ჩიტის ბუდე (ბავშვის კვება)

ჩიტის ბუდე

(chitis bude)



საჭირო ინგრედიენტები:

400 გრ კარტოფილი
2-3 ც კვერცხი
1 (200გ რ) ყაბაყი
100 მლ რძე
2 ს.კ. დაფქვილი თხილი
ქურქუმა
1 მწიკვი დაფხვნილი ძირა
ოდნავ იოდიზირებული მარილი
სალათის ფოთლები

მომზადების წესი:

კარტოფილი გავთალოთ და ცოტა მარილიან წყალში თავდახურული დაახლოებით 20-25 წუთი ვხარშოთ.
კვერცხიც მოვხარშოთ. ყაბაყი გავრეცხოთ და დიდ ნაჭრებად დავჭრათ. კარტოფილის მოხარშვამდე 5 წუთით ადრე ყაბაყი ქვაბში ჩავყაროთ. შემდეგ კარტოფილი და ყაბაყი გადმოვიღოთ, რძე დავასხათ და პიურედ ვაქციოთ, დაფქვილი თხილი შევურიოთ სანელებლებით და მარილით შევაზავოთ. კარტოფილის პიურე სალათის ფოთლებზე მოვათავსოთ და ყველა ულუფაზე შუაში გაჭრილი კვერცხი დავაწყოთ.


გონებისთვის სასარგებლო საკვები (ბავშვის კვება)

გონებისთვის სასარგებლო საკვები

(gonebistvis sasargeblo sakvebi)



ის, რასაც ჩვენი პატარა მიირთმევს საუზმედ და სადილად, თურმე მნიშვნელოვნად განსაზღვრავს მომდევნო რამდენიმე საათის მანძილზე მის ბუნება– განწყობილებას. თანაც ეს ეხება არა მარტო ფიზიკურ, არამედ გონებრივ აქტივობასაც. სხვათა შორის, ნევროლოგიის მეცნიერების ერთერთი სფერო იკვლევს სწორედ ასეთ კავშირს დიეტასა და ადამიანის ინტელექტუალურმიღწევებს შორის.
მრავალრიცხოვანი ექსპერიმენტებისა და მრავალწლიანი კვლევების შედეგად შეიქმნა პროდუქტების სია, რომელიც შეიძლება პირდაპირი მნიშნელობით დავასახელოთ გონების საკვებად. ისინი აუმჯობესებს ტვინის მუშაობას, კონცენტრაციის სტიმულირებას ახდენს და, როგორც შედეგი, განწყობასაც ამაღლებს.

ყველაფერი მუშაობს ბიოქიმიურ დონეზე. აზროვნების პროცესი – ბიოქიმიური რეაქციების რთული და ხანგრძლივი ჯაჭვია, რომელსაც უამრავი ნივთიერება ესაჭიროება. საკვებში განსაზღვრული კვების პროდუქტების გამოყენებისას, ჩვენ ნერვულ სისტემას ვაწვდით ყველა აუცილებელს. ტვინს სრულფასოვანი მუშაობისთვის სჭირდება ცილა, ზოგიერთი ვიტამინი და მიკროელემენტები, ასევე ცხიმოვანი მჟავები. გარდა ამისა, გონებრივი მუშაობა მოითხოვს დიდი ენერგიას. რადგან ტვინს არ შეუძლია ვიტამინებისა და მინერალების დაგროვება, ამიტომ ბიოქიმიურ რეაქციებში გამოიყენება ის ნივთიერებები, რომელიც ორგანიზმში შევიდა საკვებთან ერთად კონკრეტულ მომენტში. ამიტომ, დიეტის კორექტირებისას სწორი მიმართულებით, შეიძლება გავიუმჯობესოთ არა მარტო მეხსიერება, არამედ რეაქციის სისწრაფე და ყურადღების კონცენტრაცია. ეს კი ნამდვილად სჭირდებათ ჩვენს პატარებს! ამის დასტურად ერთ მაგალითს გეტყვით: ამერიკის შეერთებულ შტატებში დაწყებითი კლასების პატარებს ერთი თვის განმავლობაში ტრადიციული წახემსების – ფუნთუშებისა და კანფეტების – ნაცვლად აძლევდნენ ნიგოზს და ვაშლს. ბავშვების გონებრივი შესაძლებლობები 30% გაიზარდა. და ეს მხოლოდ ერთი წახემსების წყალობით. აშკარაა, რომ ცომეული, რომელიც ნახშირწყლებით მდიდარია, იძლევა ენერგიის მოკლევადიან მოზღვავებას, მაგრამ არ შეიცავს ვიტამინებს და მინერალებს, მაშინ, როცა ვაშლში ისინი მრავლადაა. ნიგოზი კი – ცილების წყაროა, ცხიმოვანი მჟავებისა და ნახშირწყლების. რა თქმა უნდა, არც ერთი ვიტამინი და არანაირი ცხიმოვანი მჟავა არ გახდის ადამიანს უფრო ჭკვიანს, ვიდრე ის სინამდვილეშია. საკვები თვისთვისთავად, რა თქმა უნდა, ინტელექტს ვერ შეგვმატებს. მაგრამ შეიძლება ბავშის (და ასევე უფროსის) მენიუ ისეთი სახით შევადგინოთ, რომ მაქსიმალურად გამოვიყენოთ ბუნების მიერ ნაბოძები განძი.

