ბრძნული აზრები

არის მკითხველი მშვენიერ წიგნის, და არის მხოლოდ გადამკითხველი... ის ფურცლავს, ნიშნავს, ადარებს, ჩიჩქნის, მაგრამ ვინაა აქ გამკითხველი. (გალაკტიონ ტაბიძე)


არიან ადამიანები, რომელთაც, ბიბლიური გამოთქმა რომ მოვიშველიოთ, სიცოცხლეში, ნათელი ადგათ. თვით უახლოეს მეგობარსაც კი, რომელსაც წლების მანძილზე იცნობთ და მეგობრობთ, მასაც კი სხვადასხვა განწყობილებით შეხვდებით ხოლმე - ხან საამო სიხალისით, ხან მოღუშული, ხან შეიძლება კიდევაც გაებუტოთ. მაგრამ არიან გამონაკლისი ადამიანები, რომელთა დანახვაც კი თქვენში ყოველთვის სულიერი სიმშვიდის, კეთილი ადამიანური გრძნობების გაღვიძებას იწვევს. გერონტი (ქიქოძე) იყო განსახიერება მაღალი, უაღრესად ადამიანური თვისებებისა. (აკაკი ბელიაშვილი)


არის განა ქვეყანაში ისეთი დამახინჯებული ვინმე, რომელსაც ეთქვა: «მე არ მიყვარს ჩემი სამშობლო, მე არ მესმის მამულისთვის ჭმუნვა, მე არ მინდა იმის სამსახური?! და თუ ისეთი ხალხი შესაძლებელნი არიან, ნუთუ მეც იმათ ვეკუთვნი? .და თუ ეგრე იქნებოდა, ვიქნებოდი-ღა ღირსი ადამიანის სახელის ტარებისა? (ალექსანდრე სუმბათაშვილ-იუჟინი (1880 წ.) )


არიან ადამიანები-ნებაყოფლობით მგლოვიარენი. ისინი არ გრძნობენ არც ძრწოლას, არც მოწყენას, რადგან მათთვის უცნობია დიდი სიხარული. ისინი არ გრძნობენ გლოვას, რადგან მათ გულში არავის დაუთესია ეჭვის გესლი. ისინი უკეთესს არ ინატრიან, რადგან უკეთესი ვერ წარმოუდგენიათ. (კონსტანტინე გამსახურდია)


არის სამი სიტყვა, რომელსაც სოფლის დასაბამიდგანვე მეტად ვრცელი და ყველაზე უპირველესი ადგილი სჭერია და უჭირავს მთელს კაცობრიობის ცხოვრებაში, გულ-გონებაში და მისი მოქმედების ისტორიაში. ...ეს სამი სიტყვა გახლავთ გონებრივი და ქონებრივი წარმატება ადამიანისა კერძოდ და ქვეყნისა ერთად. ცოდნა სულია და შრომა-ხორცი: სული და ხორცი უერთმანეთოდ ვერ
ივარგებენ. (დიმიტრი მაჩხანელი)