მე ვერ გავუძლებ

მე ვერ გავუძლებ

(me ver gavudzleb)


მე ვერ გავუძლებ უშენობით მოტანილ დარდებს
და მივეცემი აბობოქრებულ ფიქრების ტალღებს.
შენთვის დავკრეფდი ტრიალ მინდორზე მე ველურ ვარდებს
და… სიგიჟესაც ჩავიდენდი გვერდით რომ მყავდე.
და ჩემს სიგიჟეს მივაწერდი შენს ლამაზ თვალებს
ხშირად მდუმარეს,დაფიქრებულს,სულ რომ მაწვალებს.
თაფლისფერ სითბოს,დაუცხრომელ ვნებას და ალერსს
მე წაგართმევ და.. შენ გააღებ უმზეო თვალებს.
გააღებ თვალებს… დაიწყებ ძებნას,
გსურს რომ იპოვო ის ძველი მზერა….
შენ ვერ გაუძლებ უჩემობით მოტანილ დარდებს
და…სიგიჟესაც ჩაიდენდი გვერდით რომ გყავდე!....


იმედდაკარგული არ მინდა გელოდო

იმედდაკარგული არ მინდა გელოდო

(imeddakarguli ar minda gelodo)


იმედდაკარგული არ მინდა გელოდო
აღარ გამომივლი ვიცი.
სევდამორეული ვითვლი ამ დღეებს,
რა ვქნა? გული მაინც გიცდის.
ფანჯრიდან გავყურებ ცარიელ ქუჩებს
და კვლავ შენი ფეხის ხმა ისმის,
ვიცი შენ არა ხარ, ვიცი მეჩვენება
ვიცი და მაინც გიცდი.
ვგრძნობ, რომ არ ჩაივლის ასე ყველაფერი,
მარტო არ დამტოვებ ვიცი.
ვიცი გვიან მოხვალ, მაგრამ მაინც მოხვალ
ვიცი და ამიტომ გიცდი..


ასე მალე ეს დღეებიც დამთავრდება

ასე მალე ეს დღეებიც დამთავრდება

(ase male es dgeebic damtavrdeba)


ასე მალე ეს დღეებიც დამთავრდება,
ვეღარ გნახავ, უშენობით დავიღლები,
ოხ რამდენჯერ ვცადე შენი დავიწყება,
მაგრამ უფრო დაჟინებით მენატრები.
მომენატრა შენთან წყნარი საუბარი,
მაგ ტუჩების ოდნავ წყნარი გაღიმება.
იცი რას გთხოვ? ოღონდ გული გამიყავი
და სიცოცხლე ამით უფრო გამიტკბება.
განშორებით რა ვქნა თუ ვერ დაგივიწყე?
რა ვქნა ამ გულს ვერაფერი მოვუხერხე.
ასე დიდი სიყვარული რომ მასწავლე,
გევედრები დავიწყებაც შემასწავლე..


ჩემო სიცოცხლე, სინანულის ხელს ნუ მიწოდებ

ჩემო სიცოცხლე, სინანულის ხელს ნუ მიწოდებ

(chemo sicocxle, sinanulis xels nu miwodeb)


ჩემო სიცოცხლე, სინანულის ხელს ნუ მიწოდებ,
მე სიყვარულის ანგელოზად მაინც გიწოდებ.
თუ შემიბრალებ, გულის კარი ღია დატოვე
და მე გპირდები არასოდეს არ მიგატოვებ.

ნუ მიმატოვებ, არ გამიპო გულის ფიცარი
მე ამდენ ხალხში, ერთადერთო, ღირსად გიცანი.
ვიცი, კვლავ გინდა, მოგეფერო, ჩაგიკრა გულში,
მადლობის ნიშნად ჩაგჩურჩულო, „მიყვარხარ" ყურში.

ეს ჯადოსნური, მომღიმარი შენი თვალები
და თვალებიდან გადმოსული ის წამწამები.
მუდამ თან მსდევენ, კვლავ ხარობენ ჩემი წამებით
ასე ტანჯვაში გამეპარა წუთი, წამები.

თუ სიყვარული მე დავკარგე ამ ქვეყნად ისევ
მაშინ წავიდეს ეს ცხოვრება, რად მინდა ისე,
თუ სიყვარულში ისევ დაგეწყო, სიცივე, თოვა
მე ჩემს გულს მოგცემ, რომ არ იფიქრო, „მან მიმატოვა".

და თუ ცხოვრებამ შენ დაგიგო სასტიკი მახე
თუკი გაგიქრო სიტკბოების ყოველი სახე,
მე მუდამ მზად ვარ კვლავ შევწირო ჩემი სიცოცხლე
როგორ მიყვარხარ ჩემო ლამაზო, მინდა იცოდე.

და ნუ განიცდი, სიყვარულში თუ არ გაქვს ბედი
მე შემიყვარდი, შენში ვიპოვე ოცნების გედი
და მაშინ როცა შენ მიდიხარ, ოცნების გზაზე
შენ დამიჯერე, მართლა არ გინდა, იფიქრო სხვაზე.