აი, მაგალითად, ბანანის იოგურტი მშვენიერი საუზმეა ჩვენი პატარასთვის. მოსამზადებლად დაგვჭირდება 1 მწიფე ბანანი, 200 მლ იოგურტი დანამატების გარეშე, 1 სუფრის კ. თაფლი, ოდნავ ლიმონის წვენი, შეიძლება ერთი–ორი ბანანის ჩირიც, გასაფორმებლად.
ბანანი გავფრცქვნათ, დავჭრათ მრგვალ ნაჭრებად და მოვასხათ ლიმონის წვენი. იოგურტში თაფლი ავურიოთ, მერე ბანანზე მოვასხათ და მოვრთოთ.

სადილის დროს ჩემს შვილიშვილს ზოგჯერ მწვანე ბარდის სალათს ვუმზადებ პიტნით. ამ რეცეპტისთვის დაგჭირდებათ – 300გრ ბარდა, 1ც. კიტრი, 1 კონა პიტნა, 1 ლიმონი, 3 სუფრის კოვზი მცენარეული ზეთი, 1 ჩაის კოვზი არამწარე მდოგვი, 1 ჩაის კოვზი თაფლი, ზღვის მარილი, 150 გრ ყველი.

ჯამზე დავყაროთ ბარდა. კიტრი გავთალოთ და მრგვალ ნაჭრებად დავჭრათ. პიტნა გავრეცხოთ, გავაშროთ და ფოთლები მოვაცილოთ. ლიმონი კარგად გავრეცხოთ და წვრილ სახეხზე ცედრა გავხეხოთ.
სოუსის მოსამზადებლად, ლიმონის წვენი გამოვწუროთ, დავუმატოთ ზეთი, თაფლი, მდოგვი, მარილი, და ჩანგლით ავთქვიფოთ, სანამ ერთგვაროვან მასას არ მივიღებთ. ბარდა რამდენიმე წუთით ადუღებულ წყალში მოვათავსოთ, შემდეგ საწურზე გადავწუროთ კარგად. შევურიოთ კიტრი, პიტნის ფურცლები და სოუსიც მოვასხათ. ზემოდან ყველი დავახეხოთ და მივართვათ ჩვენს პატარას.

