შენი სხეული...

სულაც არ მინდა სხვამ იხილოს შენში ღვთაება,
მხოლოდ ჩემია შენი სითბო, შენი ალერსი...
ბევრჯერ მომხიბლეს სილამაზით ლამაზმანებმა...
მაგრამ შენ სხვა ხარ - უნაზესი, უანკარესი.

ალბათ ამიტომ მაინც გიხმობ, მაინც გიჩემებ,
სხეულს სწყურიხარ, გულს უნდიხარ,
რა ვქნა- ქალი ხარ...
არ გამებუტო, მაპატიე დღეს ეს სიწრფელე,
მაგრად მიყვარხარ, შენ ხომ ჩემი დედოფალი ხარ.



Loading...

ტექსტის სანახავად გაიარეთ რეგისტრაცია.