უცნობი ფაქტები „ტიტანიკზე“

 (ხმები: 5)


15 აპრილს ზუსტად 100 წელი შესრულდა მას შემდეგ, რაც საკრუიზო ლაინერი „ტიტანიკი“ აისბერგს შეეჯახა და ატლანტის ოკეანეში ჩაიძირა. ლეგენდარული რეისის შესახებ ძალიან ბევრი მითი არსებობს, თუმცა ბრიტანულმა გაზეთებმა ის 10 ფაქტი გამოქვეყნეს, რომლებიც მათი ინფორმაციით, რეალურია და აქამდე, უმრავლეობისთვის უცნობი იყო.

1. 1912 წლის 14 აპრილს, საღამოს, პირველი კლასის მგზავრები უძვირფასეს ვახშამს მიირთმევდნენ. კერძებს შორის იყო ორაგული, საქონლის ხორცის ფილე, ბატკნის ხორცი პიტნის სოუსით, ვალდორფის პუდინგი, შოკოლადის ეკლერი. თითოეულ კერძისთვის სხვადასხვა სახეობის ღვინო იყო განკუთვნილი.

2. „ტიტანიკს“ ჰქონდა თავისი გაზეთი. გამოცემა სახელწოდებით The Atlantic Daily Bulletin ყოველდღიურად გამოდიოდა. მასში წაიკითხავდით ბირჟის სიახლეებს, ახალ ამბებს, ცხენების შეჯიბრის შედეგებს, ჭორებსა და „ტიტანიკის“ ყოველდღიურ მენიუს.

3. უდიდეს გემზე, გარდა იმისა, რომ ყველა აუცილებელი პირობა იყო შექმნილი, რომ ადამიანს თავი კომფორტულად ეგრძნო, მუშაობდა, ასევე ე.წ. თურქული აბანოები, ბიბლიოთეკები, ტენისის კორტები, რა თქმა უნდა, საცურაო აუზი და ლაზარეთიც კი, სადაც ოპერაციის გაკეთებაც კი იყო შესაძლებელი.

4. მართალია, „ტიტანიკს“ შეეძლო ეამაყა, რომ იმ დროის ყველაზე მდიდარი და ცნობილი ადამიჯანები იყვნენ მისი მგზავრები, მაგრამ აღმოჩნდა, რომ ორმა ასეთმა ადამიანმა ბოლო წუთებში უარი თქვა გემით მოგზაურობაზე. ესენი იყვნენ ფინანსური მაგნატი ჯონ პირპონტი და შოკოლადის მწარმოებელი მილტონ ხერში.

5. „ტიტანიკის“ ტრაგედიიდან ერთი თვეც კი არ იყო გასული, რომ მუნჯური კინოს მსახიობმა დოროთი გიბსონმა, რომელიც გემზე იმყოფებოდა და კატასტროფას გადაურჩა, ითამაშა ფილმში „ტიტანიკის გადარჩენა“. მსახიობი იმავე კაბით თამაშობდა, რაც იმ საბედისწერო რამეს ეცვა. ფილმს უდიდესი წარმატება ხვდა წილად ამერიკასა და ბრიტანეთში, თუმცა მისი ყველა ასლი 2 წლის შემდეგ, ხანძრის შედეგად, განადგურდა.

6. ცოტა ხნის წინ აღმოაჩინეს ვიოლინო, რომელიც „ტიტანიკის“ მუსიკოსს, უოლეს ჰარლის ეკუთვნოდა. ტესტები, რომლებმაც საბოლოოდ უნდა დაადასტუროს, რომ ვიოლინო მართლაც ჰარლისაა, ჯერ არ დასრულებულა, თუმცა თუ ეს მართლაც ასე აღმოჩნდება, მისი ფასი „ტიტანიკის“ ყველა სხვა ნივთის ფასს რეკორდულად გადააჭარბებს. 2007 წელს გემის ფოსტის გასაღები დიდ ბრიტანეთში 101 000 ფუნტად გაიყიდა.

7. ერთ-ერთი გადარჩენილი მგზავრის სახლი მუზეუმად იქცა. 1910 წლის შენობა, რომელიც დენვერში მდებარეობს, მარგარეტ ბრაუნს ეკუთვნოდა, რომელიც შემდგომ ცნობილი გახდა, როგორც „ჩაუძირავი მოლი ბრაუნი“. ბრაუნმა ძალიან ბევრი ადამიანი გადაარჩინა იმით, რომ ეხმარებოდა მათ სამაშველო ნავებში ჩასხდომაში. როცა უკვე გადარჩენილს მას ჰკითხეს, - რას უნდა უმადლოდეს, რომ არ დაიღუპა, მან განაცხადა, „ბრაუნების ჩვეულებრივი წარმატებაა, ჩვენ ხომ ჩაუძირავები ვართ“.

8. უკანასკნელი ადამიანი, რომელიც კატასტროფას გადაურჩა, 2009 წელს გარდაიცვალა. მილვანა დინი მაშინ სულ რაღაც 9 თვის იყო. როგორც The Guardian წერდა, ქალბატონი სწორედ მაშინ გარდაიცვალა, როცა მისთვის ფინანსური დახმარების გაწევა დაიწყეს ფილმ „ტიტანიკის“ ვარსკვლავებმა - ლეონარდო დიკაპრიომ და ქეით უინსლეტმა.

9. არაერთ წყაროში მითითებულია, რომ უკანასკნელი მელოდია, რომელიც „ტიტანიკზე“ შეასრულეს, იყო სიმღერა „Nearer My God To Me“. თუმცა გაზეთ The New York Times-ში 1912 წელს გემის ეკიპაჟის გადარჩენილი წევრი ჰაროლდ ბრაიდი ყვებოდა, რომ როცა გემი იძირებოდა, ორკესტრი ჰიმნ „Autumn“-ს უკრავდა.












Loading...

ტექსტის სანახავად გაიარეთ რეგისტრაცია.