ბავშვებისთვის ოხრახუშის წვნიანიც ძალიან სასარგებლოა. დაგვჭირდება :1 კონა ოხრახუში (50გრ), 1 პატარა თავი ხახვი, 1 ც კარტოფილი, 2 სუფრს კოვზი ზეთი, ½ ლ ბოსტნეულის ბულიონი, 1/8ლ ნაღები, ზღვის მარილი, 1 ჩაის კოვზი ლიმონის წვენი,ნიგოზი.
ოხრახუში გავრეცხოთ, გავაშროთ. რამდენიმე ფოთოლი მოსართავად მოვიტოვოთ. რადგან ოხრახუშს საკმაოდ უხეში ფოთლები და ღეროები აქვს, ამიტომ ვეცადოთ ძალიან წვრილად დავჭრათ. ბოსტნეული გავასუფთაოთ და პატარა კუბებად დავჭრათ.
ქვაბში ზეთში მოვხრაკოთ ხახვი, კარტოფილი და ოხრახუში. დავასხათ ბულიონი და დაბალ ცეცხლზე ვხარშოთ 10 წუთი. ბლენდერის ან მიქსერის მეშვეობით სუპი პიურედ ვაქციოთ, დავუმატოთ ლიმონის წვენი, ნაღები და მარილი. ნიგოზი ოდნავ მოვხალოთ ტაფაზე ზეთის გარეშე. სუფრასთან მიტანის წინ წვნიანში ჩავყაროთ ნიგოზი და წვრილად დაჭრილი მწვანილი.

ვახშამად გამომცხვარი ისპანახი ყველით ძალიან გემრიელია. ავიღოთ 500გრ ისპანახი, 1 თავი წითელი ხახვი, 1 კბილი ნიორი, 2 სუფრის კოვზი ზეითუნის ზეთი, მარილი, 1-2 სუფრის კოვზი ზეითუნის ზეთი ფორმაზე წასასმელად. 200 გრ ყველი, 10გრ ნიგოზი.
ისპანახი გავრეცხოთ და დავჭრათ. ხახვი და ნიორი გავფრცქვნათ. ხახვი ალყა–ალყა დავჭრათ, ნიორი კი დავჭყლიტოთ. შემდეგ ხახვი და ნიორი მოვთუშოთ ზეთში, სანამ ოქროს ფერს არ მიიღებს. დავუმატოთ ისპანახი, კარგად ავურიოთ, ცეცხლიდან გადმოვდგათ და მარილი დავაყაროთ.
ყველი პატარა ნაჭრებად დავჭრათ. გამოსაცხობ ფორმას ზეთი წავუსვათ, დავალაგოთ ისპანახი, ზემოდან კი ყველი. მოვაყაროთ ნიგოზი. ზემოდან ოდნავ ზეთი მოვასხათ. ვაცხოთ 180 გრადუსზე დაახლოებით 10 ჭუთი.

ცოტაოდენი ეგზოტიკაც შევიტანოთ ჩვნი პატარას სასმელებში და გავასინჯოთ ლასსი. მოსამზადებლად დაგვჭირდება 100 გრ იოგურტი დანამატების გარეშე და 1 ჭიქა მინერალური წყალი.
ლასსი ინდოეთში ძალზე პოპულარული სასმელია. მომზადებაის წესი უმარტივესი: იოგურტი მინერალურ წყალთან ავურიოთ და ავთქვიფოთ სანამ სქელ ქაფს არ მივიღებთ. ლასსი შეიცავს ნაკლებ კალორიებს, მაგრამ საუკეთესოდ აგრილებს და მდიდარია კალციუმით, რაც ნერვებისთვის სასარგებლოა.

რამდენიმე სასარგებლო რჩევა:

