ნანა სელეპანოვა - მე არასოდეს, ასე ძლიერ არ მყვარებია

 (ხმები: 12)


აჰა, დავბრუნდი იქ, წარსული
თავს, რომ მახსენებს,
სად ჭრილობები არ ხორცდება,
გული არ ფეთქავს,
თუმც დავივიწყე სიამაყე,
ვინ გამამხნევებს,
ეს სინანულმა იცის ხოლმე,
ასეთი სევდა.

გადავაბიჯებ ნაცნობ ქუჩებს,
ქუჩებს ეკლიანს,
მზე მინდა ახლა, თაკარა მზე,
ცაზე როს ელავს,
ნაცნობ ქუჩებში, ნაცნობ სიტყვებს
ისევ მეტყვიან,
ეს მონატრებამ იცის ხოლმე,
ასეთი სევდა.

მოდი, გამენდე, მიმახვედრე,
სულ ერთი სიტყვით,
რაც არ მითხარი, რაც მითხარი,
რაც უნდა გეთქვა,
თორემ სურნელი გაზაფხულის
მე არად მიღირს,
ეს სიყვარულმა იცის ხოლმე,
ასეთი სევდა.

ახლოს ხარ, მაინც სიმარტოვეს,
რატომ განვიცდი,
ან გრძნეულ ისარს მარტოხელას,
როდის მესვრიან,
რა მეშველება, ღმერთო ჩემო,
რით ვეღარ მივხვდი,
მე არასოდეს, ასე ძლიერ
არ მყვარებია!




ტექსტის სანახავად გაიარეთ რეგისტრაცია.