ნანა სელეპანოვა - რა უცნაურად

 (ხმები: 0)


რა უცნაურად შემოიჭერ
წუხელის ჩემში,
გაოცებული გიღიმი და..
სინათლეს ვაქრობ,
მოცურავს ჩემსკენ მოცახცახე
ხელები შენი
და გული ჩემი საგულედან
დაღწევას ლამობს.

შეჩერდი წამით, გათვლილია
ყოველი წუთი,
ამ სიჩქარეში კოცნას ნუღარ
გადამაფიქრებ,
მე უკანასკნელ მოფერებას შენსას
არ ვუფრთხი,
შენი სხეულის შემოღწევა
სულში მაშინებს.

არ ვიცი, ახლა, რას ვაპირებ,
ან რას ჩავიდენ,
დამტოვე მარტო, ო, შენ არა,
მე სხვას ვეძახდი,
და უძინარი დამძიმებულ
თვალებს ვაძინებ,
სული შორს მიჰქრის, სული
ჩემი მოუსვენარი.

რა უცნაურად ცარიელი
ღამეა ჩვენთვის
და უსასრულოდ გაწელილი
ვნების ქაოსი,
ჩვენ უცნაურად სიზმარეთში
ერთმანეთს შევრჩით,
ვით უკვდაქმნილი ორი
სული სააქაოში.



Loading...

ტექსტის სანახავად გაიარეთ რეგისტრაცია.