პომიდორი ყურადღების სტიმულირებას ახდენს და აძლიერებს ნივთიერებათა ცვლას, აახალგაზრდავებს უჯრედებს. პომიდორი ერთერთი ქმედითი ბუნებრივი საშუალებაა კიბოს საწინააღმდეგოდ.
ნიორი აძლიერებს შრომისუნარიანობას, გამოჰყავს შლაკები და წნევას დაბლა წევს.
იოგურტი განწყობას ამაღლებს, ძვლებსა და კბილებს ამაგრებს.
სტაფილო აძლიერებს კონცენტრაციას.
წითელი ხორცი ხელსუწყობს ენერგიის მოზღვავებას, ზრდის ამტანობას. უხეშად დაფქვილი ხორბლის პური ზრდის გონებრივ აქტივობას, სტრესების ზემოქმედებას ამცირებს.
გოგრას გამოჰყავს შლაკები და იმუნიტეტს აძლიერებს.
ზღვისპროდუქტები კრეატიულობის სტიმულირებას ახდენს.
ავოკადო არეგულირებს ტვინის სისხლის მიმოქცევას.
მცენარეული ზეთი (ზეითუნის, რაფსის, ნიგვზის) შეიცავს მსუბუქ ცხიმოვან მჟავებს, რომელიც აჯანსაღებს მთელს ორგანიზმს.
კიტრი – ენერგიის წყაროა.
ზღვის თევზი აძლიერებს ნივთიერებათა ცვლას და გონების მუშაობას.
მწვანე ბარდა ამაგრებს ნერვულ სისტემას, აფართოებს ინტელექტუალურ შესაძლებლობებს.
ყველი მოქმედებს როგორც ანტიდეპრესანტი, ძალებს გვმატებს.
ბანანი ხელს უწყობს ბედნიერების ჰორმონის (სეროტონინის) გამოყოფას, აუმჯობესებს ხასიათს. გვეხმარება ძალების სწრაფად აღდგენაში.
ნიგოზი გონებრივი მუშაობის სტიმულირებას ახდენს, შინაგან სიმშვიდეს და დაძაბული კუნთების მოდუნებას უწყობს ხელს.
ზღვის მარილი ძალიან მნიშვნელოვანია ორგანიზმში ელექტროლიტების სწორი ბალანსისთვის, ასევე ხელს უწყობს ცხიმების დაწვას.


ბრინჯი გოგრით (ბავშვის კვება)

ბრინჯი გოგრით

(brinji gogrit)


საჭირო ინგრედიენტები:

1 ჭიქა ბრინჯი
2,5 ჭიქა წყალი
150-200 გრ გოგრა
1 ჭიქა რძე
1-2 ჩ.კ. შაქარი
მარილი გემოვნებით
კარაქი

მომზადების წესი:

ბრინჯი გავრეცხოთ, მოვათავსოთ ქვაბში და წყალი დავასხათ. ოდნავ მარილიც შეიძლება დავუმატოთ. ადუღების შემდეგ ცეცხლს დავუწიოთ და ვხარშოთ 15 წუთი (სანამ ბრინჯი კარგად არ მოიხარშება). გოგრა პატარა კუბებად დავჭრათ. ქვაბით რძე ავადუღოთ, შემდეგ ჩავყაროთ გოგრა, სულ ცოტა მარილი და შაქარი და დაბალ ცეცხლზე მოვხარშოთ 10-15 წუთი. მოხარშული გოგრა კი ბრინჯს შევურიოთ. თეფშზე რომ გადმოვიღებთ დავუმატოთ კარაქი. სურვილის მიხედვით, შეგვიძლია ქიშმიშიც მოვაყაროთ.



სტაფილოს და კარტოფილის მაჭკატები (ბავშვის კვება)

სტაფილოს და კარტოფილის მაჭკატები

(stafilos da kartofilis machkatebi)


საჭირო ინგრედიენტები:
500 გ ყვავილოვანი კომბოსტო, 500 გ კარტოფილი, 0,5 ჭიქამდე ფქვილი, მარილი, წითელი წიწაკა - გემოვნებით.
3 თავი ხახვი, 1 ჭიქა ზეთი.

მომზადების წესი:
ყვავილოვანი კომბოსტო და კარტიფილი მოვხარშოთ და დავჭყლიტოთ, დავუმატოთ 2-3 ს.კ. ზეთში მოშუშული ხახვი, სანელებლები და ფქვილი. სუფრის კოვზით ამოვიღოთ ცომი და შევწვათ ზეთდასხმულ ტაფაზე.



სასარგებლო კომბოსტო (ბავშვის კვება)

სასარგებლო კომბოსტო

(sasargeblo kombosto)


დღეს კომბოსტოს 150 სახეობაა ცნობილი და ყოველი მათგანი უნიკალური, სასარგებლო და სამკურნალო თვისებებით გამოირჩევა. კულინარები კი თეთრ კომბოსტოზე მეტად მის შემდეგ ნაირსახეობებს ანიჭებენ უპირატესობას - წითელს, ყვავილოვანს, ბროკოლის, ბრიუსელურს, კოლრაბის, პეკინურს. ისინი, რა თქმა უნდა, განსხვავდებიან ერთმანეთისგან როგორც გარეგნულად, ისე გემოთი, მაგრამ ყველა ძალზე სასარგებლოა ჩვენი ჯანმრთელობისთვის.
კომბოსტოს ყველა სახეობა შეიცავს ვიტამინების დაბალანსებულ კომპლექსს, C ვიტამინის შემცველობით კი ლიმონსაც არ ჩამოუვარდება.
კომბოსტოს ახასიათებს სიმსივნური უჯრედების შეჩერების თვისება. კომბოსტოს ოჯახის ყველა წევრს აერთიანებს სასარგებლო თვისება - ვიტამინებს ინარჩუნებს დიდი ხნის მანძილზე.

