რას ნიშნავს ადამიანად ყოფნა?

 (ხმები: 23)


რა არის ადამიანის მოვლინების უმთავრესი მიზანი? რას ნიშნავს ადამიანად ყოფნა?
ცხოვრების რაღაც წუთებში ყველას გაჰკრავს გულში ამაზე ფიქრი, მაგრამ ეს იმდენად იშვიათად ხდება, ეპიზოდურ ხასიათს ატარებს და ასე მოკლე ხანში პასუხსაც ვერ პოულობ და ვერც იპოვი ალბათ, რადგან ამ კითხვაზე პასუხი, მხოლოდ მან იცის, ვინც მოგვცა სიცოცხლის უფლება და ვისკენაც მივისწრაფვით.
ღმერთმა ადამიანი თავის ხატად შექმნა და მისი მთავარი მოვალეობაც ჭეშმარიტ გზაზე სვლით უფლის მსგავსების აღდგენაა. იყო ადამიანი, იყო სულიერი არსება, შეგეძლოს აზროვნება, ფიქრი, ნაბიჯის გადადგმა ნიშნავს იმას, რომ შენ იყო ხიდი ზეციურსა და მიწიერს შორის, ამ ხიდზე თითო–თითო ფიცარი გადო და მიაღწიო მეორე ნაპირამდე–სულიერ სრულყოფილებამდე.
მრავალ რელიგიურ დატვირთვასთან ერთად ადამიანად ყოფნა ეს იგივეა,რაც მეომარი ბრძოლის ველზე. ხმალი–ეს ჩვენი გონებაა, აბჯარი–რწმენა. თითოეული დღე ადამიანისა არის ძიება იმ ნაპერწკლისა, რომელიც შენში იმალება და რომელიც ჩვენს შემოქმედს გვამსგავსებს. მთელი ცხოვრება უნდა შევწიროთ ამ ნაპერწკლის გაღვივებას და ბოლოსდაბოლოს დავანთოთ დიდიხნის წინ "ვაშლით" ჩამქრალი ცეცხლი.
ადამიანი ადამიანია! არც მეტი, არც ნაკლები, მაგრამ დღესდღეობით ამ სიტყვის არსი დაკარგულია. თუმცა, შენ გაქვს შანსი. დიახ, შენ მკითხველო, რომ დაუბრუნო ადამიანს ადამიანობა. ამისათვის უნდა იბრძოლო. იბრძოლო სიმართლისთვის, რწმენისა და თავისუფლებისთვის. თუ გინდა, რომ ადამიანი გერქვას, იყვირე ხმის ჩაწყვეტამდე, იყვირე მანამ,სანამ შენს ბაგეებს სისხლი არ შეფერავს, ანდა ტყვიებით არ დაგესერება სახე, მაგრამ არც ერთი ნაბიჯი უკან!!!
თუ გსურს გერქვას ადამიანი, უნდა შეგეძლოს ყოველ დღე სიკვდილი, შენი წილი პურის დათმობა. განა არ ვიცი, რა კარგია უმზერდე ვარსკვლავებს, ოცნებობდე, ყურს უგდებდე საღამოს ნიავის იავნანას, მაგრამ მოგიწევს შეელიო ყველა ამ სიტკბოს და გზას დაადგე, რადგან შენ მოვალე ხარ ღვთის წინაშე.
იყო ადამიანი ნიშნავს იმას, რომ შეგეძლოს ცხრა თოფის ლულის წინ დადგომა, ისე, თითქოს შენი მომავლის პირისპირ იდგე, შეგეძლოს დამიზნებული ქვემეხების ხმაურში გაიგონო სხვა მილიონობით მოკვდავის ხმა, შეგეძლოს ტაძარში ანთებული სანთლით ხელში უფალს შეავედრო არა მარტო საკუთარი თავი, არამედ მოყვასი შენი...
აი, ამას ნიშნავს იყო ადამიანი.
ადამიანს სიყვარული ანიჭბეს ადამიანურობას. სიყვარული უფლისა, სიყვარული მოყვასისა, ცხოვრებისა.
იყო ადამიანი ნიშნავს, წლების შემდეგ შენს საფლავის ქვაზე ამოტვიფრულ ასოებსი ჩანდეს მთელი შენი ისტორია, ჩანდეს ის უთვალავი ფიცარი, რომელიც შენს პირად ხიდს შემატე და შენს დამარხულ გულზე ობლად ამოსული ია–ვარდი ცრემლით გირწყავდეს მიწას, იმ ცრემლებით, რომელიც შენ დაგიღვრია ცოდვილ მიწაზე.
აი, რას ნიშნავს იყო ადამიანი!
აქ ხომ ზედმეტია ფიქრი ხორციელ სიამეზე, აქ ხომ ზედმეტია ფიქრი საკუთარ თავზე. ეს ხომ ჩვენი წუთიერი სამყოფელია, სადაც მიწა ვართ და მიწად ვიქცევით. დიახ, მიწა ვართ და მიწად ვიქცევით.


მ.გრძელიძე




ტექსტის სანახავად გაიარეთ რეგისტრაცია.