სოტკილავა ზურაბ - Sotkilava Zurab



ზურაბ ლავრენტის ძე სოტკილავა დაიბადა 1937 წლის 11 მარტს. საქართველოს (1972) და სსრკ (1979) სახალხო არტისტი, შოთა რუსთაველის სახელობის სახელმწიფო (1998), ზაქარია ფალიაშვილის სახელობის (1983) პრემიების, აგრეთვე ახალგაზრდობისა და სტუდენტთა საერთაშორისო ფესტივალის (სოფია, 1968, მთავარი პრიზი “ოქროს ორფევსი”), ვოკალისტთა პ. ჩაიკოვსკის სახ. IV საერთაშორისო კონკურსის (მოსკოვი, 1970) და ვოკალისტთა ფ. ვინიასის სახელობის საერთაშორისო კონკურსის (ბარსელონა, 1970, I პრემია და “გრან–პრი”) ლაურეატი. ბოლონიის ხელოვნების აკადემიის საპატიო წევრი (1980).
1960 დაამთავრა საქართველოს პოლიტექნიკური ინსტიტუტი, 1965 – თბილისის სახელმწიფო კონსერვატორია (დ. ანდღულაძის კლასი). 1965–74 ზ. ფალიაშვილის სახელობის თბილისის ოპერისა და ბალეტის სახელმწიფო აკადემიური თეატრის სოლისტი იყო. 1966–68 სტაჟირება გაიარა მილანის საოპერო თეატრ “ლა სკალაში”. 1974–იდან მოსკოვის დიდი თეატრის სოლისტია. სოტკილავას აქვს ძალზე ლამაზი ტემბრის ხმა, მისი სიმღერა გამოირჩევა მგზნებარე ტემპერამენტით, ლირიული სიფაქიზით და დახვეწილი ოსტატობით. პარტიები: აბესალომი (ზ.ფალიაშვილის “აბესალომ და ეთერი”), არზაყანი (ო. თაქთაქიშვილის “მთვარის მოტაცება”), მანრიკო, ოტელო, რიჩარდი, რადამესი, ჰერცოგი (ჯ. ვერდის “ტრუბადური”, “ოტელო”, “ბალ–მასკარადი”, “აიდა”, “რიგოლეტო”), ხოზე (ჟ. ბიზეს “კარმენი”), კავარადოსი (ჯ. პუჩინის “ტოსკა”) და სხვა. ეწევა საკონცერტო მოღვაწეობასაც, განსაკუთრებული ოსტატობით ასრულებს ქართულ ხალხურ (მეგრულ) სიმღერებს (“სისატურა”, “ასე ჩონგური” და სხვა). გასტროლებს მართავს მსოფლიოს მრავალ ქვეყანაში, პერიოდულად ჩამოდის თბილისშიც.



Loading...

ტექსტის სანახავად გაიარეთ რეგისტრაცია.