თეთრი კომბოსტო ბევრ სასარგებლო ნივთიერებას შეიცავს - ორგანულ მჟავებს, ენზიმებს, ფიტონციდებს, კალიუმს, რომელიც აუცილებელია გულის მუშაობისთვის. კომბოსტოს გარე ფურცლები (საადრეო მწვანე კომბოსტო) შეიცავს ფოლიუმის მჟავას, რაც აუცილებელია სისხლის წარმოქმნისა და ცვლის პროცესებისთვის. ყოველდღიურად ამ პროდუქტის გამოყენება დაძაბულობას მოგვიხსნის, ნერვებს დაგვიმშვიდებს. ცინკი კომბოსტოში ყველაზე ათვისებადი ფორმით არსებობს. ის აუცილებელია ნივთიერებათა ცვლისთვის. ასევე შეიცავს იშვიათ მიკროელემენტებს სელენსა და გლუკოზას. ეს მნიშვნელოვანი იმუნური ნივთიერებებია, აუცილებელი ჩვენი სხეულის ყველა უჯრედისთვის. კომბოსტოში ბევრია ვიტამინი: C, K, ასევე B, P, PP ჯგუფების ვიტამინები.
ცოცხალი კომბოსტოს ფურცლების დადება თავის ტკივილის დროს შვებას გვრის. კომბოსტოს ფურცლებისა და კვერცხის ცილისგან მომზადებული ფაფა კი საუკეთესო წამალია დამწვრობისა და ჭრილობის დროს.
კომბოსტოს კერძები, რომელიც 10-15 წთ იხარშება, ხელს უწყობს კუჭის მოქმედებას, ხოლო 30-40 წთ ხარშვისას - კუჭში კრავს. სახლის პირობებში სასარგებლოა თეთრი კომბოსტოს წვენის მომზადება. კომბოსტო ხორცსაკეპ მანქანაში გავატაროთ, შემდეგ კი გადავწუროთ. ეს წვენი შეგვიძლია შუშის ბოთლით მაცივარში შევინახოთ, მაგრამ 2 დღეზე მეტხანს არა. კომბოსტოს წვენს თაფლით იყენებენ სასუნთქი გზების ანთებისა და ლარინგიტის დროს.

წითელი კომბოსტო თეთრის ახლო ნათესავია, მაგრამ უფრო მდიდარია სასარგებლო და მკვებავი ნივთიერებების შემცველობით. მასში არის განსაკუთრებული ნივთიერება - ანტოციანი, რომელიც სასარგებლოა სისხლძარღვებისთვის, წნევას დაბლა წევს. წითელი კომბოსტოს ფიტონციდები აფერხებს ტუბერკულოზის ჩხირის განვითარებას. ასევე შველის მწვავე და ქრონიკულ ბრონქიტს.

ყვავილოვან კომბოსტოში არის ბევრი ცილოვანი ნივთიერება, რომლის შემადგენლობაშიც შედის შეუცვლელი ამინომჟავა მეტონინი, ასევე ვიტამინისებრი ნივთიერება ქოლინი. სწორედ ამიტომ არის ეს კომბოსტო კვების მნიშვნელოვანი პროდუქტი მათთვის, ვისაც აწუხებს თირკმელი, ათეროსკლეროზი და დიაბეტი. გარდა ამისა, ყვავილოვანი კომბოსტო მდიდარია ვიტამინებით და მინერალური ნივთიერებებით: მასში ვიტამინი C ორჯერ მეტია ვიდრე თეთრ კომბოსტოში, ასევე ცილაც. ყვავილოვანი კომბოსტოს აზოტის ნივთიერებების თითქმის ნახევარი ადვილად ათვისებადი ცილოვანი ნაერთებია, ამიტომ ადამიანის ორგანიზმი მას უკეთ ითვისებს, ვიდრე კომბოსტოს სხვა სახეობებს. ამ თვისებების წყალობით ყვავილოვანი კომბოსტო გამოიყენება ბავშვის და დედის დიეტურ კვებაში, რომლებსაც კუჭნაწლავისა და თირკმელის პრობლემები აქვთ.