მინდა, ვიყოთ ერთად

მინდა, ვიყოთ ერთად

(minda viyot ertad)


მინდა, ვიყოთ ერთად,
სოფელში და წვიმდეს.
შემოჩვეულ სევდას
წვიმის ღვარი შლიდეს.
იფარვიდეს შინდი,
შეციებულ ჩიტებს,
შენ კი... ჩემი დიდი
სიყვარული გჭირდეს.
არა ვგავდეთ დიდებს…
მიკითხავდე ლექსებს..
მიკოცნიდე ლამაზ,
საფერებელ თითებს.
მთელი ღამე ხშირი
თბილი წვიმით წვიმდეს.
შენ კი . . .
ჩემი დიდი
სიყვარული გჭირდეს.


დრო გაიყინა და ჩვენ ვარსებობთ

დრო გაიყინა და ჩვენ ვარსებობთ

(dro gaiyina da chven varsebobt)


დრო გაიყინა და ჩვენ ვარსებობთ,
ცისა და მიწის შემოგარენში.
მთვარეც ვერ აღწევს, მემატიანე,
მდუმარე სულის ვიწრო სარკმელში.
ასე იქნება.სხვას არც რას ველი,
გაურკვევლობის ერთსახოვნება.
შენი უძირო, ზღვისფერ თვალებით,
ზღვარ გადასულის თავის მკვლელობა.
ჩემი ბრალია, მე დაგანახე,სამანის მიღმა უსასრულობა,
მაგრამ ღვთაებავ,იქ ჩვენს შეხვედრას
აქვს შეუცვლელი თავის დროება.
და თუ,ოდესმე გადავურჩებით
უერთმანეთო დღეების სრბოლას,
მინდა იცოდე, ისევ ისა ვარ,
ვინც არასოდეს აქ, არ წყვეტს ბრძოლას!


უსიყვარულოდ ქვეყანაზე ღიმილი კვდება

უსიყვარულოდ ქვეყანაზე ღიმილი კვდება

(usiyvarulod qveyanaze gimili kvdeba)


უსიყვარულოდ ქვეყანაზე ღიმილი კვდება,
კოცნის სურვილიც იკარგება უსიყვარულოდ,
უსიყვარულოდ გული გულსაც ვეღარ პოულობს
და ვერც სიცოცხლე ვერ ზეიმობს უსიყვარულოდ.
უსიყვარულოდ დედის ხელსაც ვეღარ დაკოცნი,
მზის სხივიც კი იკბინება უსიყვარულოდ,
უსიყვარულოდ ბაღში ვარდიც ჭკნება უაზროდ,
წყაროც კი შრება მარტოსული, უსიყვარულოდ.
უსიყვარულოდ სიმღერაც კი მოსაწყენია,
უსიყვარულოდ დედის ძუძუს რძეც კი გაურბის
და არც მერცხლები ბერდებიან უსიყვარულოდ.
უსიყვარულოდ არ არსებობს არც სილამაზე,
არც უკვდავება არ არსებობს უსიყვარულოდ.
უსიყვარულოდ მარტოსული სიკვდილი მოდის,
საფლავიც ქრება უპატრონოდ, უსიყვარულოდ...


გულის ხმამაღალი ფეთქვით

გულის ხმამაღალი ფეთქვით

(gulis xmamagali fetqvit)

გულის ხმამაღალი ფეთქვით,
სულის სიმშვიდე დაგიკარგო,
არ მოგასვენო წამით,
დღე ოცნებებში ჩაგექარგო,
ლამაზ სიზმრებში ღამით.
მინდა, საფიცრად გადაგექცე,
შენი მონატრება ვიყო,
ვიყო გაგიჟება შენი,
შენი მწუხარებაც ვიყო,
შენი გაზაფხული ვიყო
ატმის ყვავილების ფერი,
შენი სიყვარული ვიყო,
ვიყო უსასრულოდ შენი…


ზღვაო, ჩურჩულით მითხარი

ზღვაო, ჩურჩულით მითხარი

(zgvao, churchulit mitxari)


ზღვაო, ჩურჩულით მითხარი,
რომ შენც მელოდი ძალიან,
ღრუბელს რქას აჰკრავს მზის ხარი
და წვიმა პატარძალია.
ზღვაო, დამახრჩვე ალერსით
და მომეხვიე ტალღებით.
სხივი მჭირს კლდეზე ნალესი,
მზე დადის წითელ წაღებით.
ზღვაო, ეგ შენი სინაზე
ათას უფლისწულს ეყოფა.
გეხვევი მტრების ჯინაზე
ჩემს უღალატო მეგობარს.
ვკეკლუცობ მე შენს სარკეში
და თავს გაწონებ ოცნებით
და ტალღებს, ჩემზე დაგეშილს
მეც ვეგებები კოცნებით.
ზღვაო, ნუმც განმეშორები,
შენი მზე ნატვრისთვალია.
ყოველთვის მემახსოვრები
ზღვაო, მიყვარხარ ძალიან.