თევზები (პისცეს)



თევზები ზოდიაქური თანავარსკვლავედია, ჩანს ოქტომბრიდან იანვრის ბოლომდე (სამხრეთისა და ჩრდილოეთის ცაზე), გარემოცულია ვერძის, ვეშაპის, მერწულის, პეგასის და ანდრომედას თანავარსკვლავედებით. ჩანს დაახლოებით 75 სუსტი ვარსკვლავი. ფორმით მოგრძოა, სამკუთხედით და ხუთკუთხედით დასრულებული ბოლოები სურათზე ორი თევზის სახითაა გამოსახული. ცხადია, უმართებულოა აქ „თევზების“ მხოლობითში დასახელება, რაც ზოგ წიგნშია. სინამდვილეში ორი თევზია, ზონრით გადაბმული. ერთი ჩრდილოეთშია, ერთი სამხრეთში, თქმულება მოგვითხრობს, როცა მზე შევიდა ამ ხომლის ფარგლებში, წამოვიდა ღვართქაფი და გამოჩნდა ორი თევზი, ბაფთით გადაბმული. ბერძნული მითის ერთი ვერსიით, ესენი არიან აკიდი და გალატეა. ყოველდღე, როცა ჰელიოსის ოქროს ეტლი ცის ტატნობზე ამაღლდებოდა, მღელვარე ზღვას ტოვებდნენ ზღვის ღმერთისა და წინასწარმეტყველის ნერესის ორმოცდაათი მშვენიერი ასული, ფერხულს მართავდნენ ნაპირზე და საამო სიმღერით ხიბლავდნენ ყოველ ცოცხალ არსებას. ერთხელ ერთი მათგანი, მშვენიერი გალატეა კრებულს დაშორდა, პეპელას დაედევნა და სანაპიროზე მარტო აღმოჩნდა. უეცრად მას თვალი მოჰკრა მშვენიერმა ჭაბუკმა აკიდმა და ქალ-ვაჟს მაშინვე თავდავიწყებით შეუყვარდათ ერთიმეორე. ავიდოდნენ ზღვისპირა გამოქვაბულში და ერთმანეთს შეჰხაროდნენ. მთის თავზე კი იჯდა პოსეიდონის მრისხანე შვილი, ცალთვალა პოლიფემი (სწორეს ის, რომელმაც ოდისევსის თანამგზავრები შეჭამა, მერე კი ოდისევსმა და გადარჩენილმა გიმრებმა თვალი ამოსთხარეს). იჯდა და თავის გამოთლილ სალამურს უკრავდა. მუსიკის მომხიბლავი ხმა შეყვარებულებსაც ესმოდათ და სიამოვნების ნაცვლად კანკალებდნენ, რადგან პოლიფემი არავის ინდობდა, ადამიანებს გლეჯდა და ჭამდა. მასაც ენახა გალატეა და გაგიჟებით შეჰყვარებოდა. ერთხელ ამ ველურმა ბუმბერაზმა დააგდო სალამური და გამოქვაბულს მიაშურა. აიკიდა გალატეა და გაიქცნენ, ზღვაში გადაეშვნენ და თევზებად იქცნენ, ისე რომკუდები ბაფთით გადაებათ, რათა ერთიმეორის თავი არ დაეკარგათ. არსებობს კიდევ სხვა ვერსია, პოლიფემმა გაქცეულ აკიდს კლდიდან მოგლეჯილი ლოდი სტყორცნა და გასრისა. იმ ადგილას წყარო გაჩნდა.

მეორე ვერსიით , თევზები - სიყვარულის ქალღმერთი აფროდიტე და მისი ძე მშვილდოსანი ეროსი არიან. ტროის მეფის პრიამოსის პირმშვენიერ ძმას - ტითონს შეუყვარდა განთიადის ქალღმერთი ეოსი სამაგიერო სიყვარულის მიიღო. გავიდა დრო. ტითონი ხანში შედიოდა. ეოსმა ღმერთებს სთხოვა ტითონს უკდავება მიანიჭეთო. თხოვნა ასრულეს, მაგრამ ტითონი ბერდებოდა. ეოსს დაავიწყდა, რომ მისთვის მარადიული სიჭაბუკეც ეთხოვა. ტითონი არ კვდებოდა, მარგამ ბერდებოდა. ჩამოჭკნა და სიარული უჭირდა, ერთხელ ტითონი შეხვდა აფროდიტეს, სიყვარულით აღენთო და დაედევნა. აფროდიტე და მისი მხლებელი პირმშო ეროსი მდინარეში გადავარდნენ და თევზებად იქცნენ. ეს იყო მდინარე ევფრატი (სირიაში). ცხადია ეს ვერსია პირველივით დამაჯერებელი ვერ არის, რადგან, ჯერ ერთი, ჭარმაგ ტითონს გული რა სიყვარულით აღენთებოდა, მერედა, ეროსი და აფროდიტე ხომ არსებობას განაგრძობენ თევზები კი თავისთვის არიან როგორც მდინარეში, ასევე ნადირთა გზაზე, სადაც მათი ხომლის უმრავლესობის ხილვა მხოლოდ ძლიერი ჰოროსკოპით შეიძლება.გაუგებრობა იხსნება ორი გარემოებით: ღმერთებმა აფროდეტე და მისი ძე დროებით აქციეს თევზებად, და კიდევაც დაიხრჩობოდნენ რომ ფსკერიდან ამოცურებულ ორ დიდ თევზს არ შეესხათ ზურგზე და არ დაეხსნა. სწორედ ეს თევზები აქციეს ღმერთებმა თანავარსკვლავედებად. ეს თქმულება შუმერულ, ბაბილონურ, სირიულ მითებშიც დაალოებით ასე შემორჩენილა ( შესაძლოა ლაპარაკი იყოს სირიელთა ქალღმერთზე. იმ თევზთა პატივსაცემად სირიელები დღესაც გაურბიან თევზის ჭამას). ზოგ ასტროლოგიურ წიგნში (შტროჰმაიერი და სხვ.) ნათქვამია, რომ აფროდიტეს აედევნა არა პრიამოსის ლამაზი ძმა ტითონი, არამედ პირველქმნილი ქაოსის ერთ-ერთი განსახიერება, საზარელი ასთავიანი ურჩხული ტიფონი, რომელიც ზევსმა გაჭირვებით დაამარცხა. მაგრამ ეს ვერსია უთუოდ გაუგებრობის ნაყოფია, ტითონისა და ტიფონის სახელთა მსგავსებაზე აგებული. საოცარი ისაა, რომ ეს მოთხრობა მოდის ოვიდიუსიდან ( „ფასტი“).






Loading...

ტექსტის სანახავად გაიარეთ რეგისტრაცია.