კოლრაბს უწოდებენ ჩრდილოეთის ლიმონს. ბუნებამ კოლრაბი გულუხვად დააჯილდოვა სასარგებლო ნივთიერებებით. C ვიტამინის შემცველობით ლიმონს არაფრით ჩამოუვარდება. კალიუმისა და კალციუმის დიდი რაოდენობა ამ კომბოსტოს განსაკუთრებით სასარგებლოს ხდის გულ-სისხლძარღვთა დაავადებების დროს. გარდა ამისა, კოლრაბი მდიდარია ფოსფორით, რკინით, B ჯგუფის ვიტამინებით. ამ კომბოსტოს საკვებში რეგულარულად ჩართვა ხელს უწყობს ნერვული სისტემის, ნივთიერებათა ცვლის მოწესრიგებას.

ბროკოლი ითვლება ყვავილოვანი კომბოსტოს სახეობად, თუმცა სასარგებლო თვისებებით აღემატება მას. ის უფრო მდიდარია კაროტინით, C ვიტამინი მასში სამჯერ მეტია, ვიდრე ყვავილოვანში. ის შეიცავს B, PP, E ჯგუფის ვიტამინებს. საკმაო რაოდენობის მინერალურ ნივთიერებებს. განსაკუთრებით მდიდარია კალციუმით და ფოსფორით. ეს ბოსტნეული განსაკუთრებით სასარგებლოა გულის უკმარისობის და ნერვული სისტემის მოშლის დროს. ასევე ღვიძლისა და მუცლის ღრუს დაავადებების დროს. ქლოროფილი, რომელიც მის შემადგენლობაშია, დადებითად მოქმედებს სისხლის შემადგენლობაზე. და კიდევ, ეს კომბოსტო ითვლება ერთერთ საუკეთესო ანტისკლეროტულ საშუალებად.

ბრიუსელური კომბოსტოს სამშობლოდ ბელგია ითვლება. პაწაწინა ბრუსელური კომბოსტო თეთრის ნათესავია, თუმცა სასარგებლო თვისებებით აღემატება მას. ცილები, ვიტამინი C, ამინომჟავები და მინერალები გაცილებით მეტია მასში. მდიდარია რკინით და სასარგებლოა ბავშვებისთვის.

პეკინური კომბოსტოში ცილები ორჯერ მეტია, ვიდრე თეთრში, მეტია კალციუმი, ფოსფორი, რკინა. მდიდარია A, B1, B2, C,PP ვიტამინებით. ახასიათებს დიეტური და სამკურნალო თვისებები.


ახალი კომბოსტო საფანელში

ახალი კომბოსტო საფანელში

(axali kombosto safanelshi)


საჭირო ინგრედიენტები:
ახალი კომბოსტო 1 კგ
საფანელი 200 გრ
მარილი, შავი წიწაკა ( ან სვანური მარილი)
ზეთი (ან კარაქი)


მომზადების წესი:

ახალი კომბოსტო კარგად გავრეცხოთ, შემდეგ შუაში გავჭრათ და ისე ჩავალაგოთ ადუღებულ წყალში, ცოტა ხანს გავაჩეროთ რომ მოიწალოს. შემდეგ ფრთხილად ამოვიღოთ საწურზე და რამდენიმე წუთი გავაჩეროთ რომ გაგრილდეს.
თეფშზე დავყაროთ საფანელი და შევურიოთ მარილი და შავი პილპილი. ჩემი მეგობარი საფანელში სვანურ მარილს ურევს, ისიც ძალიან გემრიელი გამოდის.
კომბოსტოს ნაჭრები ამოვავლოთ საფანელში და ზეთში შევწვათ.
შემწვარ კომბოსტოს ძალიან უხდება მაიონეზი.

