სასწაული ქაშვეთში და მეორე ხელთუქმნელი ანჩისხატის ისტორია

 (ხმები: 7)


წელიწადში ერთხელ, როდესაც მზის სხივი ტაძარში გუმბათიდან ატანს და კანკელს ზემოდან ადგება, ხელთუქმნელი ხატი სიცოცხლეს იძენს. იგი იწყებს ღვთაებრივ ბრწყინვალებას და ტაძარს არაამქვეყნიურ ფერებში ანათებს... - გვესაუბრება ქაშვეთის წმინდა გიორგის სახელობის ტაძრის მღვდელმსახური, დეკანოზი ღვთისო (შალიკაშვილი).

ქაშვეთი, სასწაულზე ნაგები ტაძარი

სასწაული ქაშვეთში და მეორე ხელთუქმნელი ანჩისხატის ისტორია


ქაშვეთის ტაძრის წარმოშობა მამა დავით გარეჯელის სახელთანაა დაკავშირებული.
ამ ადგილას ადრე დედათა მონასტერი იყო, სადაც ხშირად დადიოდა მთაწმინდის ერთ-ერთ გამოქვაბულში დაყუდებული მამა დავითი.
ქურუმებს სურდათ, დავითი თბილისიდან განედევნათ და კვლავ ცეცხლის თაყვანისცემა გაეგრძელებინათ. ამ ბოროტი განზრახვის აღსასრულებლად მათ ცილისწამებას მიმართეს.
მოგვებმა ფეხმძიმე დედაკაცი მოისყიდეს და მამა დავითს მასთან მრუშობა დასწამეს. ისინი დავითის დასჯას ითხოვდნენ.
მამა დავითმა დედაკაცს სთხოვა, სიმართლე ეთქვა, მაგრამ დედაკაცი უნამუსოდ მას სდებდა ბრალს.
მაშინ წმინდა ბერი უფალს შეევედრა, ხალხისთვის სასწაული ეჩვენებინა - აიღო ჯვრიანი კვერთხი, შეეხო დედაკაცის მუცელს და უფლის სახელით ჩვილს უბრძანა, ეუწყებინა ნამდვილი მამის სახელი.
მოხდა სასწაული და ჩვილმა დედის მუცლიდან ხმა ამოიღო - ამბობდა, რომ მამამისი მჭედელი იყო.
მამა დავითმა დედაკაცს უთხრა: „შენ ქვას შობ“ და ასეც მოხდა, დედაკაცმა ქვა შვა.
აღელვებულმა ხალხმა კი დედაკაცი ქვით ჩაქოლა.
ამის შემდეგ ამ ადგილას ტაძარი ააგეს, რომელსაც ქვაშვეთი ანუ ქაშვეთი ეწოდა.
მამა დავითი კი ამ ამბების შემდეგ თბილისს განერიდა და გარეჯის უდაბნოში დასახლდა.

ანჩისხატის ისტორია

იესოს მოღვაწეობის დროს ედესის მართავდა ავგაროზი, რომელიც დასნეულებით იყო ავად.
მან გაიგო რა მაცხოვრის სასწაულმოქმედი ძალის შესახებ, იესო ქრისტესთან გაგზავნა თავისი წარმომადგენელი, რომელსაც წერილი გაატანა. წერილში ავგაროზ მეფე მაცხოვარს განკურნებას სთხოვდა.
მაცხოვარმა უარი თქვა ედესაში წასვლაზე. მაშინ ავგაროზმა კარის მხატვარი გაგზავნა, რათა ქრისტეს სახე დაეხატა, რადგან სწამდა, რომ შეხედვითაც კი განიკურნებოდა.
თუმცა მხატვარმა ვერ შეძლო, მაცხოვრის სახე დაეხატა. მაშინ იესომ მას ტილო გამოართვა, დაასველა და სახეზე მიიფარა. ტილოზე იესოს სახე სასწაულებრივად აღიბეჭდა.
ეს არის პირველი ხელთუქმნელი ხატი, რომელსაც დასაწერად ადამიანის ფუნჯი არ შეხებია.

უფლის ხატის სასწაული

სასწაული ქაშვეთში და მეორე ხელთუქმნელი ანჩისხატის ისტორია


ქაშვეთის მაცხოვრის ხელთუქმნელი ხატი ანჩის ხატის ასლია, თუმცა ბევრჯერაა რესტავრირებული.
ხატი ტაძრის ცენტრალური შესასვლელი კარის თავზეა დაბრძანებული და მას დიდი სასწაული უკავშირდება.
სასწაულამდე ცოტა ხნით ადრე, მამა სოგრატის სურვილით, ხატი ჩარჩოში ჩაისვა, რათა უფრო დაცული ყოფილიყო და დიდხანს შენარჩუნებულიყო.
ქაშვეთის ერთ-ერთი რესტავრაციის დროს, როდესაც შიდა კედლებს ათეთრებდნენ, შენიშნეს, რომ ხატი ადგილიდან იყო დაძრული და ქვემოთ დაბრძანებული აღდგომის ხატის უკან იყო ჩასული.
მაცხოვრის ხატი უკან ამოაცურეს და მისი ჩარჩოში დაბრუნება მოინდომეს.
სწორედ ამ დროს იხილეს სასწაული: უფლის სახე ხატის შუშაზე იყო გადასული. ხატსა და შუშას ერთმანეთთან შეხება არ ჰქონიათ, რადგან მათ შორის დიდი ადგილი იყო დატოვებული. მიუხედავად ამისა, შუშაზე მკაფიოდ აღიბეჭდა მაცხოვრის სახე.
ასე გაჩნდა ქაშვეთის ტაძარში ღმერთის კურთხევით ორი ხელთუქმნელი ანჩის ხატი.

ტაძრის მსახურების გადაწყვეტილებით, ანჩის ხატის ასლის შუშა, რომელზეც მაცხოვრის სახება აღიბეჭდა, გადაიჭრა და მხოლოდ ის ნაწილია კედელზე დაბრძანებული, რომელზეც უფლის სახეა გადასული.
ამჟამად ანჩის ხატის ასლი და მისი, სასწაულით გადასული მეორე ხატი ერთმანეთის წინ არიან დაბრძანებულნი.
წელიწადში ერთხელ, როდესაც მზის სხივი ტაძარში გუმბათიდან ატანს და კანკელს ზემოდან ადგება, ხელთუქმნელი ხატი სიცოცხლეს იძენს. იგი იწყებს ღვთაებრივ ბრწყინვალებას და ტაძარს არაამქვეყნიურ ფერებში ანათებს. ქაშვეთი ამ დროს ულამაზესი სანახავია.
უფალი ამ და სხვა სასწაულით ადამიანებს თავს გვახსენებს და გვეუბნება, რომ ჩვენთანაა.
დიდება უფალს.

ავტორი: ლევან გველესიანი

funtime.ge




ტექსტის სანახავად გაიარეთ რეგისტრაცია.