მე გუშინ მოვკვდი შუაღამით საათის ოთხზე

 (ხმები: 4)


მე გუშინ მოვკვდი შუაღამით საათის ოთხზე,
გათეთრდა ცა და ქუჩის ბოლოს აყეფდა ძაღლი,
ხეები ჰგავდნენ ნასუფრალზე წაქცეულ ბოთლებს,
ქარი იყო და უჩვეულოდ დადუმდა სახლი.

მე გუშინ მოვკვდი, მიპოვნიან გარდაცვლილს დილით,
ცხელება მწვავდა, მთელი ღამე ვბორგავდი წუხელ,
კუთხეში მდგარი ჩემი სული საოცრად მშვიდი
შუბლზე მადებდა სიცივისგან დახეთქილ ტუჩებს.

იდგა მარტი და გადარჩენას არ ჰქონდა აზრი,
ვიყავი მარტო და აღარსად არ იყო ღმერთი,
მიყვარდი ძლიერ, ათ ცოდვაში ბოლომდე გასვრილს
და უფლის ყველა სასწაულში გიწამე ერთი.

არ ჩადგა ქარი, უმოწყალოდ ამტვრევდა თითებს
ხეებს და გაიწელა სევდაც მარტივით,
მე ჩემს ბინაში მიპოვნიან გარდაცვლილს პირქვე,
ანდა იქნება გაცილებით უფრო მარტივად...

მე გუშინ მოვკვდი შუაღამით საათის ოთხზე,
გათეთრდა ცა და ქუჩის ბოლოს აყეფდა ძაღლი,
ხეები ჰგავდნენ ნასუფრალზე წაქცეულ ბოთლებს,
ქარი იყო და უჩვეულოდ დადუმდა სახლი...




ტექსტის სანახავად გაიარეთ რეგისტრაცია.