გემრიელად მიირთვით!


თევზის ბურთულები

თევზის ბურთულები

(tevzis burtulebi)


საჭირო ინგრედიენტები:

400 გ თევზის ფილე, მაგ. ორაგულის ან ქორჭილას
ლიმონის წვენი
ცოცხალი ან გამხმარი კამა
2 საშუალიო ზომის მჟავე კიტრი
4 ნაჭერი პურის ტოსტი
2 კვერცხი
75 მლ რძე
1 დაფხვნილი ორცხობილა
მარილი
ოდნავ პილპილი, 1 ს.კ. ზეითუნის ზეთი
შემწვარ თევზის ბურთულებს ძალიან მოუხდება მოხარშული ბროკოლი და კიტრის და პომიდვრის სალათა.

მომზადების წესი:

1. თევზის ფილე ცოტა წყალში, ლიმონის წვენსა და კამასთან ერთად მოვშუშოთ (დაახლოებით 5-8 წუთი), მერე ოდნავ შესაგრილებლად დავტოვოთ. ამასობაში კიტრი წვრილად დავჭრათ ან გავხეხოთ და ტოსტის პური დავფშვნათ.
2. ჩავყაროთ ჯამში და კვერცხი, რძე და ორცხობილის ფხვნილიც დავუმატოთ. მომზადებულ თევზის ფილეს ფხები ამოვაცალოთ და დანარჩენ ინგრედიენტებთან ერთად ჯამში მოვათავსოთ. ოდნავ მარილი მოვაყაროთ. მერე ყველაფერი კარგად მოვზილოთ, სანამ ერთგვაროვან მასად არ გადაიქცევა.
3. მიღებული მასისგან ბურთები გავაკეთოთ (თუ დრო გვაქვს, შეგვიძლია თევზის ფორმა მივცეთ) და 1 სუფრის კოვზ ზეითუნის ზეთში, ორივე მხარეს დაახლოებით 3-4 წუთი შევწვათ.
მომზადების დრო: 30 წუთი
გამოდის 8 ცალი თევზის ბურთულა


მობრაწულა ბროკოლით

მობრაწულა ბროკოლით

(mobrawula brokolit)


საჭირო ინგრედიენტები:
250 გრ სპაგეტი
750 გრ ბროკოლი
1 ს.კ. ზეთი
200 გრ ყველი
150 გრ იოგურტი (1.5%)

მომზადების წესი:
1. მოვხარშოთ სპაგეტი. ბროკოლი წვრილად დავჭრათ და თავდახურულ მდგომარეობაში ცოტა ცხელ, მარილიან წყალში დაახლოებით 10 წუთი ვხარშოთ. მზა სპაგეტიდან წყალი გადავასხათ და ზეთი ჩავუმატოთ. ბროკოლი გადავწუროთ და სითხე შევინახოთ.
2. ყველი ნახარშ წყალში ჩავალბოთ და იოგურტი შევურიოთ. სპაგეტი ბროკოლისთან ერთად დიდ გამოსაცხობ ფორმაში მოვათავსოთ და სოუსი მოვასხათ. ყველი გავხეხოთ და ზედ მოვაყაროთ. გაცხელებულ ღუმელში 180 გრადუსზე დაახლოებით 10 წუთი ვაცხოთ, სანამ ყველი შებრაწვას დაიწყებს.


ცოცხალი კომბოსტოს სალათა

ცოცხალი კომბოსტოს სალათა

(cocxali kombostos salata)


საჭირო ინგრედიენტები:
კომბოსტო - 500 გრ
კიტრი - 1 ცალი
სტაფილო - 1 ცალი
ბოლოკი - 3 ცალი
ხახვი - 1 თავი
მაიონეზი
ლიმონის წვენი - 1/2
მარილი, შავი წიწაკა
ქინძი


მომზადების წესი:

ბოსტნეული კარგად გავრეცხოთ. კომბოსტო დავჭრათ წვრილად, კიტრი პატარა კუბებად, სტაფილო და ბოლოკი გავხეხოთ მსხვილ სახეხზე. ხახვი ალყა-ალყად დავჭრათ, შემდეგ კი ყველა ზემოთ ჩამოთვლილი ბოსტნეული ერთმანეთს შევურიოთ, დავასხათ ლიმონის წვენისა და მაიონეზის ნარევი და დავუმატოთ მარილი, შავი წიწაკა და ქინძი
.


