შემოდი - ნანუკა ჭკუასელი

 (ხმები: 4)


შემოდი. ეს ცხოვრება მე მეკუთვნის.
დაბადების პირველი მარცვალი უფალმა დათესა ნიადაგში. პირველი მზის სხივიც მან მოახვედრა და წყალიც მან დაუსხა.
შემოდი.
რაც ეს ცხოვრება გაღვივდა და მიწიდან აღმოცენდა, მას შემდეგ მე ვუვლი.
ღმერთს კი ახალ - ახალი მცენარეები მოაქვს და რგავს.
შემოდი.
აქ მე ვარ მებაღე. ისეთი არ ვარ, როგორიც ცხოვრებას სჭირდება, თუმცა რაღაცას მაინც ვახერხებ.
შემოდი, მაგრამ ნუ დაიკარგები. ბევრი ფესვია გამაგრებული და ფეხი არ წამოკრა. საკუთარი გამოცდილებიდან გეუბნები და ამიტომაც ვაფრთხილებ ყველას.
არის წუთები, როცა მე ჩემს ცხოვრებას ვტოვებ და გავდივარ. დაბრუნებისას კი შემოსასვლელი ეკალ - ბარდებით იფარება. ამიტომ მიჭირს შემოსვლა. ბევრჯერ დავცემულვარ.
მხოლოდ დღეს დავბრუნდი კვლავ და ეს ფესვებიც ამიტომ დამხვდა.
შემოდი.
უკან მოუვლელი მცენარეებია მიყრილი. რომ იცოდე რამდენი რამ მაქვს მისახედი.
ახალი ქოთნები უნდა ვიყიდო, რომ ესენი დავაბინავო და თაროებზე განვალაგო.
არ ვიცოდი თუ მოსვლას აპირებდი, თორემ ლამაზ ქოთნებს დაგაბარებდი.
ღმერთი არ ვიცი რას ფიქრობს ჩემს მებაღეობაზე, მაგრამ თუ მოსწონს ის, რასაც ვაკეთებ, ყვავილიც უფრო მალე იზრდება და გაცილებით ლამაზია, ვიდრე დანარჩენები.
როცა რაღაცას ისე არ ვასრულებ, მცენარე ჭკნება.
ძალიან ბევრი დამჭკნარი ყვავილი მაქვს.
თუმცა არ მინდა გადავყარო. ეს ჩემი ცხოვრებაა და ყველაფერი რაც აქ ხდება, აქვე უნდა დარჩეს.
უფალი ყოველდღე ახალ ნაყოფს აღვივებს ნიადაგში. ისინი, იმ შემთხვევაში ხარობენ, თუკი ამას დავიმსახურებ.
შემოდი.
არ შეგეშინდეს.
ეს ჩემი პატარა ცხოვრებაა და აქ მებაღე მე ვარ.

/ ავტორი : ნანუკა ჭკუასელი /




ტექსტის სანახავად გაიარეთ რეგისტრაცია.