დათო ახლოური - შენ ჩემი სიყვარული ხარ

შენ ჩემი სიყვარული ხარ,
ჩემი ოცნების ქალი,
ჩემი სული და გული ხარ,
სინათლე ორთავ თვალის.

ჩემი ღმერთი და რწმენა ხარ,
ცა ხარ, მიწა ხარ, მზე ხარ...
ჩემი ოცნება შენა ხარ,
ჩემი სიცოცხლეც შენ ხარ...


დათო ახლოური - ცივი დღე იქნება

ცივი დღე იქნება,
მერე მზე იქნება,-
ასე დააწესა გამჩენმა.
ვიღაც შეიცვლება,
რაღაც შეიცვლება,
რაღაც ძველებურად დარჩება.
ერთხელ მეყვარება
და ამ შეყვარებას
ბედი გაიმეტებს სასჯელად.


დაგეძებ ფიქრებში ლანდივით დარჩენილს

დაგეძებ ფიქრებში
ლანდივით დარჩენილს,
ოცნება ტკივილებს
აყუჩებს,
იმედი კი არა,
სიცოცხლე ხარ ჩემი,
მოვალ,
დაგიკოცნი მაგ ტუჩებს...
თუმცა კი აღარ ვართ
შეშლილი ბავშვები
და აღარ ვახსოვართ
ამ ქუჩებს,
ბოლომდე მე შენი
ერთგული დავრჩები,
მოვალ და
სიყვარულს გაჩუქებ!


დათო ახლოური


გულს ასე ნაცნობს და ახდილს

გულს ასე ნაცნობს და ახდილს,
ეხვევი ვით ჭიგოს ვაზი.
შენ ჩემი სამყარო გახდი
და ჩემი ცხოვრების აზრი.

,,მიყვარხარ, მიყვარხარ, -ამბობ,
- შენა ხარ სიცოცხლე ჩემი..."
ტუჩებზე შერჩენილ ამბორს,
ვერასდროს წაგიშლის ცრემლი,


მთელი ცხოვრება ვიღაც მიყვარდა - დათო ახლოური

მთელი ცხოვრება ვიღაც მიყვარდა,
მწამდა ვიყავი ღმერთის რჩეული...
მე შენგან წლები ვერ გამრიყავდა,
დამიფარავდა შენი სხეული.

მე შენგან წლები ვერ გამრიყავდა,
არ ვიქნებოდი ზამთრით ვნებული.
რადგან ჯიუტი სულის ვიყავ და
მარადიული შეყვარებული.


დათო ახლოური


გაქვს ლამაზი თვალები

გაქვს ლამაზი თვალები,
მშვენიერი ტანი.
ტუჩზე გეალერსება
ჩამოშლილი თმები.
ვარ ათასი დეკემბრის
კიდევ გადამტანი,
ვთბები შენი ალერსით,
სიყვარულით ვთბები.


ვხეტიალობ შენს ქუჩაზე ეული

ვხეტიალობ შენს ქუჩაზე ეული და
გულში ისევ ბინდისფერი ბატონობს...
თითქოს სული გაქცეულა სხეულიდან,
დამტოვე და... არ მინდა რომ დამტოვო...

დავემხობი, მივეცემი დავიწყებას,
წასვლას შევთხოვ ბედისწერას ვადამდე...
ამ საღამოს ღვთისმშობელი გამიწყრება,
რადგან ვიცი - ბინდისფერი გადამრევს.


რამდენი ვინმე მიყვარდა ადრე

რამდენი ვინმე მიყვარდა ადრე,
რამდენი ვინმე ვიწამე ღმერთად.
ვიხსენებ ახლა გარდასულ კადრებს,
სულში წარსული ჯერ ისევ ფეთქავს...

ზოგჯერ ველტვოდი ქალებს- ვნებიანს,
ზოგჯერ თვალები მომწონდა ბავშვის...
თურმე არავინ არ მყვარებია,
მე შენს სიყვარულს ვსწავლობდი მაშინ.


დათო ახლოური


ლამაზ ქალს რომ დავინახავ

ლამაზ ქალს რომ
დავინახავ,
გ ე ნ ა ც ვ ა ლ ე -
აღმომხდება...
შენი მსგავსი
არ მინახავს,
ერთს გაკოცებ -
რა მოხდება?


შეჩერებულან

შეჩერებულან,
გათოშილან
ჩემთვის წუთები...
რამდენი რამე დამრჩენია
შენთვის უთქმელი.
გიხსენებ შენ და
მოგონებებს
ვესათუთები...


მცხეთა

აქ მესხები შემოსულან თურმე,
მეც ნაკვალევს დავეძებდი მესხთა...
გზაზე ვიღაც მიუყვება ურემს,
მთვარის შუქში განაბულა მცხეთა.


წუხელ მთელი ღამე უსაშველოდ წვიმდა

წუხელ მთელი ღამე
უსაშველოდ წვიმდა,
წუხელ მთვარის ცრემლი
მიწამ მუცლად იღო...
ისევ მარტო ვიყავ,
უშენობა მწყინდა,
დღეს კი
გათენდა და
წვიმამ გადაიღო...