მჟაუნას მობრაწულა

მჟაუნას მობრაწულა

(mjaunas mobrawula)



საჭირო ინგრედიენტები:
2 კონა მჟაუნა,
4 კვერცხი,
150 გ. ხაჭო,
100 გ. ყველი,
მარილი და წიწაკა – გემოვნებით.

მომზადების წესი:
1. მჟაუნა გადავარჩიოთ, გავრეცხოთ და დავკეპოთ. შევურიოთ ხაჭო, 50 გ. გახეხილი ყველი და ათქვეფილი კვერცხი,
2. მომზადებული მასა ჩავდოთ ცეცხლგამძლე ფორმაში, ზემოდან მოვაყაროთ დარჩენილი გახეხილი ყველი და შევდგათ 200 გრადუსზე გახურებულ ღუმელში დაახლოებით 25-30 წუთით.


ქათმის წვნიანი კვერცხით (წვნიანი)

ქათმის წვნიანი კვერცხით

(qatmis wvniani kvercxit)


საჭირო მასალა:
650 გ. ქათმის ფილე
30 გ. პურის ფქვილი
1 ლიმონის წვენი
1-2 ს.კ. კარაქი
1 კვერცხის გული
1,5 ლ. წყალი
3 ღერი ოხრახუში
3 ღერი ქინძი
3 ღერი კამა
3 ღერი პიტნა

მომზადება:
ქათმის ხორცი დავჭრათ საშუალო ნაჭრებად და ჩავყაროთ მდუღარე წყალში და ვხარშოთ 15 წუთის განმავლობაში. 6 ს.კ. ქათმის ბულიონი, 1 კვერცხის გული, ლიმონის წვენი და ფქვილი კარგად გავთქვიფოთ, ფრთხილად ჩავუმატოთ წვნიანს და თან ვურიოთ. მორევა გავაგრძელოთ მანამ, სანამ არ ადუღდება წვენი. ბოლოს ჩავუმატოთ კარაქი, მწვანილი და კიდევ ერთხელ წამოვადუღოთ.


სამარხვო ვარენიკი კომბოსტოთი (ცომეული)

სამარხვო ვარენიკი კომბოსტოთი

(samarxvo vareniki kombostoti)


საჭირო ინგრედიენტები:

350 გ ფქვილი,
0,5 ჩ.კ. მარილი,
2 თავი ხახვი,
150 გ სტაფილო,
3-4 ს.კ. ზეითუნის ზეთი,
500 გ კომბოსტო,
1 კონა კამა.

მომზადების წესი:

ფქვილს დავაყაროთ მარილი, დავასხათ 150 მლ თბილი წყალი და მოვზილოთ მაგარი ცომი, დავაფართ ჩაისტილო და 40 წუთით დავდგათ ოთახის ტემპერატურაზე. წვრილად დაჭრილი ხახვი და გახეხილი სტაფილო მოვშუშოთ 3-4 ს.კ. ზეითუნის ზეთში. მოშუშული ბოსტნეულის 1/3 ნაწილი სხვა ჭურჭელში შევინახოთ, დანარჩენს კი წვრილად აკეპილი კომბოსტო დავამატოთ და გავაგრძელოთ შუშვა. როცა კომბოსტო ოქროსფერი გახდება, შევანელოთ მარილით და გავაგრილოთ. ცომი გავაბრტყელოთ, ჭიქით ამოვჭრათ და თითოეულში მოვათავსოთ კობმოსტოს გულსართი. ვარენიკები ვხარშოთ ადუღებულ მარილ-წყალში დაახლოებით 5-7 წუთის განმავლობაში. მოხარშულ ვარენიკებს მოვაყაროთ წვრილად დაჭრილი კამა და მივირთვათ სტაფილოსა და ხახვის გარნირთან ერთად.